ເມື່ອວັນທີ 20 ກັນຍາ 2017 ສູນເລວາດາ (Levada Center) ອົງການວິໄຈອິດສະຫຼະໃນນະຄອນຫຼວງມອສໂກ ເປີດເຜີຍຜົນສຳຫຼວດວ່າຊາວຣັດເຊຍສ່ວນຫຼາຍຍັງຄົງຕ້ອງການໃຫ້ ປະທານາທິບໍດີ ວາລາດີເມຍ ປູຕິນ ດຳລົງຕຳແໜ່ງຜູ້ນຳປະເທດຕໍ່ໄປ ແລະ ບາງສ່ວນພ້ອມສະໜັບສະໜູນທາຍາດທາງການເມືອງທີ່ປູຕິນໜູນຫຼັງ

ການສຳຫຼວດໄດ້ເຮັດຂຶ້ນໃນລະຫວ່າງວັນທີ 18-22 ສິງຫາ 2017 ທີ່ຜ່ານມາ ລະບຸວ່າ ມີ 60 ເປີເຊັນຂອງຜູ່ຕອບຄຳຖາມທັງໝົດ 1,600 ຄົນ ໃນ 48 ໜ່ວຍເລືອກຕັ້ງທົ່ວປະເທດຈະລົງຄະແນນສຽງເລືອກ ປູຕິນຫາກມີການເລືອກຕັ້ງປະທານາທິບໍດີໃນເວລານີ້ ແລະ ປະມານ 67 ເປີເຊັນສົ່ງຄຳຕອບໃນແງ່ບວກຕໍ່ຄຳຖາມ “ທ່ານຕ້ອງການໃຫ້ປູຕິນເປັນຜູ້ນຳຣັດເຊຍຫຼັງປີ 2018 ຫຼື ບໍ່?”