ຂ່າວການກໍ່ສ້າງຫໍສະພາແຫ່ງຊາດ ຖືເປັນຂ່າວໜຶ່ງທີ່ປະຊາຊົນລາວໃຫ້ຄວາມສົນໃຈຫຼາຍທີ່ສຸດໃນ 6 ເດືອນຕົ້ນປີ 2017 ກໍວ່າໄດ້ ນັ້ນສະແດງໃຫ້ເຫັນວ່າ ປະຊາຊົນລາວບໍ່ໄດ້ຫ່າງເຫີນຈາກວຽກບ້ານການເມືອງ ຊໍ້າບໍ່ພໍຍັງໄດ້ຕິດຕາມທຸກການເຄື່ອນໄຫວຂອງພັກແລະລັດຖະບານລາວຢູ່ທຸກບາດຍ່າງ ຖ້າການເຄື່ອນໄຫວໃດເຫັນວ່າເຂົ້າທ່າ ປະຊາຊົນກໍພ້ອມພາກັນຍ້ອງຍໍຊົມເຊີຍອຶກກະທຶກຄຶກໂຄມ ໃນຂະນະດຽວກັນປະຊາຊົນລາວກໍຍັງໄດ້ສະແດງຄຳຄິດເຫັນຕໍ່ບາງການເຄື່ອນໄຫວເຊັ່ນດຽວກັນ ເພາະຖືວ່າທຸກຄົນເປັນເຈົ້າຂອງປະເທດຊາດ ທຸກຄົນຈຶ່ງຄວນຈະຕ້ອງມີຄຳຄິດຄຳເຫັນຕໍ່ວຽກບ້ານການເມືອງຂອງຕົນ.
ດຣາມ່າເລື່ອງຫໍສະພາແຫ່ງຊາດ ໂດຍສະຫຼຸບແມ່ນປະຊາຊົນໄດ້ສົນໃຈ 2 ບັນຫາຫຼັກໆ ຄື ບັນຫາທີໜຶ່ງ ທີ່ເປັນບັນຫາຕົ້ນຕໍ ແມ່ນປະຊາຊົນສົນໃຈເລື່ອງທີ່ມາຂອງເງິນທີ່ຈະມາສ້າງ ປະຊາຊົນສ່ວນຫຼາຍມີທັດສະນະວ່າ ຢາກໃຫ້ເປັນເງິນງົບປະມານຈາກພາຍໃນ ເນື່ອງຈາກວ່າ ຫໍສະພາແຫ່ງຊາດ ເປັນດັ່ງເຄື່ອງໝາຍຢືນຢັນເຖິງຄວາມເປັນຊາດ ຄວາມເປັນອິດສະຫຼະພາບ ແລະອະທິປະໄຕ ຂອງປະຊາຊົນລາວ ກໍຄືຊາດລາວ ເປັນບ່ອນຕັດສິນຊະຕາກຳຂອງຊາດ, ສ່ວນເງິນຊ່ວຍເຫຼືອຈາກຕ່າງປະເທດ ກໍອາດຈະເອົາລົງໄປໃສ່ການພັດທະນາຖະໜົນຫົນທາງ, ໂຮງໝໍ, ໂຮງຮຽນ ຫຼືພື້ນຖານການຜະລິດອື່ນໆຫຼາຍກວ່າ. ສ່ວນບັນຫາທີສອງ ນັ້ນແມ່ນຮູບແບບອາຄານຫໍສະພາແຫ່ງຊາດນັ້ນ ເປັນບັນຫາຮອງລົງມາທີ່ປະຊາຊົນໃຫ້ຄວາມສົນໃຈ ເຊິ່ງສ່ວນຫຼາຍແລ້ວແມ່ນເຫັນດີເຫັນພ້ອມກັບຮູບແບບທີ່ຖືກເປີດເຜີຍໄປໃນກ່ອນໜ້ານັ້ນ ແຕ່ກໍຍັງມີປະຊາຊົນສ່ວນໜຶ່ງທີ່ເຫັນວ່າ ຮູບແບບຫໍສະພາແຫ່ງຊາດຍັງມີລັກສະນະທຳມະດາ ຍັງບໍ່ໂດດເດັ່ນ ຫຼືໜ້າເກັງຂາມເທົ່າທີ່ຄວນ.
ຫຼ້າສຸດມື້ນີ້, ວັນທີ 9 ມິຖຸນາ ເພຈສະໜັບສະໜຸນທ່ານນາຍົກໄດ້ເຜີຍແພ່ຮູບພາບ ທີ່ບອກວ່າເປັນໜຶ່ງໃນບັນດາແບບອາຄານສະພາແຫ່ງຊາດ ທີ່ສົ່ງເຂົ້າປະກວດ ແຕ່ບໍ່ຜ່ານຄວາມເປັນດີຂອງຄະນະກຳມະການຄັດເລືອກ. ແຕ່ພັດມີປະຊາຊົນຈຳນວນຫຼວງຫຼາຍເຂົ້າມາສະແດງຄຳຄິດເຫັນວ່າ ຮູບແບບດັ່ງກ່າວມີຄວາມເຄັ່ງຂຶມ ຍິ່ງໃຫຍ່ ເບິ່ງຊົງພະລັງ. ໃນຂະນະທີ່ຫຼາຍຄົນກໍໃຫ້ທັດສະນະວ່າ ຮູບແບບທີ່ບໍ່ຖືກເລືອກນີ້ ເບິ່ງຄືທັນສະໄໝຢູ່ ເພາະເປັນຮູບຊົງສະຖາປະນິກສະໄໝໃໝ່ໃນປັດຈຸບັນ ເຊິ່ງຄາດວ່າອີກບໍ່ດົນຮູບແບບການກໍ່ສ້າງນີ້ກໍຈະກາຍເປັນເລື່ອງບໍ່ທັນສະໄໝໄປແລ້ວ ດັ່ງນັ້ນ, ຮູບແບບທີ່ຖືກຮັບຮອງໄປແລ້ວນັ້ນຈະດີກວ່າ ເພາະມີເອກະລັກຄວາມເປັນລາວຢູ່ຫຼາຍ ເຖິງເວລາຈະຜ່ານໄປຈັກປີ ຮູບແບບທີ່ມີເອກະລັກຄວາມເປັນລາວກໍຈະບໍ່ມີທາງຫຼ້າສະໄໝໄປຢ່າງແນ່ນອນ ຍົກເວັ້ນວ່າຈະມີການອອກແບບອື່ນອີກ ທີ່ມີຄວາມເປັນລາວ ແລະທັງຫຼູຫຼາອະລັງການກວ່າຫຼັງທີ່ຖືກຮັບຮອງໄປແລ້ວນັ້ນກໍວ່າບໍ່ຊ່າງ.
ແນວໃດກໍຕາມ, ກະແສດຣາມ່າກ່ຽວກັບຫໍສະພາແຫ່ງຊາດ ລ້ວນແຕ່ຍັງບໍ່ໄດ້ເວົ້າເຖິງລາຍລະອຽດພາຍໃນແຕ່ຢ່າງໃດ ພຽງເຫັນແຕ່ຮູບຮ່າງໂດຍລວມພາຍນອກເທົ່ານັ້ນ. ແລະນັ້ນກໍເປັນພຽງຄຳຄິດເຫັນໂດຍລວມທີ່ທີມຂ່າວພວກເຮົາໄດ້ຍົກມາໃຫ້ເບິ່ງທໍ່ນັ້ນ ເຊິ່ງແນ່ນອນວ່າ ກວ່າຮູບການກໍ່ສ້າງ ຫຼືການຕົກລົງເຫັນດີໃນເລື່ອງການສ້າງຫໍສະພາແຫ່ງຊາດນັ້ນ ແມ່ນຖືກພາກສ່ວນທີ່ກ່ຽວຂ້ອງເພິ່ນໄດ້ພິຈາລະນາທຸກຂັ້ນທຸກຕອນທຸກຢ່າງແລ້ວ ຈຶ່ງຂໍໃຫ້ເພື່ອນຜູ້ອ່ານພິຈາລະນາໃຫ້ດີກ່ອນຈະສະແດງຄຳເຫັນໃດໜຶ່ງຕໍ່ການກໍ່ສ້າງອາຄານຫໍສະພາແຫ່ງຊາດດັ່ງກ່າວ.
