ບີບີຊີ ແລະຊີເອັນເອັນ ລາຍງານເມື່ອວັນທີ 25 ເມສາ 2017 ຜ່ານມາວ່າ ເອລຕັນ ຈອນ ສິນລະປິນດັງຄົນອັງກິດ ຕ້ອງຍົກເລີກການທົວຄອນເສີດ “ມິລລຽນດອນລາເປຍໂນ” ໃນຊ່ວງເດືອນເມສາ ແລະເດືອນພຶດສະພາ ໃນນະຄອນລາສເວກັສ ລັດເນວາດາ ແລະລັດຄາລິຟໍເນຍ ຂອງສະຫະລັດອາເມລິກາ ທັງໝົດ 9 ເວທີ ຫຼັງຈາກທີ່ປ່ວຍດ້ວຍອາການຕິດເຊື້ອແບັກທີເລຍຢ່າງຮຸນແຮງ ແລະຕ້ອງໄດ້ຮັບການປິ່ນປົວຢູ່ໃນໂຮງໝໍ ຢູ່ຫ້ອງໄອຊີຢູ ເປັນເວລາ 2 ຄືນ ຈາກການເປີດເຜີຍຂອງທີມຜູ້ຈັດການສ່ວນຕົວຂອງ ເອລຕັນ

ຂ່າວໄດ້ບອກອີກວ່າ ນັກຮ້ອງຄົນດັງເກີດການບໍ່ສະບາຍຢ່າງຮຸນແຮງ ຫຼັງຈາກທົວຄອນເສີດໃນພູມິພາກລະຕິນອາເມລິກາ ແລະຕ້ອງຮີບເດີນທາງກັບອັງກິດ ເພື່ອເຂົ້າຮັບການປິ່ນປົວຢ່າງຮີບດ່ວນ ເຊິ່ງຕອນນີ້ ເອລຕັນ ອອກຈາກໂຮງໝໍມາພັກຢູ່ເຮືອນແລ້ວ

ການຖະແຫຼງການຂອງຜູ້ຈັດການໄດ້ບອກວ່າ ເອລຕັນ ບໍ່ສະບາຍຕິດເຊື້ອຊະນິດທີ່ ‘ພົບບໍ່ຫຼາຍ ແລະອາດຮຸນແຮງເຖິງຂັ້ນເສຍຊີວິດໄດ້’ ແຕ່ບໍ່ໄດ້ເປີດເຜີຍລາຍລະອຽດນອກຈາກນີ້

ຂະນະທີ່ ເຊີເອລຕັນ ເອງໄດ້ບອກວ່າ “ຂ້ອຍຮູ້ສຶກດີທີ່ມີແຟນເພງທີ່ຊື່ສັດ ແລະຂໍໂທດທີ່ເຮັດໃຫ້ພວກເຂົາຜິດຫວັງ, ຂ້ອຍຕ້ອງຂອບໃຈທີມແພດໝໍ ທີ່ເບິ່ງແຍງດູແລຂ້ອຍເປັນຢ່າງດີ”