ສື່ມວນຊົນລາວ ແລະ ສື່ມວນຊົນຈາກປະເທດນໍເວ ໄດ້ຈັດເວທີພົບປະແລກປ່ຽນບົດຮຽນ ເຊິ່ງກັນ ແລະ ກັນ ໃນວັນທີ 9 ຕຸລາ 2017 ນີ້, ຢູ່ສະມາຄົມນັກຂ່າວ ແຫ່ງ ສປປ ລາວ ເພື່ອຊອກຫາຊ່ອງທາງ ດຶງດູດໃຫ້ໄວໜຸ່ມລາວ ຫັນມາອ່ານສື່ສິ່ງພິມຫລາຍຂຶ້ນ.
ປັດຈຸບັນ ສື່ມວນຊົນໃນທົ່ວໂລກ ເວົ້າສະເພາະ ຢູ່ ສປປ ລາວ ກຳລັງປະສົບກັບບັນຫາສື່ອອນລາຍ ເຂົ້າມາແຊກແຊງ, ເຮັດໃຫ້ສື່ສິ່ງພິມ, ວິທະຍຸ ແລະ ໂທລະພາບ ນັບມື້ໄດ້ຮັບຄວາມສົນໃຈໜ້ອຍລົງ ເຊິ່ງມັນໄດ້ສົ່ງຜົນກະທົບ ໂດຍກົງຕໍ່ສື່ສິ່ງພິມ ເມື່ອຄົນຫັນມານິຍົມອ່ານຂ່າວເທິງອິນເຕີເນັດ ເຮັດໃຫ້ຍອດຂາຍໜັງສືພິມຫລຸດລົງ ເຊິ່ງສິ່ງທ້າທ້າຍດັ່ງກ່າວ ເຮັດໃຫ້ສື່ມວນຊົນຕ້ອງໄດ້ບຸກບືນ ພັດທະນາອົງກອນ ໃຫ້ມີຄຸນນະພາບ, ປັບປຸງທາງດ້ານເນື້ອໃນ, ເພີ່ມຄວາມສາມາດ ໃນການຂຽນຂ່າວທີ່ດີ ເປັນຕົ້ນແມ່ນການ ກຳນົດຄໍລຳທີ່ໜ້າສົນໃຈ, ເພີ່ມເນື້ອຫາສາລະໃໝ່ໆ ເພື່ອດຶງດູດໃຫ້ໄວໜຸ່ມຫັນມາສົນໃຈ ແລະ ອ່ານໜັງສືພີມຫລາຍຂຶ້ນ ແທນການອ່ານທາງສື່ອອນລາຍ.
ສຳລັບ ສປປ ລາວ ສື່ອອນລາຍ ຫລື (ຂ່າວເທິງອິນເຕີເນັດ) ເປັນສື່ທາງເລືອກໃໝ່ ທີ່ເຂົ້າມາມີບົດບາດ ແລະ ໄດ້ຮັບຄວາມນິຍົມຫລາຍໃນປັດຈຸບັນ, ເນື່ອງຈາກວ່າ ສາມາດເຂົ້າເຖິງຂໍ້ມູນຂ່າວສານໄດ້ສະດວກສະບາຍ, ວ່ອງໄວ, ທ່ວງທັນເຫດການ, ບໍ່ກຳນົດເວລາ, ພຽງແຕ່ມີອິນເຕີເນັດ ກໍ່ສາມາດຮັບຂ່າວ ສານໄດ້ທຸກສະຖານທີ່ ດ້ວຍຄວາມໂດດເດັ່ນທີ່ປະຕິເສດບໍ່ໄດ້ ເຮັດໃຫ້ຄົນສ່ວນໃຫຍ່ ຫັນມາອ່ານຂ່າວເທິງອິນເຕີເນັດຫລາຍຂຶ້ນ ເປັນຕົ້ນທາງເຟສບຸກ, ເວບໄຊ ແລະ ສື່ອອນໄລ ຕ່າງໆ.
ອາຈານ ຢັນ ວິນເຊັນ ສເຕິນ ຜູ້ເຮັດວຽກກ່ຽວກັບສື່ມວນຊົນມາໄດ້ 35 ປີ ຈາກປະເທດ ນໍເວ ໄດ້ໃຫ້ທັດສະນະກ່ຽວກັບສື່ມວນຊົນລາວວ່າ: ຂ້າພະເຈົ້າມາແລກປ່ຽນບົດຮຽນຢູ່ປະເທດລາວເປັນຄັ້ງທຳອິດ ເຊິ່ງເປັນຫ່ວງອະນາຄົດຂອງສື່ມວນຊົນລາວຫຼາຍ, ເປັນຕົ້ນແມ່ນ ໜັງສືພິມ ປັດຈຸບັນນີ້ໄວໜຸ່ມບໍ່ຄ່ອຍສົນໃຈ ຫຼື ບໍ່ອ່ານໜັງສືພິມ ເພາະວ່າເຂົາເຈົ້າຈະໃຊ້ແຕ່ສະມາດໂຟນ, ເທັບເລັດ, ໂຊຊຽວມີເດຍຕ່າງໆ. ສະນັ້ນ ຈຶ່ງເຮັດໃຫ້ສື່ມວນຊົນລາວມີຄວາມສ່ຽງ ແລະ ຄວາມທ້າທາຍຫຼາຍ.
ທ່ານກ່າວຕື່ມວ່າ: ຖ້າເຮົາຢາກໃຫ້ຊາວໜຸ່ມໄດ້ອ່ານໜັງສືພິມ ຫຼື ສື່ສິງພິມຕ່າງໆ ຕ້ອງເຂົ້າໃຈວ່າໄວໜຸ່ມຕ້ອງການແນວໃດ ຈຶ່ງຢາກໃຫ້ສື່ມວນຊົນລາວພວກເຮົາຮ່ວມຈິດຮ່ວມໃຈກັນປຸກລະດົມທຸກວິທີທາງໃຫ້ໄວໜຸ່ມຫັນມາເປັນຄົນມັກອ່ານຕັ້ງແຕ່ໄວຮຽນ.
ແຫລ່ງຂ່າວ: Sengaloun Sayalath