ປະທານາທິບໍດີອູແກຣນ ປະກາດຍຸບສະພາແລ້ວມື້ວານນີ້ (25 ສິງຫາ 2014) ແລະ ກຽມຈັດການເລືອກຕັ້ງກ່ອນກຳນົດ
ໃນວັນທີ 26 ຕຸລາ ປີນີ້.
ສຳນັກຂ່າວຂອງຕ່າງປະເທດລາຍງານວ່າ ປະທານາທິບໍດີ ເປໂຕຣ ໂປໂຣເຊນໂກ ແຫ່ງອູແກຣນ ປະກາດຍຸບສະພາ ໂດຍ
ຜ່ານຖະແຫຼງການທີ່ຖືກໂພສຕ໌ລົງເທິງເວັບໄຊຂອງທ່ານເອງ ໃນມື້ວັນຈັນ 25 ສິງຫາ 2014 ຜ່ານມານີ້ ພ້ອມກັບຮຽກ
ຮ້ອງໃຫ້ມີການຈັດການເລືອກຕັ້ງລັດຖະສະພາໃໝ່ ໃນວັນທີ 26 ຕຸລາ 2014 ນີ້ ທ່າມກາງສະຖານະການຂອງການຕໍ່ສູ້
ກັບກຸ່ມແບ່ງແຍກດິນແດນທາງພາກຕາເວັນອອກຂອງປະເທດ.
ທ່ານ ໂປໂຣເຊນໂກ ລະບຸໃນຖະແຫຼງການວ່າ ມີຜູ້ແທນຈຳນວນຫຼາຍໃນລັດຖະສະພາ ຣາດາ (Rada) ທີ່ເປັນຜູ້ສະໜັບ
ສະໜູນໂດຍກົງ ຫຼື ສົມຮູ້ຮ່ວມຄິດ ເຊິ່ງເອີ້ນໄດ້ວ່າເປັນພັນທະມິດຂອງກຸ່ມຕິດອາວຸດແບ່ງແຍກດິນແດນ ໂດຍການ
ເຄື່ອນໄຫວຂອງເຂົາໃນເທື່ອນີ້ ໄດ້ສອດຄ່ອງກັບລັດຖະທຳມະນູນຂອງປະເທດ.
ການປະກາດຍຸບສະພາຂອງ ທ່ານ ໂປໂຣເຊນໂກ ເກີດຂຶ້ນພຽງມື້ດຽວ ກ່ອນທີ່ເຂົາກັບປະທານາທິບໍດີ ວາລາດີເມຍ ປູຕິນ
ແຫ່ງຣັດເຊຍ ຈະເຂົ້າຮ່ວມກອງປະຊຸມສຸດຍອດ ເພື່ອຫາທາງຢຸຕິຂໍ້ຂັດແຍ່ງໃນພາກຕາເວັນອອກ ແລະ ຄາດວ່າຈະມີ
ການກົດດັນອູແກຣນໃຫ້ຈົບປັນຫານີ້ ດ້ວຍການເຈລະຈາ ຫາກບໍ່ແມ່ນກຳລັງທະຫານ.
ທັງນີ້ ໃນຊ່ວງເດືອນທີ່ຜ່ານມາ ກອງທັບຂອງລັດຖະບານອູແກຣນ ໄດ້ໂຈມຕີຝ່າຍແບ່ງແຍກດິນແດນຢ່າງໜັກ ແລະ
ສາມາດຍຶດຄືນພື້ນທີ່ທີ່ຖືກຍຶດໄປ ຕັ້ງແຕ່ເດືອນເມສາ ໄດ້ຫຼາຍແຫ່ງ, ແຕ່ການໂຈມຕີດັ່ງກ່າວ ໄດ້ເຮັດໃຫ້ມີພົນລະ
ເຮືອນຈຳນວນຫຼາຍເສຍຊີວິດ ໂດຍຍອດຜູ້ເສຍຊີວິດຈົນເຖິງຂະນະນີ້ ແມ່ນຫຼາຍກ່ວາ 2,000 ຄົນແລ້ວ.