ເມື່ອວັນທີ 7 ກັນຍາ 2017 ຣອຍເຕີເຜີຍແຜ່ຈາກສຳນັກຂ່າວກາງເກົາຫຼີເໜືອ ຫຼື KCNA ເຖິງບັນຍາກາດຈັດງານສະເຫຼີມສະຫຼອງຜົນງານນັກວິທະຍາສາດເກົາຫຼີເໜືອ ໃນນະຄອນຫຼວງປຽງຢາງ ມີປະຊາຊົນ ແລະ ເຈົ້າໜ້າທີ່ເຂົ້າ ຮ່ວມຢືນຕົບມືໃຫ້ຂະບວນແຫ່ນັກວິທະຍາສາດທີ່ຢູ່ເບື້ອງຫຼັງຄວາມສຳເລັດໃນການທົດສອບລະເບີດເອຊບອມ ແລະ ຂີປະນາວຸດຂ້າມທະວີບ
ໃນວັນດຽວກັນນັ້ນ ເກົາຫຼີເໜືອຍັງໄດ້ມີການຖະແຫຼງການຜ່ານຕົວແທນທີ່ເຂົ້າຮ່ວມການປະຊຸມເສດຖະກິດທີ່ເມືອງວາລາດີວອສຕ້ອກ ເຂດຕະເວັນອອກຂອງປະເທດຣັສເຊຍ ໂດຍປະກາດວ່າ ຈະຕອບໂຕ້ສະຫະລັດອາເມລິກາຢ່າງເໝາະສົມ ໃນຂະນະທີ່ສະຫະລັດເອງກໍ່ເດີນໜ້າຜັກດັນມາດຕະການລົງໂທດເກົາຫຼີເໜືອໃຫ້ໜັກກວ່າເກົ່າ ແລະ ຍັງຮວມເຖິງການຢຶດຊັບເງິນທະນາຄານຂອງທ່ານ ຄິມ ຈອງ ອຶນ ຜູ່ນຳສູງສຸດຂອງເກົາຫຼີເໜືອ ແລະ ຫ້າມທ່ານ ຄິມເດີນທາງໄປປະເທດອື່ນ