ໃນວັນທີ 19 ພຶດສະພາ 2017, ມີຄົນຮ້າຍກໍ່ເຫດລັກຄຳ ນໍ້າໜັກ 18 ບາດ ແລະ ເງິນບາດ 100,000 ກວ່າບາດ ຢູ່ໃນລົດໃຫຍ່ 2 ຄັນ ທີ່ຈອດຢູ່ ເດີນເຕະບານ ເຂດບ້ານໜອງພະຍາ ເມືອງໄຊທານີ ນະຄອນຫຼວງ ວຽງຈັນ. ຜ່ານການຕິດຕາມຂອງເຈົ້າໜ້າທີ່ຕໍາຫຼວດ 3 ມື້ຈຶ່ງສາມາດຈັບຕົວຜູ້ກໍ່ເຫດໄດ້ ຄື: ທ້າວ ສິນທະວົງ ອາຍຸ 23 ປີ ຢູ່ບ້ານໜອງ ພະຍາ ເມືອງໄຊທານີ ໂດຍອ້າງວ່າ ລັກເອົາໄປໃຊ້ໜີ້ ການພະນັນ.

ທ້າວ ສິນທະວົງ ຮັບສາລະພາບວ່າ: ໃນວັນທີ 19 ພຶດສະພາ 2017, ໄດ້ເຂົ້າໄປເບິ່ງກຸ່ມນັກທຸລະກິດ ແຂ່ງຂັນເຕະບານ. ຮອດເວລາ 19:00 ໂມງ, ຜູ້ກ່ຽວໄດ້ເລາະໄປຕາມແຄມເດີ່ນບານ ສັງເກດເຫັນກຸນແຈລົດ ໃຫຍ່ 2 ຄັນ ຫ້ອຍໄວ້ຢູ່ຕາໜ່າງອ້ອມເດີ່ນບານ ຈຶ່ງໄດ້ຈັບເອົາ ແລ້ວຍ່າງ ໄປຫາສະຖານທີ່ຈອດລົດ ແລ້ວບີບກຸນແຈ່ລົດຄັນທີ 1 ເປັນລົດຟໍຈູນເນີ ແລ້ວໄຂປະຕູລົດກວດຄົ້ນລົດພົບເງິນບາດຈຳນວນ 39,000 ບາດ ເງິນ ກີບ 400,000 ກີບ. ຈາກນັ້ນ, ກໍບິບກຸນແຈ່ລົດຄັນທີ 2 ທີ່ເປັນລົດ ເລັກ ຊັດ, ເຊິ່ງຢູ່ໃນລົດ ມີເງິນບາດ 65,000 ບາດ, ເງິນກີບ 1,110,000 ກີບ, ສາຍຄໍຄຳ 2 ເສັ້ນ, ໂມງຄຳ 1 ໜ່ວຍ ລວມນໍ້າໜັກ 18 ບາດ. ພາຍ ຫຼັງເອົາເງິນແລະ ຄໍາໄດ້ແລ້ວ ແມ່ນເອົາກຸນແຈ່ ໄປຖີ້ມຢູ່ຂ້າງຫ້ອງ ນໍ້າ ຂອງເດີ່ນບານ ແລ້ວກໍຫຼົບໜີ ໄປຮ້ານອີນເຕີເນັດ ເພື່ອເອົາເງິນຈຳນວນ 104,000 ບາດ ໄປໃຊ້ເຈົ້າໜີ້ການພະນັນ ແລະ ໃຊ້ຈ່າຍຫຼິ້ນກິນ ຈົນໝົດ. ສ່ວນຄຳຈຳນວນດັ່ງກ່າວ ແມ່ນໄດ້ເອົາໄປຝັງໄວ້ຢູ່ແຄມ ເຮືອນໜູ່ຢູ່ບ້ານ ດຽວກັນ ໂດຍເຈົ້າຂອງເຮືອນບໍ່ຮູ້ເຫັນນຳຕໍ່ການກະທຳຂອງຜູ້ກ່ຽວ.