ຂປລ. ວັນທີ 12 ກໍລະກົດ 2017 ນີ້ ທີ່ດ່ານດາກຕະອອກ, ເມືອງດາກຈຶງ, ແຂວງເຊກອງ ໄດ້ຈັດພິທີມອບ-ຮັບ ແລະ ເປີດນຳໃຊ້ ໂຄງການກໍ່ສ້າງດ່ານດາກຕະອອກ, ເມືອງດາກຈຶງ, ແຂວງເຊກອງ, ໃຫ້ກຽດເຂົ້າຮ່ວມໂດຍ ທ່ານ ສີດາ ສຸວັນນະສາຍ ຮອງເຈົ້າແຂວງໆເຊກອງ, ທ່ານ ຮວ່ຽນ ແຄ່ງ ຕວ່ານ ຮອງປະທານຄະນະກຳມະການປະຊາຊົນແຂວງກວາງນາມ, ມີທ່ານ ຄຳແສງ ພົມມາແສງ ຫົວໜ້າກົງສຸນໃຫຍ່ ແຫ່ງ ສປປ ລາວ ປະຈຳນະຄອນດາໜັງ ພ້ອມຂະແໜງການກ່ຽວຂ້ອງທັງ 2 ຝ່າຍເຂົ້າຮ່ວມ.
ທ່ານ ຫງວຽນ ຫິວ ຖັງ ຫົວໜ້າກອງບັນຊາການທະຫານຊາຍແດນ ແຂວງກວ່າງນາມ ໄດ້ລາຍງານວ່າ: ໂຄງການກໍ່ສ້າງດ່ານດາກຕະອອກ,ເມືອງດາກຈຶງ ແຂວງເຊກອງ ແມ່ນໂຄງການຮ່ວມມືລະຫວ່າງ ລັດຖະບານ ສປປ ລາວ ແລະ ລັດຖະບານ ສສ ຫວຽດນາມ, ໂດຍແມ່ນທຶນຊ່ວຍເຫລືອລ້າ 100% ຈາກລັດຖະບານຫວຽດນາມ ໄດ້ອານຸມັດທຶນໃນເດືອນ ພຶດສະພາ ປີ 2014 ແລະ ມອບໃຫ້ແຂວງເຊກອງເປັນຜູ້ປະສານງານ,ຄຸ້ມຄອງໂຄງການຮ່ວມກັບ ສສ ຫວຽດນາມ, ໂດຍສະເພາະກອງບັນຊາການທະຫານຊາຍແດນ ແຂວງກວາງນາມທີ່ເປັນເຈົ້າຂອງໂຄງການ.
ໂຄງການກໍ່ສ້າງດ່ານ ດາກຕະອອກ ໄດ້ເລີ່ມລົງມືກໍ່ສ້າງມາແຕ່ເດືອນທັນວາປີ 2014 ໂດຍ ແມ່ນບໍລິສັດດ້າຍຮົງຟຸກ ເປັນຜູ້ຮັບ ເໝົາກໍ່ສ້າງມູນຄ່າທັງໝົດ 48 ຕື້ກວ່າດົ້ງ,ມີໄລຍະການກໍ່ສ້າງ 2 ປີ, ເປັນປະເພດອາຄານ 2 ຊັ້ນຊົງລາວ ທີ່ມີເອກະລັກສະເພາະ ມີເນື້ອທີ່ໂຄງການທັງໝົດ 1.300 ແມັດ ເຊິ່ງປະກອບມີ ວຽກດິນຕັດດິນຖົມ, ວຽກອາຄານດ່ານ, ວຽກກໍ່ສ້າງຫ້ອງນ້ຳລວມນອກອາຄານ, ວຽກພາກສະໜາມ-ສວນດອກໄມ້, ລະບົບເສັ້ນທາງເບຕົງ ແລະ ຮອງລະບາຍນ້ຳ, ວຽກຕິດຕັ້ງໝໍ້ແປງ ແລະ ລະບົບໄຟຟ້າ-ໄຟເຍືອງທາງ ແລະ ວຽກກໍ່ສ້າງປ່ອງກວດກາຄົນເຂົ້າ-ອອກເມືອງ, ມາຮອດປະຈຸບັນໜ້າວຽກທັງໝົດ ແມ່ນກໍ່ສ້າງສຳເລັດແລ້ວ 100%.ໂຄງການນີ້ແມ່ນມີຄວາມໝາຍ ຄວາມສຳຄັນເປັນຢ່າງຍິ່ງລະຫວ່າງ ສອງຊາດລາວ-ຫວຽດນາມເພື່ອເປັນການອຳນວຍຄວາມສະດວກ ໃຫ້ແກ່ປະຊາຊົນທັງສອງປະເທດ,ເວົ້າລວມ,ເວົ້າສະເພາະແມ່ນ2 ແຂວງເຊກອງ-ກວາງນາມ ໃນການໄປມາຫາສູ່ ແລກປ່ຽນຊື້ຂາຍສິນຄ້າງນຳກັນ, ພ້ອມທັງເສີມຂະຫຍາຍ ການພົວພັນຮ່ວມມືຮອບດ້ານ ແລະ ຮັດແໜ້ນສາຍພົວພັນມິດຕະພາບ,ຄວາມສາມັກຄີແບບພິດເສດຂອງ 2 ຊາດໃຫ້ຮຸ່ງເຮືອງສີວິໄລໄປພ້ອມໆກັນ,ທັງເປັນການກະກຽມຂຳນັບຮັບຕ້ອນ ວັນເຊັນສົນທິສັນຍາຮ່ວມມືຮອບດ້ານ ລາວ-ຫວຽດນາມ ຄົບຮອບ 40 ປີ (18 ກໍລະກົດ 1977-18 ກໍລະກົດ 2017 ) ແລະ ວັນສ້າງຕັ້ງສາຍພົວພັນການທູດ ລາວ-ຫວຽດນາມ ຄົບຮອບ 55 ປີ ( 5 ກັນຍາ1962-5 ກັນາຍາ 2017 ) ໃຫ້ເປັນຂະບວນຟົດຟື້ນ.
ພ້ອມນີ້ ສອງຝ່າຍໂດຍ ທ່ານ ສີດາ ສຸວັນນະສາຍ ,ຮອງເຈົ້າແຂວງໆເຊກອງ, ທ່ານ ຮວ່ຽນ ແຄ່ງ ຕວ່ານ ຮອງປະທານຄະນະກຳມະການປະຊາຊົນແຂວງ ກວາງນາມໄດ້ຮ່ວມເຊັນບົດບັນທຶກຈໍານວນໜຶ່ງ.
ແຫລ່ງຂ່າວ: ຂປລ