ສຳນັກຂ່າວຣອຍເຕີ້ ລາຍງານໃນວັນທີ 24 ກໍລະກົດຜ່ານມານີ້ວ່າ ເຈົ້າໜ້າທີ່ແຂວງບິງດິ່ງ ຂອງຫວຽດນາມໄດ້ລະບຸ ເຮືອຫາປາຂອງຊາວປະມົງຫວຽດນາມ ຊຶ່ງລອຍລຳໃນທະເລຈີນໃຕ້ ຫ່າງຈາກເກາະກົງດາວ (Con Dao) ທາງຕາເວັນອອກສຽງໃຕ້ຂອງປະເທດ ປະມານ 245 ກິໂລແມັດ ໄດ້ຖືກທະຫານເຮືອຂອງອິນໂດເນເຊຍຍິງ ໃນມື້ວັນເສົາທີ 22 ກໍລະກົດຜ່ານມາ ສົ່ງຜົນເຮັດໃຫ້ມີຜູ້ໄດ້ຮັບບາດເຈັບ 4 ຄົນ ໃນນັ້ນ ບາດເຈັບສາຫັດ 2 ຄົນ ໂດຍທັງໝົດໄດ້ຖືກນຳສົ່ງໄປປິ່ນປົວຢູ່ໂຮງໝໍແລ້ວ.
ແນວໃດກໍຕາມ, ເຈົ້າໜ້າທີ່ກະຊວງການປະມົງ ແລະ ກິດຈະການທາງທະເລຂອງອິນໂດເນເຊຍ ໄດ້ອອກມາລະບຸວ່າ ບໍ່ໄດ້ຮັບຊາບກ່ຽວກັບເຫດການດັ່ງກ່າວຕາມຖືກກ່າວຫາ ແລະ ຝ່າຍກອງທັບເຮືອອິນໂດເນເຊຍ ກໍຍັງບໍ່ທັນໄດ້ລາຍງານ ຫລື ໃຫ້ຄຳຄິດເຫັນໃດໆໃນເລື່ອງນີ້.
ທັງນີ້, ຂໍ້ຂັດແຍ່ງກ່ຽວກັບສິດທິໃນການຫາປາ ແລະ ຂຸດສຳຫລວດນ້ຳມັນ ພາຍໃນທະເລຈີນໃຕ້ ໄດ້ກາຍເປັນບັນຫາຊຶ່ງທັງຝ່າຍຈີນ, ຫວຽດນາມ, ບຣູໄນ, ມາເລເຊຍ, ຟິລິບປິນ, ໄຕ້ຫວັນ ແລະ ອິນໂດເນເຊຍ ຕ່າງກໍພາກັນອ້າງອະທິປະໄຕ.