ກອງປະຊຸມເປີດກວ້າງປະກອບຄຳເຫັນໃສ່ຮ່າງດຳລັດ ວ່າດ້ວຍການຂຶ້ນທະບຽນເລກໝາຍໂທລະສັບ ຈັດຂຶ້ນວັນທີ 7-8 ກັນຍາ 2017 ຢູ່ສະຖາບັນໄປສະນີ ໂທລະຄົມມະນາຄົມ ແລະ ການສື່ສານ ເປັນປະທານໂດຍທ່ານ ວັນເພັງ ໄຊຍະກອນ ຫົວໜ້າອົງການດັດສົມ ໂທລະຄົມມະນາຄົມ ມີບັນດາຜູ້ຕາງໜ້າຈາກກະຊວງ ອົງການຈັດຕັ້ງ ແລະ ຜູ້ປະກອບການດ້ານໂທລະຄົມມະນາຄົມ ເຂົ້າຮ່ວມ.
ຮ່າງດຳລັດວ່າດ້ວຍການຂຶ້ນທະບຽນເລກໝາຍໂທລະສັບ ປະກອບມີ 11 ໝວດ 50 ມາດຕາ ໄດ້ກຳນົດນະໂຍບາຍຫຼັກການ ເງື່ອນໄຂ ການເປັນຕົວແທນຈຳໜ່າຍ ແລະ ຜູ້ນຳໃຊ້ເລກໝາຍໂທລະສັບ ວິທີການຂຶ້ນທະບຽນ ການຮັກສາຂໍ້ມູນ ການກວດກາ ແລະ ມາດຕະການຕໍ່ຜູ້ລະເມີດ ໝາຍຄວາມວ່າຮ່າງດຳລັດສະບັບນີ້ ມີເປົ້າໝາຍເພື່ອເພີ່ມຄວາມຮັດກຸມໃນການຄຸ້ມຄອງເລກໝາຍໂທລະສັບ ໃຫ້ມີຄວາມຖືກຕ້ອງ-ຊັດເຈນ ແລະ ທັນສະໄໝຍິ່ງຂຶ້ນ ເພື່ອສ້າງຄວາມສະດວກສະບາຍໃນການຕິດຕາມກວດກາ ຜູ້ຊົມໃຊ້ໄດ້ຢ່າງວ່ອງໄວ ຖືກຕ້ອງທັນເວລາ ປັດຈຸບັນ ຮ່າງດຳລັດສະບັບນີ້ພວມຂຸ້ນຂ້ຽວດຳເນີນການປຶກສາຫາລື ແລະ ປະກອບຄຳເຫັນຈາກພາກສ່ວນກ່ຽວຂ້ອງໃຫ້ມີຄວາມຖືກຕ້ອງ ສົມບູນທີ່ສຸດ ແລະ ຄາດວ່າຈະສາມາດຈັດຕັ້ງປະຕິບັດການຂຶ້ນທະບຽນເລກໝາຍໂທລະສັບຄືນໃໝ່ ໃນຂອບເຂດທົ່ວປະເທດ ໃນຕົ້ນປີ 2018 ແລະ ກ່ອນໜ້ານີ້ ລັດຖະບານໄດ້ປະກາດຂຶ້ນທະບຽນໝາຍເລກໂທລະສັບມາແລ້ວ ປີ 2011 ເປັນຕົ້ນມາ.
ແຫລ່ງຂ່າວ: ໜັງສືພິມ ວຽງຈັນໃໝ່