ຫາກໃຜມັກນອນບໍ່ຫຼັບ ລອງຫັນມາໃຊ້ວິທີບຳບັດແບບທຳມະຊາດ ກັບສະໝຸນໄພແບບພື້ນບ້ານ ຜັກບົວລະພາ ເບິ່ງ ເພາະຜັກບົວລະພາ ເປັນອີກວິທີໜຶ່ງ ທີ່ຊ່ວຍເຮັດໃຫ້ຄົນທີ່ເປັນພະຍາດນອນບໍ່ຫຼັບ ສາມາດນອນຫຼັບໄດ້ ດ້ວຍວິທີງ່າຍໆຄື ໃຫ້ເອົາໃບບົວລະພາສົດ ຈຳນວນປະມານ 1 ກຳມື ມາລ້າງນໍ້າໃຫ້ສະອາດ ຕົ້ມກັບນໍ້າຈຳນວນເຄິ່ງລິດຈົນຟົດ ຂ້ຽວໃຫ້ເຫຼືອປະມານ 3 ສ່ວນ 4 ຂອງຈອກ ດື່ມຂະນະອຸ່ນໆກ່ອນນອນ ຈະຊ່ວຍໃຫ້ນອນຫຼັບດີ ໃຜທີ່ນອນບໍ່ຫຼັບລອງເຮັດເບິ່ງຈະເຫັນຜົນ
ນອກຈາກປະໂຫຍດທີ່ເວົ້າມານັ້ນ ຜັກບົວລະພາຍັງມີປະໂຫຍດຫຼາຍຢ່າງຄື:
- ຕົ້ນ: ຊ່ວຍແກ້ໄອ, ເຈັບຫົວ, ເຈັບກະເພາະ, ແໜ້ນທ້ອງ, ປະຈຳເດືອນມາບໍ່ປົກກະຕິ
- ຮາກ: ນໍາມາຊ່ວຍກຳຈັດແຜ ແລະໜອງຊໍ້າເຮື້ອໄດ້
- ໃບ: ມີລັກສະນະສີຂຽວເຂັ້ມ ເປັນແຫຼ່ງທີ່ສຳຄັນຂອງສານເບຕ້າແຄໂຣທີນ ທີ່ຊ່ວຍໃນການຕ້ານອະນູມູນອິດສະລະ ທີ່ເປັນປັດໄຈໃນການເກີດພະຍາດມະເຮັງ, ພະຍາດຫົວໃຈຊາດເລືອດ ແລະນໍ້າຄັ້ນຈາກໃບ ສາມາດດື່ມແກ້ການລະຄາຍເຄືອງໃນລຳຄໍ. ນອກຈາກນີ້ ໃບສົດ ມີສັບພະຄຸນ ແກ້ທ້ອງອືດ, ຂັບລົມໃນລຳໄສ້ ຊ່ວຍຍ່ອຍອາຫານ
- ຍອດອ່ອນ: ຕົ້ມກັບນໍ້າດື່ມ ຄືກັບນໍ້າຊາ ຫຼືກິນສົດ ຊ່ວຍແກ້ທ້ອງອືດ ແລະຊ່ວຍຈະເລີນອາຫານ
- ແກ່ນ: ໃຊ້ເປັນຢາຂັບນໍ້າປັດສະວະ ແລະເປັນຢາລະບາຍອ່ອນໆ ແກ້ອາການທ້ອງຜູກ ເພາະແກ່ນຖ້າຖືກນໍ້າຈະພອງຕົວເປັນເມືອກ ຊ່ວຍໃຫ້ຂັບສະດວກ