ຫ້ອງການ ທະນາຄານແຫ່ງ ສປປ ລາວ ໄດ້ອອກແຈ້ງການ ສະບັບເລກທີ 394/ຫກ ລົງວັນທີ 14 ສິງຫາ 2014 ຜ່ານມາ
ເຖິງພໍ່ແມ່ປະຊາຊົນຊາວນະຄອນຫຼວງວຽງຈັນ ຕະຫຼອດເຖິງມວນຊົນທົ່ວໄປໃນຂອບເຂດທົ່ວປະເທດ ເລື່ອງທະນະບັດ
ປອມປະເພດໃບຕ່າງໆ ເພື່ອແຈ້ງເຕືອນໃຫ້ພໍ່ແມ່ປະຊາຊົນ ໄດ້ມີສະຕິລະວັງໂຕຫຼາຍຂຶ້ນ ໃນການຈັບຈ່າຍຊື້ຂາຍ.
ໂດຍເນື້ອໃນຂອງຂອງແຈ້ງການດັ່ງກ່າວໄດ້ລະບຸວ່າ: ປະຈຸບັນໄດ້ມີກຸ່ມຄົນບໍ່ດີຈຳນວນໜຶ່ງ ລັກລອບປອມແປງທະນະ
ບັດປະເພດໃບ 100,000 ກີບ; ໃບ 50,000 ກີບ; ໃບ 20,000 ກີບ ແລະ ໃບ 10,000 ກີບ ອອກມາຈໍລະຈອນໃຊ້ຈ່າຍຢູ່
ໃນສັງຄົມເປັນຈຳນວນຫຼວງຫຼາຍ ຕາມທີ່ເຈົ້າໜ້າທີ່ໄດ້ກວດເຫັນ ແລະ ໄດ້ມີການຈັບກຸມຜູ້ກະທຳຜິດຈຳນວນໜຶ່ງ
ມາລົງໂທດຕາມລະບຽບກົດໝາຍແລ້ວ.
ຮູບແບບທະນະບັດປອມມີລັກສະນະ ກັອບປີ້ ສີໃສ່ເຈ້ຍ A4 ທຳມະດາ ຖ້າຫາກສັງເກດ ແລະ ຈຳແນກຈະເຫັນໄດ້ງ່າຍ
ກ່ອນຈະຮັບ – ຈ່າຍເງິນສົດໃນແຕ່ລະຄັ້ງ ຄວນກວດກາເບິ່ງໃຫ້ລະອຽດ ເພື່ອຫຼີກລ່ຽງການຮັບເອົາເງິນປອມເຂົ້າມາ
ໃນຄອບຄອງ.
ຢູ່ໃນແຈ້ງການຍັງໄດ້ລະບຸເຕືອນ ໄປຍັງຜູ້ທີ່ກະທຳຜິດອີກວ່າ: ຜູ້ທີ່ປອມແປງທະນະບັດ ແມ່ນຜິດຕໍ່ກົດໝາຍທະນາ
ຄານແຫ່ງ ສປປ ລາວ ມາດຕາ 60 ແລະ ກົດໝາຍອາຍາ ມາດຕາ 63, ມາດຕາ 113 ອັນໄດ້ເຮັດໃຫ້ມວນຊົນທັງພາຍ
ໃນ ແລະ ຕ່າງປະເທດ ຂາດຄວາມເຊື່ອໝັ້ນໃນການຖື ແລະ ຮັກສາເງິນກີບໄວ້ໃນຄອບຄອງ.
ສະນັ້ນ, ເພື່ອຈະບໍ່ຕົກເປັນເຫຍື່ອໃຫ້ແກ່ກຸ່ມຄົນບໍ່ດີ ຈະຕ້ອງໄດ້ມີສະຕິລະວັງໂຕ ກວດກາເບິ່ງເງິນແຕ່ລະປະເພດໃບ
ຢ່າງລະອຽດຄັກແນ່ເສຍກ່ອນ ເມື່ອຖືກສົງໄສວ່າເປັນເງິນປອມ ຕ້ອງແຈ້ງຕໍ່ເຈົ້າໜ້າທີ່ຕຳຫຼວດ ຫຼື ປກສ ບ້ານ ເພື່ອ
ດຳເນີນຄະດີຕໍ່ຜູ້ກະທຳຜິດຕາມລະບຽບກົດໝາຍ.