ເມື່ອວັນທີ 30 ເມສາ 2017 ສຳນັກຂ່າວຣອຍເຕີລາຍງານວ່າ ທ່ານ ຣິນຊ໌ ພຣີບັສ ເຈົ້າໜ້າທີ່ປະຈຳທຳນຽບຂາວ ຫຼື ທຳນຽບປະທານາທິ ບໍດີສະຫະລັດອາເມລິກາ ໃຫ້ສຳພາດຕໍ່ລາຍການ “ດິສ ວິດ” ຂອງສະຖານີໂທລະພາບເອບີຊີ ລະບຸວ່າ ປະທານາທິບໍດີ ໂດນັລ ທຣັມ ໄດ້ຕໍ່ສາຍສົນທະນາກັບຜູ້ນຳສິງກະໂປ ແລະ ໄທ ໃນວັນທີ 30 ເມສາ ຕາມເວລາທ້ອງຖິ່ນສະຫະລັດ ກ່ຽວກັບໄພຄຸກຄາມເຖິງລະດັບທຳລາຍລ້າງ ແລະ ມະຫັນຕະໄພນິວເຄຣຍຈາກເກົາຫຼີເໜືອ
ທ່ານ ພຣີບັສ ກ່າວວ່າ “ເຮົາຕ້ອງການຄວາມຮ່ວມມືໃນບາງລະດັບ ຈາກປະເທດທີ່ເປັນຫຸ້ນສ່ວນຕ່າງໆໃນພາກພື້ນນີ້ໃຫ້ຫຼາຍທີ່ສຸດເທົ່າທີ່ເຮົາສາມາດຈະຫາໄດ້ ເພື່ອແນ່ໃຈວ່າເຮົາຈະເດີນໄປໃນແນວທາງດຽວກັນ” ພ້ອມທັງກ່າວເພີ່ມເຕີມອີກວ່າ ປະທານາທິບໍດີສະຫະລັດອາເມລິກາໄດ້ຕໍ່ສາຍລົມກັບທ່ານ ໂຣດຣິໂກ ຕູແຕຣເຕ ປະທານາທິບໍດີ ຟິລິປິນເມື່ອວັນທີ 29 ເມສາ 2017 ທີ່ຜ່ານມາ ນີ້ເປັນສ່ວນໜຶ່ງຂອງຄວາມພະຍາຍາມເຂົ້າເຖິງບັນດາຜູ່ນຳໃນພາກພື້ນ ໂດຍມີເປົ້າໝາຍເພື່ອ “ທຸກຄົນຢູ່ແນວດຽວກັນໃນການສະໜັບສະໜູນແຜນປະຕິບັດການ” ຂອງສະຫະລັດອາເມລິກາ ໃນກໍລະນີທີ່ສະຖານະການເກົາຫຼີເໜືອເສື່ອມອຳນາດລົງ
ທ່ານ ພຣີບັສ ກ່າວອີກວ່າ ປະທານາທິບໍດີ ໂດນັລ ທຣັມ ຍັງຕິດຕໍ່ກັບທ່ານ ຊິນໂຊະ ອາເບະ ນາຍົກລັດຖະມົນຕີຍີ່ປຸ່ນຢ່າງສະໝ່ຳສະເໝີ ແລະ ນັບມື້ນັບໃກຊິດກັບ ປະທານາທິບໍດີ ສີ ຈິ້ນ ຜິງ ຂອງຈີນຫຼາຍຂຶ້ນ ພ້ອມກັບລະບຸວ່າ ສິ່ງທີ່ປະເທດ ແລະ ພາກພື້ນນີ້ກຳລັງພົບຢູ່ໃນຕອນີ້ ບໍ່ມີຫຍັງໃຫຍ່ໄປກວ່າສິ່ງທີ່ກຳລັງດຳເນີນໄປຢູ່ໃນເກົາຫຼີເໜືອອີກແລ້ວ ໃນເວລານີ້ກຳລັງມີຄວາມເປັນໄປໄດ້ທີ່ຈະເກີດນິວເຄຣຍທຳລາຍລ້າງຂະໜາດໃຫຍ່ຂຶ້ນໃນອາຊີ ຮວມທັງຕໍ່ສະຫະລັດອາເມລິກາໃນທີ່ສຸດ ເຮັດໃຫ້ປະທານາທິບໍດີ ໂດນັລ ທຣັມ ຫາເຫດຜົນທີ່ຈຳເປັນຕ້ອງຫາລືເລື່ອງດັ່ງກ່າວ