ເມື່ອປະມານ 5 ປີຄືນຫຼັງ ຖ້າໃຜໄດ້ເປັນເຈົ້າຂອງຮ້ານຂາຍເພງຢູ່ຕະຫຼາດ ແມ່ນບໍ່ຄິດອຸກອັ່ງຫຍັງກັບຊີວິດການເປັນຢູ່ ເພາະແຕ່ລະມື້ຈະມີລູກຄ້າໄປເລາະຊື້ເພງຢູ່ຕະຫຼາດຢ່າງຫຼວງຫຼາຍ ແຕ່ວ່າມາຮອດຍຸກສະໄໝຊູ່ມື້ນີ້ ແຜ່ນຊີດີແລະວິດີໂອເພງຢູ່ຕະຫຼາດ ເລິ່ມຂາຍຝືດ ແລະມີຫຼາຍຮ້ານໃນເຂດຕ່າງແຂວງຈົນເຖິງຂັ້ນເຈັ້ງ.
ມີແມ່ຄ້າຜູ້ໜຶ່ງເລິ່ມຕົ້ນດ້ວຍການຕັ້ງຮ້ານນ້ອຍໆ ຂາຍແຜ່ນຊີດີເພງຢູ່ຕະຫຼາດແຫ່ງໜຶ່ງເມື່ອປະມານປີ 2007 ກິດຈະການຮ້ານຂາຍແຜ່ນເພງໄປໄດ້ດິບໄດ້ດີ ມີລາຍໄດ້ເຂົ້າມາແຕ່ລະມື້ເປັນກອບເປັນກຳ ລາວເລີຍຂະຫຍາຍຮ້ານຂອງລາວອອກຕື່ມເປັນຮ້ານບັກໃຫຍ່ ແລະກໍຍິ່ງສ້າງລາຍຮັບໃຫ້ລາວຫຼາຍຂຶ້ນຕື່ມເຊັ່ນກັນ ຢູ່ຕໍ່ມາເມື່ອເພງ MP3 ເລິ່ມເປັນທີ່ນິຍົມ ລາວກໍໄດ້ຊື້ຄອມພິວເຕີມາເພື່ອຮັບບໍລິການໂຫຼດເພງໃສ່ໂທລະສັບ ຫຼື ໃສ່ແມມໂມລີ່ໃຫ້ລູກຄ້າ ກໍຍິ່ງເຮັດໃຫ້ຮ້ານເປັນທີ່ນິຍົມຂອງລູກຄ້າຫຼາຍຂຶ້ນ ລາວຂາຍເພງຢູ່ແບບນັ້ນໄດ້ປະມານ 8 ປີ ລາຍໄດ້ເຂົ້າມາຢ່າງສະໝໍ່າສະເໝີ ຈົນສາມາດດາວລົດກະບະວີໂກ້ແຊ້ມມາຂີ່ໄດ້ຄືບ້ານຄືເມືອງ.
ແນວໃດກໍຕາມ, ຕົກມາຮອດປີ 2015 ກິດຈະການຂາຍເພງຂອງລາວເລິ່ມຖົດຖອຍ ມີຄົນແວ່ເຂົ້າຮ້ານນັບມື້ໜ້ອຍລົງ ເພາະຜູ້ຄົນໃນສັງຄົມ ເລິ່ມຢູ່ກັບໂທລະສັບຫຼາຍຂຶ້ນ ແລະຈົນໃນທີ່ສຸດມາຮອດປີນີ້ 2017 ຮ້ານຂາຍເພງກໍມີລາຍໄດ້ພຽງມື້ລະ 100,000 ກີບ ຫຼື ບາງມື້ກໍບໍ່ຮອດ, ລົດທີ່ດາວມາໃກ້ຊິໝົດແລ້ວ ກໍບໍ່ສາມາດດາວຕໍ່ໄປໄດ້ ເຖິງຂັ້ນໄດ້ຂາຍເຂົ້າຮ້ານໃນທີ່ສຸດ.
ແມ່ຄ້າທ່ານນີ້ເວົ້າວ່າ ເສຍດາຍທີ່ຕົນເອງປັບໂຕບໍ່ທັນ ຖ້າຄິດອອກໃນຕອນນັ້ນ ຕອນທີ່ຄົນເລິ່ມເອົາໂທລະສັບມາໃຫ້ໂຫຼດເພງໃສ່ໃຫ້ນັ້ນ ເຊິ່ງເປັນໄລຍະປ່ຽນຜ່ານຈາກແຜ່ນເພງມາເປັນ MP3 ແລະກຳລັງຫັນເຂົ້າສູ່ການຟັງເພງແບບອອນລາຍ ຜ່ານເວັບໄຊ ແລະ Youtube, ຖ້າຄິດທັນແລ້ວເລິ່ມເອົາໂທລະສັບເຂົ້າມາຂາຍໃນຮ້ານຕັ້ງແຕ່ຕອນນັ້ນ ມາຮອດຕອນນີ້ຄືຊິສາມາດປ່ຽນຈາກຮ້ານຂາຍແຜ່ນເພງມາເປັນຮ້ານຂາຍໂທລະສັບໄດ້ ເຊິ່ງແນ່ນອນວ່າກິດຈະການກໍຈະດຳເນີນຕໍ່ໄປໄດ້ ເສຍດາຍທີ່ຄິດຊ້າໄປ ມາຄິດອອກຕອນທີ່ບໍ່ມີເງິນແລ້ວ.