ທ່ອງທ່ຽວກັບລາວໂພສຕ໌ ມື້ນີ້ເຮົາມາຂຶ້ນເໜືອໄປທີ່ແຂວງ ໄຊຍະບູລີ ແອັດມິນຈະພາທຸກຄົນມາຮູ້ຈັກອີກໜຶ່ງຖ້ຳທີ່ຖືກເຊື່ອງຊ້ອນໄວ້ໃນປ່າ ແລະ ສາຍນ້ຳ ນັ້ນກໍ່ຄື ຖ້ຳນ້ຳຄ່ອມ
ຖ້ຳນ້ຳຄ່ອມ ຕັ້ງຢູ່ບ້ານນ້ຳຄ່ອມເຊິ່ງຫ່າງຈາກເທດສະບານຂອງຕົວເມືອງຊຽງຮ່ອນ ແຂວງໄຊຍະບູລີປະມານ 18 ກິ ໂລແມັດ, ເປັນຖ້ຳທຳມະຊາດທີ່ຕັ້ງຢູ່ເທິງຍອດພູຂອງແມ່ນ້ຳຄ່ອມ, ພື້ນທີ່ຂອງຖ້ຳຕັ້ງຢູ່ທ່າມກາງປ່າດົງຕຶບຫນາທີ່ເຍືອກເຢັນມີຫ້ວຍນ້ອຍຫຼາຍສາຍເຊິ່ງເປັນສາຂາຂອງແມ່ນ້ຳຄ່ອມ ແລະ ມີປູປາຫຼາຍຊະນິດອາໄສຢູ່. ບໍລິເວນດັ່ງກ່າວຍັງມີສັດປ່າເປັນຈຳນວນຫຼວງຫຼາຍ, ມີຢາພື້ນເມືອງຫຼາຍຊະນິດທີ່ເກີດຢູ່ຕາມໜ້າຜາແລະຫີນບໍລິເວນຖ້ຳ. ນອກນັ້ນຢູ່ພາຍໃນຖ້ຳຍັງມີຮູບສິງ, ຮູບເສືອ ແລະ ລວດລາຍສີລະປະຕ່າງໆທີ່ສວຍງາມ.
ຖ້ຳແຫ່ງນີ້ເປັນຖ້ຳທີ່ຕິດພັນກັບການປະຕິວັດເພາະວ່າບໍລິເວນເຂດນີ້ຍັງເປັນເຂດພື້ນຖານຂອງການປະຕິວັດຊາດນັບຕັ້ງແຕ່ຊຸ່ມປີ 1950 ເປັນຕົ້ນມາ, ມີນັກປະຕິວັດທີ່ສຳຄັນຫຼາຍທ່ານໄດ້ອາໃສຖ້ຳແຫ່ງນີ້ເປັນຖານທີ່ໝັ້ນໃນການຕໍ່ສູ້ກູ້ຊາດຕ້ານພວກລ່າເມືອງຂຶ້ນຝຣັ່ງຄື: ທ່ານ ພູມີ ວົງວິຈິດ, ທ່ານ ອຸດຕະມະ ຈຸນລະມະນີ, ທ່ານ ມະຫາຄຳພັນ ວໍລະຈິດ, ທ່ານ ໜານສະຫວັດ ຍົດບຸນ ແລະ ກຳລັງອາສາສະໝັກຂອງຫວຽດນາມໜຶ່ງໝວດໄດ້ປະຊຸມປຶກສາຫາລື ກັນເພື່ອວາງແຜນຂົນຂວາຍປະຊາຊົນເຜົ່າມົ້ງ 2 ບ້ານຄື: ບ້ານພູລ້ານຫຼວງ ແລະ ບ້ານແກ້ວ ໃຫ້ມາເຂົ້າຮ່ວມຕໍ່ສູ້ກູ້ຊາດກັບກຳລັງປະຕິວັດເພື່ອຕໍ່ຕ້ານກັບຈັກກະພັດອາເມລິກາ ແລະ ທະຫານຮັບຈ້າງຂອງໄທ ແຕ່ ປີ 1961 ເຖິງປີ 1973 ຢ່າງພິລະອາດຫານ. ຫຼັງຈາກນັ້ນ, ຖ້ຳແຫ່ງນີ້ໄດ້ກາຍເປັນບ່ອນເພິ່ງພາອາໄສຂອງກຳລັງປະຕິວັດຜູ້ຮັກຊາດ ແລະ ອ້າຍນ້ອງອາສາສະມັກຫວຽດນາມ, ໄດ້ຕັ້ງສຳນັກງານຢູ່ຖ້ຳແຫ່ງນີ້ເປັນເວລາ 20 ກວ່າປີ. ນອກນັ້ນຖ້ຳແຫ່ງນີ້ຍັງໄດ້ກາຍເປັນຈຸດຍຸດທະສາດທີ່ສຳຄັນອີກບ່ອນຫນື່ງ ເພາະວ່າເມື່ອເຮົາຢືນຢູ່ຈຸດນີ້ຈະສາມາດເບິ່ງເຫັນທິວທັດອ້ອມຂ້າງຂອງສັດຕູຜູ້ຮຸກຮານແລະສາມາດແນມເຫັນທຳມະຊາດອັນສວຍງາມຂອງຕົວເມືອງຊຽງ ຮ່ອນອີກດ້ວຍ.
