ໃນວັນທີ 10 ຕຸລາ 2017ທີ່ ກະຊວງການຕ່າງປະເທດ ທ່ານ ສະເຫລີມໄຊ ກົມມະສິດ ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ເຢັນ ເປເຕີ ລຸດເຄນເຮິມ (Jens Peter lutkenherm) ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສາທາ ລະນະລັດ ສະຫະພັນ ເຢຍລະມັນ ຄົນໃໝ່ ປະຈໍາ ສປປ ລາວ
ໃນໂອກາດດັ່ງກ່າວ, ທ່ານ ສະເຫລີມໄຊ ກົມມະສິດ ໄດ້ສະແດງຄວາມຍິນດີຕໍ່ທ່ານທູດ ທີ່ໄດ້ຖືກແຕ່ງຕັ້ງໃຫ້ມາດໍາລົງຕໍາແໜ່ງເປັນ ເອກອັກຄະລັດຖະທູດ ແຫ່ງ ສາທາລະນະລັດ ສະຫະພັນເຢຍລະມັນ ຄົນໃໝ່ ປະຈໍາ ສປປ ລາວ, ພ້ອມສະແດງຄວາມເຊື່ອໝັ້ນວ່າ ທ່ານທູດຈະສືບຕໍ່ເສີມສ້າງ ແລະ ເພີ່ມທະວີການພົວພັນຮ່ວມມືລະຫວ່າງສອງປະເທດ ລາວ-ເຢຍລະມັນ ໃຫ້ນັບມື້ຂະຫຍາຍຕົວຍິ່ງໆຂຶ້ນທັງສອງຝ່າຍໄດ້ຕີລາຄາສູງຕໍ່ສາຍພົວພັນ ມິດຕະພາບ ແລະ ການຮ່ວມມືທີ່ດີ ລະຫວ່າງສອງປະເທດໃນໄລຍະຜ່ານມາ, ພ້ອມທັງສະແດງຄວາມຊົມເຊີຍຕໍ່ ວັນສ້າງຕັ້ງສາຍພົວພັນການທູດ ລາວ-ເຢຍລະມັນ ທີ່ຈະໝູນວຽນມາຄົບຮອບ 60ປີ ໃນປີ 2018 (31/01/1958-31/01/2018), ສອງຝ່າຍເຫັນດີຈະຮ່ວມກັນຈັດພິທີສະເຫລີມສະຫລອງວັນສໍາຄັນດັ່ງກ່າວ ຢ່າງເປັນຂະບວນຝົດຟຶ້ນ ແລະ ມີຄວາມໝາຍ
ພ້ອມນີ້, ທ່ານ ສະເຫລີມໄຊ ກົມມະສິດ ໄດ້ຖືເອົາໂອກາດດັ່ງກ່າວ ສະແດງຄວາມຂອບໃຈຕໍ່ການຊ່ວຍເຫລືອ ສປປ ລາວ ຂອງລັດຖະບານແຫ່ງ ສາທາລະນະລັດ ສະຫະພັນ ເຢຍລະມັນ, ຊຶ່ງເປັນການປະກອບສ່ວນອັນສໍາຄັນເຂົ້າໃນການສ້າງສາພັດທະນາໃນດ້ານຕ່າງໆ ຕາມແຜນພັດທະນາເສດຖະກິດສັງຄົມ ຂອງສປປ ລາວ ເປັນຕົ້ນແມ່ນ ການພັດທະນາຊົນນະບົດ, ວຽກງານອາຊີວະສຶກສາ, ການພັດທະນາເສດຖະກິດແບບຍືນຍົງ, ການພັດທະນາຊັບພະຍາ ກອນມະນຸດ, ການອະນຸລັກສິ່ງແວດລ້ອມ, ການກໍ່ສ້າງພື້ນຖານໂຄງລ່າງ ແລະ ການສົ່ງເສີມທຸລະກິດພາກເອກະຊົນ, ຊື່ງມາເຖິງປັດຈຸບັນ ເຢຍລະມັນ ໄດ້ໃຫ້ການຊ່ວຍເຫລືອແກ່ ສປປ ລາວ ລວມມູນຄ່າ 377.1 ລ້ານເອີໂຣ, ໃນນັ້ນ ສົກປີ 2016-2017 ແມ່ນມີມູນຄ່າ 45,8 ລ້ານເອີໂຣ. ໃນຕອນທ້າຍ ທ່ານລັດຖະມົນຕີ ຍັງສະເໜີໃຫ້ທ່ານທູດ ຊ່ວຍຊຸກຍູ້ນັກລົງທືນ ແລະ ເຊີນຊວນນັກທ່ອງທ່ຽວເຢຍລະມັນ ໃຫ້ມາທ່ຽວລາວ ແລະ ລົງທືນຢູ່ລາວໃຫ້ຫລາຍຂຶ້ນ ເພື່ອນໍາຜົນປະໂຫຍດມາສູ່ປະຊາຊົນສອງຊາດ ລາວ-ເຢຍລະມັນ
ໃນໂອກາດດຽວກັນ, ທ່ານທູດ ກໍໄດ້ສະແດງຄວາມຂອບໃຈເປັນຢ່າງສູງຕໍ່ທ່ານລັດຖະມົນຕີ ທີ່ໄດ້ໃຫ້ການຕ້ອນຮັບອັນອົບອຸ່ນ ແລະ ໃຫ້ຄໍາໝັ້ນສັນຍາວ່າ ໃນໄລຍະທີ່ປະຕິບັດໜ້າທີ່ການທູດຢູ່ລາວ ຈະພະຍາຍາມສືບຕໍ່ເສີມສ້າງ ແລະ ເພີ່ມທະວີການພົວພັນຮ່ວມມື ລະຫວ່າງສອງປະເທດ ລາວ-ເຢຍລະມັນ ໃຫ້ນັບມື້ຂະຫຍາຍຕົວຍິ່ງໆຂຶ້ນ
ແຫລ່ງຂ່າວ: ວິໄລສັກ
ພາບປະກອບ: ໄອຄໍາ