ວັນທີ 27 ສິງຫາຜ່ານມານີ້ ທ່ານ ດຣ. ຈັນທະໄລ ໄຊຍະວົງ ຫົວໜ້າຂະແໜງລະບາດວິທະຍາ, ພະແນກສາທາລະສຸກ
ນະຄອນຫຼວງວຽງຈັນ ໄດ້ໃຫ້ສຳພາດຕໍ່ນັກຂ່າວພວກເຮົາວ່າ: ພາຍຫຼັງທີ່ມີການລະບາດຂອງພະຍາດອີໂບລາຢ່າງ
ແຜ່ຫຼາຍຢູ່ທະວີບອາຟຣິກາໃນ 1 ເດືອນຜ່ານມາ, ອົງການອະນາໄມໂລກໄດ້ແຈ້ງເຕືອນໃຫ້ບັນດາປະເທດຕ່າງໆ
ທົ່ວໂລກ ເຝົ້າລະວັງການລະບາດພະຍາດດັ່ງກ່າວ ເພື່ອບໍ່ໃຫ້ມີການລະບາດມາສູ່ປະເທດຂອງຕົນ, ເຊັ່ນດຽວກັນກັບ
ປະເທດລາວພວກເຮົາກໍໄດ້ຮ່ວມກັບອົງການອະນາໄມໂລກ ເຝົ້າລະວັງພະຍາດດັ່ງກ່າວ ເຊຶ່ງໃນຕົ້ນເດືອນສິງຫານີ້
ທາງກະຊວງສາທາລະນະສຸກ ກໍໄດ້ອອກແຈ້ງການເຕືອນໃຫ້ທຸກພະແນກ, ຂະແໜງການໃນຂອບເຂດທົ່ວປະເທດ
ເຝົ້າລະວັງພະຍາດອີໂບລາ, ໂດຍສະເພາະແມ່ນຢູ່ນະຄອນຫຼວງວຽງຈັນ ກະຊວງສາທາລະນະສຸກ ໄດ້ແຕ່ງຕັ້ງໜ່ວຍ
ງານເຝົ້າລະວັງ, ຂະແໜງລະບາດວິທະຍາ, ພະແນກສາທາລະນະສຸກນະຄອນຫຼວງວຽງຈັນ ເອົາໃຈໃສ ເຝົ້າລະວັງພະ
ຍາດດັ່ງກ່າວ ຢູ່ດ່ານຂົວມິດຕະພາບລາວ-ໄທ ແລະ ສະໝາມບິນສາກົນວັດໄຕ, ໂດຍເລັ່ງໃສ່ກວດກາປະຫວັດ ຜູ້ທີ່
ເດີນທາງມາຈາກປະເທດທີ່ມີການລະບາດຂອງພະຍາດດັ່ງກ່າວຄື: ປະເທດກີເນຍ (Guinea), ເຊຣາລີໂອນ (Sierra
Leone), ລີເບີເຣຍ(Liberia) ແລະ ໄນຈີເຣຍ (Nigeria) ເຫຼົ່ານີ້ເປັນຕົ້ນ ເພື່ອເປັນການປ້ອງກັນແຕ່ຫົວທີ ແລະ
ຕອບໂຕ້ທັນເວລາ ຖ້າຫາກພົບກໍລະນີຜູ້ຕິດເຊື້ອ, ເຖິງຢ່າງໃດກໍດີ ຜ່ານຈາກກວດກາເຝົ້າລະວັງຢູ່ສະຖານທີ່ດັ່ງ
ກ່າວແຕ່ກາງເດືອນສິງຫາມາຮອດປັດຈຸບັນ ແມ່ນຍັງບໍ່ພົບກໍລະນີຜູ້ຕິດເຊື້ອ ແລະ ກໍລະນີຜູ້ສົງໃສ, ແຕ່ສາທາກໍ
ຈະສືບຕໍ່ເພີ່ມທະວີເຝົ້າລະວັງຈົນກວ່າພະຍາດຈະເຊົາ.
ທ່ານຫົວໜ້າຂະແໜງລະບາດວິທະຍາ, ພະແນກສາທາລະນະສຸກນະຄອນຫຼວງວຽງຈັນໃຫ້ຮູ້ອີກວ່າ: ມາຮອດປັດ
ຈຸບັນ ຢູ່ທະວີບອາຟຣິກາມີຜູ້ຕິດເຊື້ອພະຍາດອີໂບລາແລ້ວ 2400 ກວ່າ ຄົນ ແລະ ເສຍຊີວິດ ແລ້ວ 1500 ກວ່າຄົນ.
ແຫຼ່ງຂ່າວ: ລາວພັດທະນາ