ວິທະຍຸສາກົນແຫ່ງປະເທດຈີນລາຍງານວ່າ ວັນທີ 4 ພຶດສະພາ 2017 ນີ້ ທ່ານ ເຣັກ ທິວເລີສັນ ລັດຖະມົນຕີກະຊວງການຕ່າງປະເທດອາເມລິກາ ຈະປະຊຸມຮ່ວມກັບບັນດາລັດຖະມົນຕີຕ່າງປະເທດຂອງ ອາຊ່ຽນ ຢູ່ທີ່ສະຫະລັດອາເມລິກາ ເຊິ່ງມີຄວາມເປັນໄປໄດ້ວ່າ ບັນຫາທະເລຈີນໃຕ້ກໍແມ່ນບັນຫາໜຶ່ງທີ່ຈະຖືກຍົກຂຶ້ນໃນກອງປະຊຸມດັ່ງກ່າວ.

ຕໍ່ເຫດການດັ່ງກ່າວ ໂຄສົກກະຊວງການຕ່າງປະເທດຈີນ ໄດ້ຕອບຄຳຖາມຂອງນັກຂ່າວໃນໂອກາດຖະແຫຼງຂ່າວຢູ່ນະຄອນຫຼວງປັກກິ່ງຂອງຈີນໃນວັນທີ 3 ພຶດສະພາ 2017 ນີ້ວ່າ ບັນຫາທະເລຈີນໃຕ້ແມ່ນບັນຫາລະຫວ່າງຈີນກັບບາງປະເທດໃນອາຊ່ຽນເທົ່ານັ້ນ ຫາກບໍ່ແມ່ນບັນຫາລະຫວ່າງຈີນກັບອາຊ່ຽນ ແລະກໍບໍ່ແມ່ນບັນຫາລະຫວ່າງຈີນກັບອາເມລິກາ ທັງບໍ່ແມ່ນບັນຫາລະຫວ່າງອາເມລິກາກັບອາຊ່ຽນອີກດ້ວຍ.

ຈາກຄວາມພະຍາຍາມຮ່ວມລະຫວ່າງຈີນກັບອາຊ່ຽນ ວ່າງມໍ່ໆມານີ້ ສະຖານະການໃນທະເລຈີນໃຕ້ໄດ້ດີຂຶ້ນຢ່າງຕໍ່ເນື່ອງ ແລະກໍເປັນສະຖານະການທີ່ຕ້ອງຮັກສາແລະຮ່ວມກັນທະນຸຖະໜອມຈາກຝ່າຍຕ່າງໆ ແລະຈີນກໍຫວັງວ່າ ປະເທດຢູ່ນອກພາກພື້ນຄວນເຄົາລົບຄວາມພະຍາຍາມຮ່ວມກັນ ຮັກສາສັນຕິພາບແລະສະຖຽນລະພາບໃນທະເລຈີນໃຕ້ຂອງພາກພື້ນນີ້.