ປະຈຸບັນພະຍາດຕຸ້ຍເປັນບັນຫາຢ່າງຫລາຍໃນຫລາຍປະເທດ ໂດຍພະຍາດຕຸ້ຍເປັນພະຍາດຊຳເຮື້ອທີ່ອາດເປັນສາເຫດສຳຄັນໃຫ້ເກີດພະຍາດແຊກຊ້ອນຕ່າງໆ ຕາມມາ ເຊັ່ນ ພະຍາດໄຂມັນໃນເລືອດສູງ ພະຍາດຄວາມດັນເລືອດສູງ ພະຍາດເບົາຫວານ ຫລື ພະຍາດຫລອດເລືອດຫົວໃຈ ເປັນຕົ້ນ
ດັ່ງນັ້ນພະຍາດຕຸ້ຍຈຶ່ງຈຳເປັນຕ້ອງໄດ້ຮັບການປິ່ນປົວ ຊຶ່ງການປິ່ນປົວສາມາດເຮັດໄດ້ຫລາຍວິທີ ເຊັ່ນ ການຄວບຄຸມອາຫານ ການອອກກຳລັງກາຍ ການປັບປ່ຽນພຶດຕິກຳການຮັບປະທານອາຫານ ການໃຊ້ຢາປິ່ນປົວ ແລະ ການຜ່າຕັດ ຊຶ່ງປະຈຸບັນພົບວ່າການນຳຢາຫລຸດຄວາມຕຸ້ຍໄປໃຊ້ໃນທາງທີ່ຜິດມີຫລາຍຂຶ້ນ ເນື່ອງຈາກການຊື້ຢາຫລຸດຄວາມຕຸ້ຍສາມາດຫາຊື້ເອງໄດ້ງ່າຍ ໂດຍບໍ່ໄດ້ມີການແນະນຳ ປະຈຸບັນປະຊາຊົນນິຍົມ ຊື້ອາຫານສຳເລັດຮູບ ຫລື ປຸງປະກອບ ອາຫານໃນປະລິມານທີ່ຫລາຍ ເມື່ອຮັບປະທານບໍ່ໝົດກໍນຳໄປເກັບໄວ້ໃນຕູ້ເຢັນ ແລ້ວນຳມາອຸ່ນຮັບປະທານໃນມື້ຕໍ່ໄປ
ອາຫານທີ່ມີການອຸ່ນຊ້ຳໆ ຫລື ຕົ້ມ ເປັນໄລຍະເວລາດົນເກີນ 4ຊົ່ວໂມງຂຶ້ນໄປ ຈະມີໂອກາດເຮັດໃຫ້ຄຸນຄ່າທາງໂພສະນາການ ຫລຸດລົງ ດັ່ງນັ້ນ ຄວນປຸງອາຫານແຕ່ ພໍກິນໃນແຕ່ລະຄາບ ເພາະອາຫານທີ່ປຸງສຸກໃໝ່ ຄຸນຄ່າທາງໂພສະນາການ ຈະມີຫລາຍກວ່າອາຫານທີ່ຜ່ານການອຸ່ນຫລາຍໆເທື່ອ ໂດຍສະເພາະອາຫານປະເພດເປັດ ພະໂລ້ ໝູສາມຊັ້ນ ຊຶ່ງໃນຂະນະປຸງຈະມີການຂ້ຽວດ້ວຍນ້ຳຕານເພື່ອໃຫ້ລົດຊາດທີ່ແຊບຊ້ອຍ
ຢ່າງໃດກໍຕາມ ຂໍ້ຄວນລະວັງຄື ເມື່ອໂປຕີນຈາກເນື້ອສັດຖືກຄວາມຮ້ອນຈາກການຂ້ຽວ ຕົ້ມເປັນເວລາດົນ ອາຫານພວກນີ້ມັກຖືກກວດພົບສານກຸ່ມ ເຮັດເຕີໂລໄຊຄິກເອມີນ ຊຶ່ງເປັນສານທີ່ກໍ່ໃຫ້ເກີດມະເຮັງ ໂດຍແບ່ງໄດ້ເປັນ 2ກຸ່ມ ກຸ່ມທີ່ໜຶ່ງເກີດບ່ອນຄວາມຮ້ອນບໍ່ສູງຫລາຍ ຄືເປັນການລວມຕົວລະຫວ່າງ ຄີເອຕິນີນ ຫລື ຄີເອຕິນ ຊຶ່ງເປັນອົງປະກອບຂອງນ້ຳໃນເນື້ອສັດທີ່ມັກໄຫລອອກມາເວລາເອົາເນື້ອສັດອອກຈາກ ຕູ້ແຊ່ແຂງ ກັບ ສານສີນ້ຳຕານໃນເນື້ອທີ່ຖືກຈືນ ຫລື ຕົ້ມ ຊຶ່ງເອີ້ນສານນີ້ວ່າ ເມນລາຫລີ ແອກເຊິນໂພດັກ ສ່ວນກຸ່ມທີ່ສອງເກີດຈາກຄວາມຮ້ອນຂ້ອນຂ້າງສູງຫລາຍ ຈາກການປ່ຽນແປງຂອງກົດ ອະມິໂນ ໃນຊີ້ນສັດລະຫວ່າງປຸງອາຫານ ເຊັ່ນ ການປິ້ງຫມູ
ອາຫານປະເພດຜັກສົດ ຜັດຜັກ ຜັກລວກ ໜຶ້ງ ຕົ້ມ ຖ້າເຫລືອແລ້ວນຳໄປເກັບໄວ້ຮັບປະທານມື້ຕໍ່ໄປ ຄຸນຄ່າທາງໂພສະນາການ ຈະຫລຸດລົງ ຫາກເກັບຮັກສາບໍ່ດີ ຈຸລິນຊີ ທີ່ປົນເປື້ອນໃນລະຫວ່າງເກັບ ກໍຈະເຮັດໃຫ້ຖອກທ້ອງໄດ້ ສ່ວນການຮັບປະທານຊີ້ນແດງຫລາຍໆ ຈະມີແນວໂນ້ມເຮັດໃຫ້ການຮັບປະທານຜັກ ແລະ ຫມາກໄມ້ຫລຸດລົງ ເຮັດໃຫ້ປ້ອງກັນເນື້ອເຍື່ອທີ່ຖືກທຳລາຍໄປຈາກກະບວນການ oxidation ຫລື ການເກີດອະນຸມູນອິດສະຫລະ ເມື່ອເກີດຂຶ້ນຢ່າງຕໍ່ເນື່ອງກໍຈະເພີ່ມຄວາມສ່ຽງຕໍ່ການເປັນພະຍາດມະເຮັງບາງຊະນິດ ດັ່ງນັ້ນ ຈຶ່ງຄວນກິນຜັກສົດເປັນປະຈຳ ຢ່າງນ້ອຍຄາບລະ 2ຈອງ ເພາະໃນຜັກມີວິຕາມິນ ແຮ່ທາດ ໃຍອາຫານ ລວມທັງສານຕ້ານ ອານຸມູນອິດສະຫລະທີ່ດີຕໍ່ຮ່າງກາຍ
ທັງນີ້ ການປະຕິບັດຕົນໃຫ້ມີສຸກຂະພາບດີ ດ້ວຍການກິນອາຫານທີ່ຖືກຕ້ອງ ທັງປະລິມານ ຄຸນະພາບ ຕາມຫລັກໂພສະນາການເພື່ອສຸຂະພາບທີ່ດີ
- ກິນ ອາຫານໃຫ້ຫລາກຫລາຍຄົບ 5ໝູ່ ໃນປະລິມານທີ່ພຽງພໍກັບຄວາມຕ້ອງການຂອງຮ່າງກາຍ
- ກິນຜັກຊະນິດຕ່າງໆຢ່າງນ້ອຍຄາບລະ 2ຈອງ
- ກິນຫມາກໄມ້ຢ່າງນ້ອຍມື້ລະ 1-2ສ່ວນ ເຊັ່ນ ກ້ວຍນ້ຳ ຫລື ໝາກກ້ຽງ
- ເລືອກວັດຖຸດິບໃນການປຸງອາຫານທີ່ປອດໄພຈາກການປົນເປື້ອນຂອງສານເຄມີ ແລະສິ່ງເຈືອປົນ
- ຫລຸດການກິນອາຫານມັນ ໄດ້ແກ່ ອາຫານຈືນນ້ຳມັນ ເຊັ່ນ ໄກ່ທອດ , ໝູຈືນ ,ອາຫານທີ່ມີ ກະທິ ເຊັ່ນ ແກງກະທິ ຫລີກລ້ຽງການໃຊ້ນ້ຳມັນຈືນຊ້ຳ
- ຫລຸດ ການກິນອາຫານຫວານ
- ຫລຸດການກິນເຄັມ ໂດຍສະເພາະເຄື່ອງປຸງລົດເຄັມ
- ຫລຸດການກິນອາຫານແປຮູບ ຫລີກລ້ຽງອາຫານທີ່ມີສີເກີນຄວາມເປັນສີທຳມະຊາດ ເຊັ່ນ ຊີ້ນສັດ ແປຮູບສີແດງ
- ຫລີກລ້ຽງອາຫານທີ່ປຸງໄວ້ຄ້າງຄືນ
- ເບິ່ງແຍງນ້ຳໜັກໂຕໃຫ້ຢູ່ໃນເກນປົກກະຕິ ຜູ້ຊາຍຮອບແອວບໍ່ເກີນ 90ເຊັນ. ຜູ້ຍິງຮອບແອວບໍ່ເກີນ 80ເຊັນ
- ອອກກຳລັງກາຍທີ່ເໝາະສົມກັບສະພາບຮ່າງກາຍຢ່າງນ້ອຍມື້ລະ 30ນາທີ ອາທິດລະ 5ມື້
- ເຮັດໃຈໃຫ້ສະບາຍ ຄິດບວກສະເໝີ