ສຳນັກຂ່າວຕ່າງປະເທດລາຍງານຈາກນະຄອນຫຼວງ ປາຣີສ ປະເທດ ຝຣັ່ງ ເມື່ອວັນທີ 30 ພຶດສະພາ ນີ້ວ່າ ປະທານາທິບໍດີ ເອມມານູເອລ ມາຄຣົງ ໃຫ້ການຕ້ອນຮັບປະທານາທິບໍດີ ວາລາດິເມຍ ປູຕິນ ຢ່າງສົມກຽດ ທີ່ພຣະຣາຊະວັງແວຣ໌ຊາຍສ໌ ໃນນະຄອນຫຼວງ ປາຣີສ ເນື່ອງໃນໂອກາດທີ່ຜູ່ນຳຣັສເຊຍເດີນທາງມາຢຽມຢາມນະຄອນຫຼວງປາຣີສຢ່າງເປັນທາງການ ເມື່ອວັນຈັນ ແລະ ກົງກັບວັນຄົບຮອບ 300 ປີ ການສະເດັດຢຽມຢາມຝຣັ່ງຂອງຊາຣ໌ປີເຕີທີ 1 ມະຫາຣາຊ ຫຼື ຈັກກະພັດດິປິເຕີທີ 1 ແຫ່ງຣັສເຊຍ ນອກຈາກນີ້ ປູຕິນຍັງຖືເປັນຜູ່ນຳລັດຖະບານຕ່າງຊາດຄົນທຳອິດທີ່ເດີນທາງມາຢຽມຢາມນະຄອນຫຼວງປາຣີສຢ່າງເປັນທາງການ ນັບຕັ້ງແຕ່ມາຄຣົງໄດ້ດຳລົງຕຳແໜ່ງເປັນປະທານາທິບໍດີ ເມື່ອວັນທີ 14 ພຶດສະພາ 2016

ທັງນີ້ ຜູ່ນຳທັງສອງປະເທດເປີດເຜີຍຮ່ວມກັນໃນເວລາຕໍ່ມາວ່າ ໄດ້ຫາລືຮ່ວມກັນໃນຫຼາຍຫົວຂໍ້ທີ່ສຳຄັນກ່ຽວກັບສະພາບເຫດການຂອງໂລກ ໂດຍມາຄຣົງສະແດງຄວາມມຸ່ງໝັ້ນໃນການເພີ່ມຄວາມຮ່ວມມືກັບຣັສເຊຍເພື່ອແກ້ໄຂສະພາບເຫດການສົງຄາມກາງເມືອງໃນຊີເຣຍ ທີ່ຍືດເຍື້ອຍາວນານມາກວ່າ 6 ປີແລ້ວ ແລະ ສົ່ງຜົນກະທົບຕໍ່ຄວາມສຳພັນລະຫວ່າງຕະເວັນຕົກກັບ ຣັສເຊຍ ຂະນະດຽວກັນຜູ່ນຳຝຣັ່ງ ຍັງກ່າວສະໜັບສະໜູນຂະບວນການຖ່າຍໂອນອຳນາດທາງການເມືອງຕາມລະບອບປະຊາທິປະໄຕ ເພື່ອປ້ອງກັນບໍ່ໃຫ້ຊີເຣຍຕ້ອງກາຍເປັນລັດທີ່ແຕກແຍກ ແລະ ສະແດງຈຸດຢືນຕໍ່ຕ້ານການໃຊ້ອາວຸດເຄມີໃນຊີເຣຍ.

ດ້ານ ປູຕິນ ກ່າວສະໜັບສະໜູນການຍົກລະດັບຄວາມຮ່ວມມື ແລະ ເພີ່ມຄວາມເປັນເອກະພາບລະຫວ່າງນານາປະເທດ ເພື່ອກໍ່ໃຫ້ເກີດ “ຜົນລັບທາງບວກ” ໃນການຕໍ່ສູ້ກັບກຸ່ມກໍ່ການຮ້າຍໃນຊີເຣຍ ແລະ ການຕໍ່ສູ້ກັບໄພຄຸກຄາມຈາກເລື່ອງດັ່ງກ່າວດ້ວຍການ “ທຳລາຍຄວາມເປັນລັດ” ຂອງລັດໃດລັດໜຶ່ງເປັນເລື່ອງທີ່ເປັນໄປບໍ່ໄດ້ເດັດຂາດ ແລະ ມີທ່າທີເຫັນພ້ອມກັບມາຄຣົງເຖິງຄວາມຈຳເປັນໃນການຟື້ນຟູຄວາມສຳພັນລະຫວ່າງຝຣັ່ງກັບຣັສເຊຍ ເຊິ່ງເປັນປະເທດອາວຸດນິວເຄຣຍໄວ້ໃນຄອບຄອງ ແລະ ເປັນສະມາຊິກຖາວອນຂອງຄະນະມົນຕີຄວາມໝັ້ນຄົງແຫ່ງສະຫະປະຊາຊາດ (ຢູເອັນເອສຊີ)