ອີງຕາມການລາຍງານຂອງສຳນັກຂ່າວ ໄທລັດວ່າ ເມື່ອເວລາປະມານ 4 ໂມງແລງ ຂອງມື້ນີ້ ວັນທີ 28 ພຶດສະພາ 2017 ໄດ້ເກີດເຫດລົດໂຮງໝໍເມືອງແກ່ນທ້າວ ທີ່ນຳສົ່ງຄົນເຈັບໄປຍັງໂຮງໝໍຈັງຫວັດເລີຍປະເທດໄທ ໄດ້ພິກຂວໍ້າທີ່ຈັງຫວັດເລີຍ ເຊິ່ງມີທັງຄົນເຈັບ, ພີ່ນ້ອງ ແລະພະຍາບານ ທີ່ໄປນຳກັນ 9 ຄົນໄດ້ຮັບບາດເຈັບ ພາຍຫຼັງເກີດເຫດໜ່ວຍກູ້ໄພສະຫວ່າງສິລິທຳແລະຕຳຫຼວດອຳເພີທ່າລີ່ ຈັງຫວັດເລີຍໄດ້ເຂົ້າໃຫ້ການຊ່ວຍເຫຼືອແລະນຳສົ່ງໂຮງໝໍຈັງຫວັດເລີຍ.
ຜູ້ທີ່ຢູ່ໃນລົດທີ່ຮູ້ຊື່ມີ ທ້າວ ທອນ ສິນທະວົງ (ຄົນເຈັບ) ແລະ ນາງເຫຼືອ ຍອດແກ້ວ (ຄົນເຈັບ) ພ້ອມກັບ ນາງ ຈູມ ສິນທະວົງ, ນາງ ເປີ້ນ ສິນທະວົງ, ນາງ ສົ່ງ ຈັນທະວົງ ແລະ ນາງຈຽມ ສຸກກະເສີມ ທັງໝົດເປັນພີ່ນ້ອງກັນ ໂດຍມີ ທ້າວ ສິນໃຈ ສີສະອາດ ອາຍຸ 30 ປີ ເປັນຄົນຂັບລົດ ພ້ອມດ້ວຍໝໍແລະພະຍາບານອີກ ລວມກັນ 9 ຄົນ.
ຈາກການສອບຖາມ ທ້າວ ສິນໃຈ ສີສະອາດ ຜູ້ຂັບລົດ ເລົ່າວ່າໄດ້ຂັບລົດໂຮງໝໍ ໄປແຕ່ເມືອງແກ່ນທ້າວ ເມືອງແກ່ນທ້າວ ແຂວງໄຊຍະບູລີ ເພື່ອໄປສົ່ງຄົນເຈັບ ຄື ທ້າວ ທອນ ສິນທະວົງ ແລະ ນາງ ເຫຼືອ ຍອດແກ້ວ ທີ່ຖືກຄວາຍຊົນຈົນບາດເຈັບສາຫັດ ພໍໄປເຖິງບ່ອນເກີດເຫດ ເສັ້ນທາງໂຄ້ງ ຈຶ່ງບໍ່ສາມາດຢຽບເບກໄດ້ ເຮັດໃຫ້ລົດເສຍຫຼັກຂ້າມເລນໄປຕົກອອກນອກທາງແລະພິກຂວໍ້າຄືດັ່ງກ່າວ.
ຂ່າວຫຼ້າສຸດຄົນເຈັບຜູ້ໜຶ່ງທີ່ຖືກຄວາຍຊົນແລະຢູ່ໃນຫ້ອງສຸກເສີນນັ້ນ ໄດ້ຖືກຍາດພີ່ນ້ອງຂໍເອົາກັບຄືນບ້ານແລ້ວ.
ແຫຼ່ງຂ່າວ: ໄທລັດ