ມື້ວານນີ້, ວັນທີ 5 ຕຸລາ 2017 ສັງຄົມອອນລາຍ ໄດ້ພາກັນແຊກະໜໍ່າຄລິບວິດີໂອ ທີ່ຜູ້ໃຊ້ Facebook ທ່ານໜຶ່ງຊື່ TK Pnsign ໄດ້ເອົາຂຶ້ນໃນ Facebook ຂອງຕົນ ໂດຍມີຂໍ້ຄວາມເລົ່າວ່າ “ບຸນອອກພັນສາ ງານຊ່ວງເຮືອທ່າວັດຈັນປີນີ້ ຫວຽດບໍ່ໃຫ້ຄົນລາວຂາຍເຄື່ອງເດີ້ພີ່ນ້ອງ ພາເຂົ້ານ້ອຍສ່ຳນີ້ຖ້າຢາກຂາຍຕ້ອງຈ່າຍມັນ200.000ກີບ (ກູລະງົງບຸນຊ່ວງເຮືອວັດຈັນ ຫຼື ບຸນຊ່ວງເຮືອ ຢູ່ວິງ ວະ) ຄົນລາວຊິໄປຢູ່ໃສຢາກຖາມ ໃຜຮູ້ຊ່ວຍຕອບແດ່”.
ໂພສດັ່ງກ່າວນັ້ນ ໄດ້ມີຜູ້ສົນໃຈແຊຕໍ່ແລະວິພາກວິຈານຢ່າງຫຼວງຫຼາຍ ເຊິ່ງຜູ້ວິຈານສ່ວນຫຼາຍເຫັນວ່າ ທາງການລາວໂດຍສະເພາະແມ່ນຄະນະກຳມະການຈັດຕັ້ງບຸນປະເພນີດັ່ງກ່າວນັ້ນ ຄວນພິຈາລະນາຄືນເຖິງຄວາມເໝາະສົມ ຄືຄວນຈັດສັນພື້ນທີ່ພິເສດໃຫ້ແກ່ແມ່ຄ້າຂາຍເຂົ້າຫຼາມປີ້ງໄກ່ໃນລາຄາຂ້ອນຂ້າງຖືກໃຫ້ເຂົາເຈົ້າ, ບໍ່ຄວນໃຫ້ມີການເຊົ່າຕໍ່ຫຼາຍມື ແລະທີ່ສຳຄັນອີກອັນໜຶ່ງ ບໍ່ຄວນປະປ່ອຍໃຫ້ຊາວຄ້າຂາຍທີ່ເປັນຄົນຕ່າງຊາດ ຮີດໄຖຄົນລາວ ທີ່ເປັນເຈົ້າຂອງປະເທດຊາດ. ຖ້າບໍ່ດັ່ງນັ້ນແລ້ວ ກໍຍາກທີ່ຄົນລາວຈະມີບ່ອນຢືນ ເພາະປະຊາຊົນລາວສ່ວນຫຼາຍແມ່ນທຶນຮອນບໍ່ຫຼາຍ, ປະສົບການການຄ້າຂາຍບໍ່ຫຼາຍ… ຖ້າບໍ່ແມ່ນອຳນາດລັດເປັນຜູ້ເບິ່ງແຍງແລ້ວປະຊາຊົນລາວກໍຈະສູ້ກັບອຳນາດເງິນທຶນຈາກຕ່າງຊາດໄດ້.
ຄັນຊິວ່າແລ້ວ ໂດຍຄວາມຮູ້ສຶກຂອງຄົນລາວ ຄັນເວົ້າເຖິງງານບຸນປະເພນີ ໂດຍສະເພາະແມ່ນບຸນອອກພັນສາ(ຊ່ວງເຮືອທ່າວັດຈັນ) ກັບບຸນທາດຫຼວງ ຮູບພາບ ຫຼື ໄຮໄລ້ໜຶ່ງທີ່ຄົນຈະວາດພາບເຫັນ ນັ້ນແມ່ນຮ້ານຂາຍເຂົ້າຫຼາມ-ປີ້ງໄກ່. ເຂົ້າຫຼາມກັບປີ້ງໄກ່ເປັນດັ່ງຂອງຄູ່ກັນກັບງານບຸນສອງປາງນີ້ ຜູ້ຄົນທີ່ໄປທ່ຽວງານເກືອບທຸກຫຼັງຄາເຮືອນກໍມັກຈະຊື້ເຂົ້າຫຼາມ-ປີ້ງໄກ່ ກັບເມືອກິນຫຼືເປັນຂອງຕ້ອນໃຫ້ຜູ້ບໍ່ໄດ້ໄປ. ຖ້າຫາກງານບຸນສອງປາງດັ່ງກ່າວນີ້ ບໍ່ມີຮ້ານຂາຍເຂົ້າຫຼາມ-ປີ້ງໄກ່ແລ້ວ ມັນຈະຂາດບັນຍາກາດ ບໍ່ມີສີສັນຂອງຄຳວ່າບຸນປະເພນີຂອງຄົນລາວ ມັນຊິກາຍໄປເປັນເທສະການວາງສະແດງສິນຄ້າ ຫຼື ເປັນຕະຫຼາດນັດຫຼາຍກວ່າ. ດັ່ງນັ້ນ, ຮ້ານຂາຍເຂົ້າຫຼາມປີ້ງໄກ່ ນອກຈາກຈະເປັນການຫາລາຍໄດ້ຂອງແມ່ຄ້າທີ່ທຶນຄ້າຂາຍບໍ່ຫຼາຍ ຫຼື ປ້າສີຍາຍສາແລ້ວ ມັນຍັງມີຄຸນຄ່າທາງດ້ານວັດທະນະທຳ ມີຄຸນຄ່າຕໍ່ຈິດໃຈຂອງຄົນລາວ.
ໃນຊຸມປີທີ່ຜ່ານມາ ບັນຫາຄ່າເຊົ່າສະຖານທີ່, ຄ່າຝາກລົດ ແລະຄ່າອາຫານໃນງານບຸນຊ່ວງເຮືອທ່າວັດຈັນ ແລະບຸນທາດຫຼວງ ມັກຈະຖືກສັງຄົມວິພາກວິຈານຢູ່ເປັນປະຈຳ. ພາກສ່ວນທີ່ກ່ຽວຂ້ອງກໍໄດ້ພະຍາຍາມແກ້ໄຂບັນຫາມາຕະຫຼອດ ແຕ່ກໍຍັງເກີດບັນຫາຂຶ້ນມາຈົນໄດ້ ເປັນຕາຄິດ.