ໜັງສືພິມ ປະຊາຊົນ ລາຍງານເມື່ອວັນທີ 24 ເມສາ 2017 ຜ່ານມາວ່າ ແຂວງບໍລິຄຳໄຊ ໄດ້ມີພິທີມອບ – ຮັບ ຫ້ອງການ ສະຫະພັນນັກຮົບເກົ່າຫຼັງໃໝ່ ເຊິ່ງໄດ້ຈັດຂຶ້ນເມື່ອບໍ່ດົນມານີ້ ທີ່ຫ້ອງການດັ່ງກ່າວ ໂດຍເປັນກຽດເຂົ້າຮ່ວມ ຂອງທ່ານ ລຳສະໄໝ ວໍລະ ສານ ຄະນະປະຈຳພັກແຂວງ ປະທານແນວລາວສ້າງຊາດ ແຂວງບໍລິຄຳໄຊ, ທ່ານ ພັນເອກ ຄຳຟອງ ບານທະວົງ ປະທານ ສະຫະພັນນັກຮົບເກົ່າແຂວງ, ພ້ອມດ້ວຍແຂກຖືກເຊີນ ແລະ ພາກສ່ວນກ່ຽວຂ້ອງເຂົ້າຮ່ວມ.

ໃນພິທີດັ່ງກ່າວ ໄດ້ມີພິທີ ເຊັນມອບ – ຮັບ ຢ່າງເປັນທາງການລະຫວ່າງຜູ້ຮັບເໝົາກໍ່ສ້າງແມ່ນ ທ່ານ ຄຳກິ່ງ ຂຸນມະບານ ປະທານບໍລິສັດ ສິງນຳຈະເລີນ ກໍ່ສ້າງຈຳກັດ ແລະ ເຈົ້າຂອງໂຄງການແມ່ນທ່ານ ພັນຕີ ທອງຄານ ສອນຄຳໄຊ ຮອງປະທານສະຫະພັນນັກຮົບ ເກົ່າແຂວງ ໂດຍຊ້ອງໜ້າເປັນສັກຂີພິຍານຂອງທ່ານ ລຳສະໄໝ ວໍລະສານ ແລະ ພາກສ່ວນທີ່ ກ່ຽວຂ້ອງເຂົ້າຮ່ວມຫ້ອງການ, ສຳລັບຫ້ອງການສະຫະພັນນັກຮົບເກົ່າຫຼັງໃໝ່ນີ້ນີ້ ໄດ້ດຳເນີນການກໍ່ສ້າງມາແຕ່ເດືອນ ກຸມພາ 2013 ຫາເດືອນເມສາ 2017 ຈຶ່ງໄດ້ສຳເລັດ 100% ຫ້ອງການນີ້ ມີຂະໜາດ 12 x 32 ແມັດ, ເປັນຕຶກສອງຊັ້ນ, ມຸງດ້ວຍ ກະເບື້ອງ, ມີ 24 ຫ້ອງ, ມີ 2 ຫ້ອງນ້ຳ ແລະ 1 ຫ້ອງປະຊຸມ ລວມມູນຄ່າການກໍ່ສ້າງທັງໝົດ 3,4 ຕື້ກວ່າກີບ ໂດຍແມ່ນ ທຶນຂອງລັດ 100%.