ໃນວັນທີ 1 ມິຖຸນາ 2017 ທີ່ຜ່ານມາ ເມືອງ ລະມາມ ແຂວງ ເຊກອງ ໄດ້ຈັດພິທີປູກຕົ້ນໄມ້ເພື່ອທົດແທນຄືນປ່າໄມ້ທີ່ຖືກທຳລາຍໄປນັ້ນກັບຄືນສູ່ສະພາບເດີມ, ພິທີດັ່ງກ່າວໄດ້ຈັດຂຶ້ນທີ່ສວນໄມ້ເຂດບ້ານໜອງບົງ ໂດຍການເຂົ້າຮ່ວມຂອງທ່ານ ຮຽມ ໄຊຍະລາດ ຄະນະປະຈຳພັກເມືອງ ຫົວໜ້າກອງບັນຊາການ ປກສ ເມືອງລະມາມ ມີບັນດາພະແນກການ ຫົວໜ້າ-ຮອງຫ້ອງການອ້ອມຂ້າງເມືອງ, ນັກທຸລະກິດ ຕະຫຼອດຮອດ ປະຊາຊົນບັນດາບ້ານອ້ອມຂ້າງເຂດດັ່ງກ່າວເຂົ້າຮ່ວມ.

ທ່ານ ບຸນເຖິງ ດວງປະເສີດ ກໍາມະການພັກເມືອງ ຫົວໜ້າຫ້ອງການກະສິກໍາ ແລະ ປ່າໄມ້ເມືອງ ກ່າວໃນພິທີປູກຕົ້ນໄມ້ຄັ້ງນີ້ວ່າ : ການປູກຕົ້ນໄມ້ມື້ນີ້ປະຕິບັດຕາມພາລະບົດບາດ ແລະ ໜ້າທີ່ຂອງຫ້ອງການກະສິກຳ ແລະ ປ່າໄມ້ເມືອງ ແລະ ທັງເພື່ອເປັນການສະເຫຼີມສະຫຼອງວັນປູກຕົ້ນໄມ້ແຫ່ງຊາດວັນທີ 1 ມິຖຸນາ ຂອງທຸກໆປີ, ໃນປີ 2017 ນີ້ ເມືອງລະມາມ ມີເນື້ອທີ່ ປູກຕົ້ນໄມ້ທັງໝົດ 42 ເຮັກຕາ, ປູກເບ້ຍໄມ້ ຈຳນວນ 18.200 ເບ້ຍ, ຊະນິດເບ້ຍໄມ້ທີ່ປູກມີໄມ້ແຄນ, ໄມ້ຂະຍູງ ແລະ ໄມ້ດູທຳມະຊາດ, ໃນນີ້ປູກຢູ່ ສວນໄມ້ເຂດບ້ານ ໜອງບົງ ຈໍານວນ 3 ເຮັກຕາ ມີເບ້ຍໄມ້ 1.200 ເບ້ຍ, ບໍລິສັດປູກຈໍານວນ 15 ເຮັກຕາ ມີເບ້ຍໄມ້ 6.200 ເບ້ຍ ແລະ ປະຊາຊົນປູກຈຳນວນ 21 ເຮັກຕາມີເບ້ຍໄມ້ 9.600 ເບ້ຍ; ນອກຈາກນີ້ກໍ່ໄດ້ປູກຕາມແລວສາຍທາງຂອງເທດສະບານ ຈໍານວນ 1.200 ກວ່າເບ້ຍ.

ປະຈຸບັນເມືອງລະມາມ ມີເນື້ອທີ່ປ່າໄມ້ປົກຫຸ້ມກວມເອົາ 139.589 ເຮັກຕາ, ເທົ່າກັບ 71,9 % ຂອງເນື້ອທີ່ທົ່ວເມືອງ ຂະນະທີ່ ເນື້ອທີ່ປ່າໄມ້ຖືກທໍາລາຍ ເຊິ່ງບໍ່ທັນໄດ້ຮັບການຟື້ນຟູ ມີປະມານ 200 ກວ່າເຮັກຕາ.