ທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີ ກະຊວງການເງິນ ໄດ້ຊີ້ແຈ້ງຕໍ່ຂໍ້ຊັກຖາມຂອງ ສສຊ ກ່ຽວກັບການແກ້ໄຂ ບັນຫາໜີີ້ສິນ ໃນວາລະກອງປະຊຸມ ສະໄໝສາມັນ ເທື່ອທີ 3 ຂອງສະພາແຫ່ງຊາດ ຊຸດທີ VIII ເມື່ອບໍ່ດົນມານີ້ ວ່າ: ມາຮອດປັດຈຸບັນ ກະຊວງແຜນການ ແລະ ການລົງທຶນ ໄດ້ເປັນເຈົ້າການ ສັງລວມຄືນໜີ້ສິນທັງໝົດ ຈາກບັນດາໂຄງການລົງທຶນຂອງລັດ ໂດຍສະເພາະແມ່ນໂຄງການທີ່ໄດ້ ຈັດຕັ້ງປະຕິບັດແລ້ວ ເຊິ່ງເປັນຈໍານວນເງິນ ງົບປະມານ 13 ພັນກວ່າຕື້ກີບ ເຊິ່ງລັດຖະບານ ກໍາລັງຄົ້ນຄ້ວາ ວິທີການແກ້ໄຂ ດ້ວຍມາດຕະການຕ່າງໆ ໂດຍໄດ້ມີການແຕ່ງຕັ້ງ ຄະນະແກ້ໄຂໜີ້ສິນ.
ໄລຍະຜ່ານມາ ລັດຖະບານ ໄດ້ແກ້ໄຂບັນຫາໜີ້ສິນ ໂດຍຖືເປັນວຽກຈຸດສຸມ ແລະ ໄດ້ແກ້ໄຂຈໍານວນໜຶ່ງ ເຊິ່ງໄດ້ຈັດສັນງົບປະມານ ເພື່ອຊໍາລະໃນແຕ່ລະປີ ໃນແຜນ 3 ເດືອນຂ້າມຜ່ານປີ 2016 ໄດ້ອະນຸມັດແຜນການ ຊໍາລະໜີ້ສິນ 700 ຕື້ກີບ, ໃນນີ້ 400 ຕື້ກີບ ເພື່ອຊໍາລະ ໂຄງການລົງທຶນຂອງລັດແລະ 300 ຕື້ກີບ ສໍາລັບໜີ້ພັນທະບັດ ໂຄງ ການລົງທຶນຂອງລັດ. ປັດຈຸບັນ ໜີ້ສີນຕ່າງປະເທດກວມ 52% ຂອງ GDP ແລະ ໜີ້ສິນພາຍໃນກວມ 6,3% ຂອງ GDP.
ທ່ານ ສົມດີ ດວງດີ ໃຫ້ຮູ້ຕື່ມວ່າ: ການແກ້ໄຂໜີ້ສາທາລະນະ ກະຊວງການເງິນ ໄດ້ປະຕິບັດໜ້າທີ່ ແລະ ຄວາມຮັບຜິດຊອບ ລະຫວ່າງ ກະຊວງແຜນການ ແລະ ການລົງທຶນ ແລະ ກະຊວງການເງິນ ຕາມພາລະບົດບາດຂອງຕົນ ຢ່າງຈະແຈ້ງ ສະເພາະກະຊວງການເງິນ ກໍໄດ້ມີການປັບປຸງ ພາລະບົດບາດຂອງກະຊວງ ແລະ ບັນດາກົມ ເພື່ອໃຫ້ສາມາດ ສັງລວມໜີ້ສິນຢ່າງລວມສູນ ແລະ ວາງມາດຕະການແກ້ໄຂ ຢ່າງເປັນລະບົບ ພ້ອມນັ້ນ ເພື່ອສາມາດສັງລວມ, ຄຸ້ມຄອງໜີ້ສິນ ໂດຍໄດ້ມີການຄົ້ນຄ້ວາ ຮ່າງກົດໝາຍວ່າດ້ວຍ ການຄຸ້ມຄອງໜີ້ສິນ ສາທາລະນະໃນທ້າຍປີນີ້ ໜີ້ສິນຂອງລັດຖະບານ ສັງລວມແລ້ວຍອດໜີ້ທັງໝົດ ລວມທັງໜີ້ພາຍໃນ ແລະ ຕ່າງປະເທດ ຍັງຢູ່ໃນລະດັບສູງສົມຄວນ ເຊິ່ງເປັນຈຸດທີ່ມີຄວາມສ່ຽງຖ້າພວກເຮົາບໍ່ມີມາດຕະການ ຢ່າງເຂັ້ມງວດ ແລະ ຮັດກຸມໃນຕໍ່ໜ້າ.
ແຫລ່ງຂ່າວຈາກ: http://kpl.gov.la
ຮູບພາບປະກອບຈາກ: ເສດຖະກິດ-ສັງຄົມ