ທ່ານ ຄຳຕາ ອໍລະດົມ ຫົວໜ້າຫ້ອງການ-ການເງິນ ເມືອງສີໂຄດຕະບອງ ນະຄອນຫລວງວຽງຈັນ ໃຫ້ຮູ້ວ່າ: ເພື່ອຢາກເກັບລາຍຮັບ ໃຫ້ໄດ້ຕາມຄາດໝາຍສູ້ຊົນ ດັ່ງທີ່ກ່າວມານັ້ນ ພວກເຮົາໄດ້ວາງ 8 ມາດຕະການ ຄື ເພີ່ມທະວີການນໍາພາ ຂອງຄະນະພັກທຸກຂັ້ນ, ສະມາຊິກພັກ ທຸກສະຫາຍ, ພະນັກງານທຸກຄົນ ຍົກສູງຕໍ່ການຮັບຜິດຊອບ ການເກັບລາຍຮັບທີ່ນະຄອນຫລວງ ມອບໝາຍໃຫ້; ສືບຕໍ່ເຜີຍແຜ່ບັນດາກົດໝາຍ, ນິຕິກໍາຕ່າງໆ ໃຫ້ພະນັກງານລັດຖະກອນ, ນັກທຸລະກິດ, ພໍ່ຄ້າຊາວຂາຍ, ພໍ່ແມ່ປະຊາຊົນຕື່ນຕົວ ເປັນເຈົ້າການປະຕິບັດ ພັນທະຂອງຕົນ ໃຫ້ຖືກຕ້ອງຄົບຖ້ວນ ແລະ ທັນເວລາ; ສືບຕໍ່ເກັບກູ້ໜີ້ສິນຄ້າງ ມອບອາກອນ ແລະ ຊັບສິນຂອງລັດ ນຳໃຊ້ມາດຕະການ ຢ່າງເຄັ່ງຄັດ ຕໍ່ຜູ້ທີ່ຝ່າຝືນ ລະບຽບກົດໝາຍ; ສົມທົບກັບຫ້ອງການຊັບສິນ ນະຄອນຫລວງ, ຂະແໜງການທີ່ກ່ຽວຂ້ອງ, ປັບປຸງລາຍຮັບ ຈາກການຂຸດຄົ້ນ ຊັບພະຍາກອນທຳມະຊາດ ດິນດຳ-ດິນແດງ, ຫີນ-ຊາຍ, ຫີນດານ ໃຫ້ສົມເຫດສົມຜົນຖືກຕ້ອງຕາມຄວາມເປັນຈິງ; ສົມທົບກັບພະແນກ ສ່ວຍສາອາກອນ ເພື່ອປຸກລະດົມໃຫ້ນັກທຸລະກິດ ທີ່ມີລາຍຮັບແຕ່ 400 ລ້ານຕໍ່ປີ ເຂົ້າສູ່ລະບົບອາກອນ ມູນຄ່າເພີ່ມ (ອບພ), ນໍາໃຊ້ໃບເກັບເງິນຖືບັນຊີ ຢ່າງຖືກຕ້ອງ ກ້າວໄປນໍາໃຊ້້ເຄື່ອງ ເອເລັກໂຕຣນິກ ທີ່ທັນສະໄໝ ໃນບັນດາຫົວໜ່ວຍທຸລະກິດຕ່າງໆ; ກວດກາການເກັບລາຍຮັບຈາກທີ່ດິນ, ຈັດຕັ້ງແກ້ໄຂ ສະພາບ ການສ້າງບົດສະຫລຸບ ລາຍງານການເງິນ ແບບຫລຸບທຶນ, ປິດບັງ, ປອມແປງ, ຊຸກເຊື່ອງ, ໃຫ້ສາມາດເກັບລາຍຮັບ ຕາມຄວາມເປັນຈິງ; ສືບຕໍ່ປັບປຸງລະບົບ ການຄຸ້ມຄອງນຳເຄື່ອງ ມືທັນສະໄໝ ເຂົ້າໃນການຄຸ້ມຄອງເກັບລາຍຮັບ ໂດຍໃຫ້ຂະແໜງການສາຍຕັ້ງ ສະໜັບສະໜູນ ດ້ານງົບປະມານ ແລະ ວິຊາການ; ຫັນບັນດາທຸລະກິດ ທີ່ມີເງື່ອນໄຂ ໃຫ້ມາຖືບັນຊີເຂົ້າສູ່ລະບົບ ອາກອນມູນຄ່າເພີ່ມ, ນຳໃຊ້ໃບບິນ ແລະ ຫັນເປັນທັນສະໄໝ.
ໃນສົກ 2015-2016 ຜ່ານມາ ຫ້ອງການ-ການເງິນເມືອງສີໂຄດຕະບອງ ສາມາດຈັດເກັບລາຍຮັບ ເຂົ້າງົບປະມານໄດ້ທັງໝົດ 40.990.693.089 ກີບ, ເທົ່າກັບ 85,24% ທຽບໃສ່ແຜນການປີ, ຖ້າທຽບໃສ່ການ ຈັດຕັ້ງປະຕິບັດ ຂອງສົກປີຜ່ານມາເທົ່າກັບ 103,92%, ເພີ່ມຂຶ້ນ 3,9% (1.545.890.861 ກີບ). ຜ່ານການຕີລາຄາ ໂດຍລວມແລ້ວ ບໍ່ສາມາດເກັບລາຍຮັບ ບັນລຸຕາມແຜນການທີ່ວາງໄວ້ ເນື່ອງຈາກວ່າ ການດັດແກ້ຖານອາກອນ ປະຕິບັດບໍ່ສຳເລັດ, ບໍ່ໄດ້ຕາມຄາດໝາຍ, ມີຄວາມຊັກຊ້າແກ່ຍາວ, ບໍ່ໄປຕາມເວລາກຳນົດ, ຫົວໜ່ວຍທຸລະກິດຈຳນວນໜຶ່ງ ຍັງບໍ່ທັນຕື່ນຕົວ ແລະ ອື່ນໆ
ເພື່ອໃຫ້ບັນລຸຕາມແຜນການ ການຈັດເກັບລາຍຮັບ ເຂົ້າງົບປະມານ ໃນປີ 2017 ທີ່ນະຄອນຫລວງ ມອບໝາຍໃຫ້ຕ້ອງສູ້ຊົນເກັບລາຍຮັບ ໃຫ້ໄດ້ທັງໝົດ 47.908.000.000 ກີບ, ເພີ່ມຂຶ້ນ 16,87%, ໃນນັ້ນສ່ວຍສາອາກອນ 47.488.000.000 ກີບ ເພີ່ມຂຶ້ນ 17,57%, ຊັບສິນຂອງລັດ 420.000.000 ກີບ ຫລຸດລົງຈາກປີຜ່ານມາ 30% ເພື່ອໃຫ້ບັນລຸຄາດໝາຍທີ່ວາງໄວ້ ທາງເມືອງສີໂຄດຕະບອງ ຈຶ່ງໄດ້ວາງທິດທາງແຜນການ ແລະ ວາງມາດຕະການ ໃນການຈັດຕັ້ງປະຕິບັດ ບົນຈິດໃຈບຸກທະລຸທາງດ້ານລາຍຮັບ ເພື່ອຕອບສະໜອງລາຍຈ່າຍ ບົນພື້ນຖານໃນການປະຕິບັດ ລາຍຮັບງົບປະມານ, ໃຫ້ບ້ານ ແລະ ຂະແໜງການຕ່າງໆ ມີສ່ວນຮ່ວມຫລາຍຂຶ້ນ ຕາມທິດຫັນວຽກຫັນຄົນ ລົງສູ່ບ້ານ ໃຫ້ຫລາຍຂຶ້ນ ຕາມທິດວຽກງານສາມສ້າງ
ແຫຼ່ງຂ່າວ: ສຳນັກຂ່າວສານປະເທດລາວ