ເມື່ອວັນທີ 13 ມິຖຸນາ 2017 ທີ່ຜ່ານມານີ້ ທ່ານ ນາງ ປານີ ຢາທໍ່ຕູ້ ປະທານສະ ພາແຫ່ງຊາດ ແຫ່ງ ສປປ ລາວ ໄດ້ໃຫ້ກຽດຕ້ອນຮັບ ການເຂົ້າຢ້ຽມຂ່ຳນັບຂອງ ທ່ານ Ja Yampathy Wickramaratne ປະທານຄະນະມິດຕະພາບ ລັດຖະສະພາ ສີລັງກາ-ລາວ, ພ້ອມດ້ວຍຄະນະ ໃນໂອ ກາດເດີນທາງ ມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນລະຫວ່າງ ວັນທີ 12-15 ມິຖຸນາ 2017.
ໃນໂອກາດດັ່ງກ່າວ, ທ່ານ ນາງ ປານີ ຢາທໍ່ຕູ້ ໄດ້ສະແດງ ຄວາມຍ້ອງຍໍຊົມເຊີຍ, ຍິນດີຕ້ອນຮັບຕໍ່ທ່ານ Ja Yampathy Wickramaratneພ້ອມດ້ວຍຄະນະ ທີ່ໄດ້ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນຄັ້ງນີ້, ຊຶ່ງຖືເປັນການ ປະກອບສ່ວນສຳຄັນ ເຂົ້າໃນການຮັດແໜ້ນສາຍພົວພັນມິດຕະພາບ ແລະ ການຮ່ວມມື ທີ່ມີໝາກມີຜົນ ລະຫວ່າງ ສປປ ລາວ ແລະ ປະເທດ ສີລັງກາ ໂດຍສະເພາະ ລະຫວ່າງ ສອງອົງການນິຕິບັນຍັດ.
ພ້ອມດຽວກັນນີ້, ທ່ານ Ja Yampathy Wickramaratne ກໍໄດ້ສະແດງ ຄວາມຂອບໃຈຕໍ່ ທ່ານ ປະທານສະພາແຫ່ງຊາດ ທີ່ໄດ້ສະຫລະເວລາອັນມີຄ່າ ໃຫ້ການຕ້ອນຮັບຢ່າງອົບອຸ່ນ ໃນຄັ້ງນີ້, ພ້ອມທັງ ໄດ້ແຈ້ງຈຸດປະສົງ ຂອງການເດີນທາງ ມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນຄັ້ງນີ້ ໃຫ້ ທ່ານປະທານ ສະພາແຫ່ງຊາດ ຮັບຊາບຕື່ມອີກ.
ໃນວັນດຽວກັນ, ສອງຄະນະມິດຕະພາບ ລັດຖະສະພາ ລາວ-ສີລັງກາ ແລະ ສີລັງກາ-ລາວ ກໍໄດ້ມີການ ພົບປະສອງຝ່າຍ ເພື່ອເສີມຂະຫຍາຍສາຍພົວພັນ ແລະ ການຮ່ວມມື ລະຫວ່າງ ສະພາແຫ່ງຊາດ ແຫ່ງ ສປປ ລາວ ແລະ ລັດຖະ ສະພາປະເທດ ສີລັງກາ ກໍຄື ສອງຄະນະ ມິດຕະພາບດັ່ງກ່າວ, ໃຫ້ໄດ້ຮັບການພັດທະນາ. ພ້ອມນີ້, ຍັງໄດ້ມີການແລກ ປ່ຽນບົດຮຽນ ແລະ ທິດທາງການພົວພັນຮ່ວມມືຕ່າງໆ ລະຫວ່າງ ສອງຄະນະມິດຕະພາບ ລັດຖະສະພາ ລາວ-ສີລັງກາ ແລະ ສີລັງກາ-ລາວ ທີ່ສອງຝ່າຍ ມີຄວາມສົນໃຈຮ່ວມກັນ.
ຮຽບຮຽງຂ່າວ: ສຸກສະຫວັນ
ຮູບປະກອບຂ່າວ: ສະຫວາດ