ສຳນັກຂ່າວຕ່າງປະເທດ ລາຍງານໃນວັນທີ 12 ກໍລະກົດນີ້ວ່າ ສຳນັກງານບໍລິການດ້ານການສົ່ງອອກເຂົ້າຂອງກຳປູເຈຍ ລະບຸ ພາຍໃນ 6 ເດືອນຕົ້ນປີນີ້ ສາມາດສົ່ງອອກເຂົ້າຂາຍຕ່າງປະເທດໄດ້ແລ້ວ 288,562 ໂຕນ ເພີ່ມຂຶ້ນ 7.6% ເມື່ອທຽບກັບໄລຍະດຽວກັນຂອງປີກາຍນີ້ ຊຶ່ງຕະຫລາດລາຍໃຫຍ່ຍັງຄົງແມ່ນຈີນ ຊຶ່ງມີຍອດການຊື້ເຂົ້າຂອງກຳປູເຈຍກວມ 94,720 ໂຕນ.

ສະມາພັນເຂົ້າກຳປູເຈຍ (CRF) ໄດ້ລະບຸວ່າ ການສົ່ງອອກເຂົ້າປີນີ້ມີການຂະຫຍາຍຕົວເພີ່ມຂຶ້ນ ສະທ້ອນໃຫ້ເຫັນເຖິງການເຕີບໂຕ ໃນສັກກະຍະພາບຂອງປະເທດ ເຖິງແມ່ນຕະຫລາດໂລກຈະມີການແຂ່ງຂັນກັນກໍຕາມ, ສະເພາະປີກາຍນີ້ ກຳປູເຈຍປະສົບກັບສະພາວະແຫ້ງແລ້ງ ແຕ່ກໍຍັງສົ່ງອອກເຂົ້າໄດ້ທັງໝົດ 542,144 ໂຕນ ແລະ ໃນປີນີ້ ຄາດວ່າຈະສາມາດຜະລິດເຂົ້າໄດ້ເຖິງ 1 ລ້ານໂຕນ ເນື່ອງຈາກຝົນຕົກຢ່າງພຽງພໍ.