ສຳນັກຂ່າວຊິນຮວາ ລາຍງານໃນວັນທີ 4 ກໍລະກົດຜ່ານມານີ້ວ່າ ທາງການນະຄອນຫລວງຮາໂນ້ຍ ສສ ຫວຽດນາມ ຈະນຳໃຊ້ມາດຕະການຫ້າມບໍ່ໃຫ້ລົດຈັກແລ່ນໃນເຂດຕົວເມືອງ ນັບຕັ້ງແຕ່ປີ 2030 ເປັນຕົ້ນໄປ ເພື່ອແກ້ໄຂບັນຫາການຈະລາຈອນແອອັດ ແລະ ມົນລະພິດ ໂດຍຄະນະກຳມະການປະຊາຊົນ ນະຄອນຫລວງຮາໂນ້ຍ ໄດ້ມີມະຕິຕົກລົງໃນວັນທີ 4 ກໍລະກົດຜ່ານມານີ້.

ມາດຕະການດັ່ງກ່າວນີ້ ຈະມີການຫ້າມລົດຈັກແລ່ນຕາມເຂດເມືອງຕ່າງໆຂອງຮາໂນ້ຍ ພ້ອມດຽວກັນນັ້ນ ລົດໃຫຍ່ກໍຈະຖືກຫ້າມ ຫລື ອະນຸຍາດໃຫ້ແລ່ນໃນບາງເຂດ ຫລື ບາງໄລຍະເວລາທີ່ກຳນົດ, ທັງນີ້ ນະຄອນຫລວງຮາໂນ້ຍ ມີປະຊາກອນປະມານ 7.6 ລ້ານຄົນ ແລະ ມີລົດຈັກພາຍໃນເມືອງຫລາຍກວ່າ 5 ລ້ານຄັນ ໃນຂະນະທີ່ລົດໃຫຍ່ມີປະມານ 500,000 ຄັນ ຊຶ່ງເຈົ້າໜ້າທີ່ລະບຸວ່າ ຍອດຍານພາຫະນະໃນເມືອງ ກຳລັງເພີ່ມຈຳນວນຂຶ້ນຢ່າງໜ້າຕົກໃຈ ສົ່ງຜົນເຮັດໃຫ້ເກີດບັນຫາການສັນຈອນແອອັດ ແລະ ມົນລະພິດທາງອາກາດທີ່ຮຸນແຮງຂຶ້ນ.

ປັດຈຸບັນມີບໍລິການລົດໂດຍສານສາທາລະນະ ພາຍໃນນະຄອນຫລວງຮາໂນ້ຍ ກວມເອົາພຽງແຕ່ 12% ເທົ່ານັ້ນ ຊຶ່ງທາງການໄດ້ວາງແຜນ ຈະເພີ່ມອັດຕາການຄວບຄຸມໃຫ້ເຖິງ 50% ພາຍໃນປີ 2030 ໃນຂະນະທີ່ການກໍ່ສ້າງລົດໄຟຟ້າສາຍທຳອິດຂອງເມືອງ ກໍມີກຳນົດຈະເລີ່ມເປີດໃຫ້ບໍລິການໃນປີໜ້ານີ້.