ສຳນັກຂ່າວຣອຍເຕີ້ ລາຍງານໃນວັນທີ 2 ສິງຫາຜ່ານມານີ້ວ່າ ຕາມການເປີດເຜີຍຂອງກະຊວງການຄ້າກຳປູເຈຍ ລັດຖະມົນຕີກະຊວງການຄ້າກຳປູເຈຍ ແລະ ບັງກະລາເດສ ໄດ້ບັນລຸຂໍ້ຕົກລົງຊື້ຂາຍເຂົ້າຮ່ວມກັນ ໂດຍບັງກະລາເດສຕົກລົງຈະຊື້ເຂົ້າຈາກກຳປູເຈຍ ຈຳນວນ 1 ລ້ານໂຕນ ໃນໄລຍະ 5 ປີ, ຊຶ່ງຈະເລີ່ມມີການສົ່ງອອກຂາຍ ປະມານເດືອນຕຸລາປີນີ້ ຫລັງຈາກມີການລົງນາມ ໃນຂໍ້ຕົກລົງດັ່ງກ່າວ.

ທັງນີ້, ບັງກະລາເດສ ເປັນຜູ້ຜະລິດເຂົ້າລາຍໃຫຍ່ອັນດັບທີ 4 ຂອງໂລກ ແຕ່ປັດຈຸບັນໄດ້ກາຍເປັນຜູ້ນຳເຂົ້າເຂົ້າສານລາຍໃຫຍ່ ພາຍຫລັງເກີດນ້ຳຖ້ວມຢ່າງໜັກໜ່ວງ ເມື່ອເດືອນເມສາທີ່ຜ່ານມາ ສົ່ງຜົນເຮັດໃຫ້ຜົນຜະລິດເຂົ້າພາຍໃນປະເທດຫລຸດລົງ ແລະ ປະລິມານເຂົ້າສຳຮອງຂອງປະເທດ ກໍຫລຸດລົງ ແລະ ມີລາຄາເພີ່ມສູງຂຶ້ນ.