ເຫດການຢືດໄມ້ດັ່ງກ່າວນີ້ເກີດຂຶ້ນໃນ 13: 30 ນາທີ ຂອງວັນທີ 16 ມິຖຸນາ 2017 ຜ່ານມານີ້ ໂດຍມີພົນລະເມືອງດີລາຍງານຂໍ້ມູນການເຄື່ອນໄຫວຕໍ່ເຈົ້າໜ້າທີ່ໃນເຂດເສດຖະກິດສະເພາະບໍ່ເຕັນແດນງາມຈິ່ງໄດ້ສະກັດຈັບຢູ່ດ່ານໃນຂະນະທີ່ຂະບວນລົດກຳລັງຂົນໄມ້ອອກໄປຈີນລວມ 6 ຄັນເປັນລົດບັນທຸກທັງໝົດ ຈາກນັ້ນເຈົ້າໜ້າທີ່ໄດ້ເຂົ້າກວດຄົ້ນພາຍໃນລົດພົບເຫັນໄມ້ຈຳນວນຫຼາຍຊຸກເຊື່ອງຢູ່ມີນ້ຳໜັກລວມ 115.730 ກິໂລ ຫຼືເທົ່າກັບ 96.245 ແມັດກ້ອນ ລ້ວນບໍ່ມີເອກະສານການສົ່ງອອກທີ່ຖືກຕ້ອງ ໃນນັ້ນມີທັງໄມ້ດູ້ທີ່ແປຮູບແລ້ວ, ໄມ້ທີ່ຍັງເປີດທ່ອນ ແລະເປັນແຜ່ນໃຫຍ່.
ພາຍຫຼັງກວດພົບໄມ້ເປັນຈຳນວນຫຼາຍຄືດັ່ງກ່າວນີ້ທາງເຈົ້າໜ້າທີ່ແມ່ນໄດ້ກັກຕົວໂຊເຟີລົດຊື່ທ້າວ ເກ ອາຍຸ 32 ປີຢູ່ບ້ານດອນໄຊ ເມືອງໄຊແຂວງອຸດົມໄຊ ຊຶ່ງໃຫ້ການວ່າເປັນພຽງຜູ້ຮັບຈ້າງຂົນສົ່ງໄມ້ໃນລາຄາ 3 ລ້ານກີບຕໍ່ຄັນ ເພື່ອໄປສົ່ງໃຫ້ນາຍຈ້າງເປັນຈີນບໍ່ຮູ້ຊື່ ແລະທີ່ຢູ່ ແຕ່ມີນາຍໜ້າລາວສອງຄົນເປັນຜູ້ອຳນວຍຄວາມສະດວກໃຫ້ສາມາດເອົາໄມ້ອອກຈາກດ່ານໄດ້.
ຄະດີນີ້ເຫັນວ່າມີຄວາມກ່ຽວໂຍງກັບຫຼາຍຄົນຖ້າເປັນໄປຕາມໂຊເຟີລົດໃຫ້ການແມ່ນຜູ້ຖືກຈັບໄດ້ເປັນພຽງປາຍແຖວ ສ່ວນຜູ້ຢູ່ຫົວແຖວ ເຈົ້າໜ້າທີ່ຕ້ອງໄດ້ສືບສາວຕໍ່ໄປອີກ.
ແຫລ່ງຂ່າວ: ລາວອັບເດດ