ສຳນັກຂ່າວຕ່າງປະເທດລາຍງານຈາກນະຄອນຫຼວງ ວໍຊິງຕັນ ປະເທດສະຫະລັດ ເມື່ອວັນທີ 31 ພຶດສະພາ 2017 ປະທານາທິບໍດີ ໂດນັລ ທຣັມ ຕ້ອນຮັບທ່ານ ຫງຽນ ຊວນ ຟຸກ ນາຍົກລັດຖະມົນຕີຫວຽດນາມ ທີ່ທຳນຽບຂາວ ເມື່ອວັນພຸດ ໂດຍທ່ານ ຫງຽນ ຖືເປັນຜູ່ນຳລັດຖະບານຈາກອາຊີຕາເວັນອອກສຽງໃຕ້ຄົນທຳອິດ ທີ່ເດີນທາງໄປຢຽມຢາມນະຄອນຫຼວງ ວໍຊິງຕັນ ຢ່າງເປັນທາງການ ມີລາຍງານວ່າ ຄະນະເຈົ້າໜ້າທີ່ລະດັບສູງຂອງທັງສອງປະເທດໃນພາກລັດ ແລະ ເອກະຊົນໄດ້ລົງນາມຮ່ວມກັນໃນບົດບັນທຶກຄວາມເຂົ້າໃຈ (ເອັມໂອຢູ) ຫຼາຍສະບັບທີ່ກ່ຽວກັບການສົ່ງ ເສີມຄວາມຮ່ວມມືທາງການຄ້າ ໂດຍບໍ່ໄດ້ມີການເປີດເຜີຍລາຍລະອຽດຫຍັງຫຼາຍ.

ເຖິງແນວໃດກໍ່ຕາມ ບໍລິສັດ ເຈເນີຣັລ ອີເລັກທຣິກ ເປີດເຜີຍໃນເວລາຕໍ່ມາວ່າໄດ້ລົງນາມໃນຂໍ້ຕົກລົງດ້ານການພັດທະນາເຄື່ອງຍົນສະໜາມບິນ, ການກຳເນີດພະລັງງານ ແລະ ບໍລິການອື່ນໆທີ່ກ່ຽວຂ້ອງ ຮວມມູນຄ່າປະມານ 5,580 ລ້ານໂດລາ ເຊິ່ງມັນໄດ້ສອດຄ່ອງກັບການເປີດເຜີຍຂອງທ່ານນາຍົກລັດຖະມົນຫວຽດນາມ ເຊິ່ງໄດ້ກ່າວກ່ອນອອກເດີນທາງມາທີ່ນະຄອນຫຼວງວໍຊິງຕັນ ວ່າລັດຖະບານ ຮາໂນ່ຍ ແລະ ລັດຖະບານ ວໍຊິງຕັນ ກຽມລົງນາມຮ່ວມກັນໃນຂໍ້ຕົກລົງທີ່ມີເນື້ອໃນກວມເອົາດ້ານບໍລິການ ແລະ ເທັກໂນໂລຍີລະດັບສູງ ເຊິ່ງມີມູນຄ່າລະຫວ່າງ 15,000 – 17,000 ລ້ານໂດລາ.