ທາງການແຂວງບໍ່ແກ້ວ ໄດ້ອະນຸຍາດໃຫ້ນັກລົງທຶນຈາກຈີນ ສຳປະທານບໍລິເວນຂົວມິດຕະພາບລາວ-ໄທ ແຫ່ງທີ 4 (ຝັ່ງລາວ) ເພື່ອພັດທະນາດ້ານເສດຖະກິດແລະການທ່ອງທ່ຽວ.
ສຳນັກຂ່າວ ເສດຖະກິດ-ການຄ້າ ເຊິ່ງເປັນສຳນັກຂ່າວທາງການຂອງກະຊວງອຸດສາຫະກຳແລະການຄ້າ ໄດ້ລາຍງານໃນຕອນບ່າຍມື້ນີ້ ວັນທີ 22 ສິງຫາ 2017 ວ່າ: ວັນທີ 18 ສິງຫາ 2017 ທີ່ຜ່ານມາ ຢູ່ທີ່ແຂວງບໍ່ແກ້ວ ໄດ້ມີພິທີເຊັນສັນຍາ ໂຄງການພັດທະນາຕົວເມືອງໃໝ່ຫ້ວຍຊາຍ ແລະພັດທະນາເຂດການຄ້າ-ການທ່ອງທ່ຽວບໍລິເວນສົ້ນຂົວມິດຕະພາບ ລາວ-ໄທ ແຫ່ງທີ 4 ເບື້ອງເມືອງຫ້ວຍຊາຍ ແຂວງບໍ່ແກ້ວ ໃນເນື້ອທີ່ 13 ເຮັກຕາ ດ້ວຍມູນຄ່າການລົງທຶນ 100 ລ້ານໂດລາສະຫະລັດ ໃນໄລຍະເວລາສຳປະທານ 50 ປີ. ຕາງໜ້າອົງການປົກຄອງແຂວງບໍ່ແກ້ວ ແມ່ນທ່ານ ບົວສະຫວາດ ອິນທະວັນ ຫົວໜ້າພະແນກແຜນການແລະການລົງທຶນແຂວງ ແລະ ຝ່າຍນັກລົງທຶນແມ່ນທ່ານ ລານ ຈາເວີຍ ຮອງປະທານກຸ່ມບໍລິສັດພັດທະນາເສດຖະກິດສະເພາະບໍ່ເຕັນລາວ ໂດຍຊ້ອງໜ້າ ທ່ານ ຄຳກິ່ງ ເອືອຍມະນີຮັກ ຮອງເຈົ້າແຂວງແຂວງບໍ່ແກ້ວ ແລະພາກສ່ວນທີ່ກ່ຽວຂ້ອງທັງສອງຝ່າຍເຂົ້າຮ່ວມ.
ຈຸດປະສົງກໍເພື່ອພັດທະນາເສດຖະກິດຂອງແຂວງແບບຍືນຍົງ ໂດຍສະເພາະແມ່ນການພັດທະນາບໍລິເວນສົ້ນຂົວມິດຕະພາບ ແຫ່ງທີ 4 (ຫ້ວຍຊາຍ-ຊຽງຂອງ) ເຊັ່ນ ສ້າງສູນການຄ້າ, ຮ້ານຄ້າປອດພາສີ, ສ້າງສູນຈຳໜ່າຍສິນຄ້ານຳເຂົ້າແລະສົ່ງອອກ, ສ້າງສູນແລກປ່ຽນເງິນຕາ, ສ້າງສວນສາທາລະນະ, ຈຸດທ່ອງທ່ຽວຊົມວິວ, ທ່າເຮືອ, ໂຮງແຮມ ແລະຮ້ານອາຫານ, ສ້າງສະຖານີຮັບ-ສົ່ງໂດຍສານສາກົນ ແລະສ້າງສາງສິນຄ້າປອດພາສີ.
ແຫຼ່ງຂ່າວ: ເສດຖະກິດ-ການຄ້າ