ບີບີຊີລາຍງານເມື່ອວັນທີ 21 ເມສາ 2017 ຜ່ານມາວ່າ ເກີດເຫດຊາຍເກົາຫຼີເໜືອອາຍຸ 57 ປີ ເສຍຊີວິດຫຼັງຈາກກິນຊີ້ນຄັນຄາກເຂົ້າໄປ ເພາະຄິດວ່າເປັນອື່ງທີ່ກິນໄດ້
ການສອບສວນພົບວ່າ ຊາຍຄົນນີ້ ພ້ອມດ້ວຍໝູ່ ຕັ້ງໃຈໄປຈັບກົບ ຈາກບໍລິເວນອ່າງເກັບນໍ້າແດຈອງ ມາກິນ ແລະຄິດວ່າ 5 ໂຕທີ່ພວກເຂົາຈັບໄດ້ຄືອື່ງ ຈາກນັ້ນບໍ່ພໍເທົ່າໃດວັນ ຈຶ່ງເອົາມາປຸງແຕ່ງອາຫານແລ້ວກິນນຳກັນ, ປາກົດວ່າ ຊາຍອາຍຸ 57 ປີ ເລີ່ມຮາກ ຈຶ່ງຮີບເອົາໄປໂຮງໝໍ ແຕ່ບໍ່ທັນການແລ້ວເພາະພິດເຂົ້າສູ່ຮ່າງກາຍແລ້ວ ເຮັດໃຫ້ລາວເສຍຊີວິດໃນເຊົ້າວັນຕໍ່ມາ
ຕຳຫຼວດເຜີຍວ່າ ກວດອາຫານທີ່ເຫຼືອຢູ່ ພົບສານບູໂຟເທນິນ ທີ່ປົກກະຕິພົບຢູ່ໃນຄັນຄາກ ແລະສອບສວນໄດ້ຄວາມວ່າ ຄັນຄາກທີ່ກິນເຂົ້າໄປນັ້ນ ມີລັກສະນະຄືກັບອື່ງ ຈຶ່ງເຮັດໃຫ້ຄົນເຂົ້າໃນຜິດ ເຊິ່ງໝູ່ເພື່ອນຂອງຜູ້ຕາຍນັ້ນ ກໍມີອາການໄດ້ຮັບພິດຄືກັນ ແຕ່ບໍ່ເຖິງຂັ້ນເສຍຊີວິດ
ທ່ານ ສະຕີເຟນ ອີວານ ຜູ້ສື່ຂ່າວບີບີຊີລາຍງານວ່າ ຄົນໃນຖິ່ນຊົນນະບົດບາງສ່ວນຂອງເກົາຫຼີເໜືອນິຍົມກິນກົບ ແລະອື່ງ ເຊິ່ງກໍລະນີນີ້ ຈຶ່ງຄາດວ່າຜູ້ຕາຍ ແລະໝູ່ ຄົງຈະເຂົ້າໃຈຜິດ, ໃນຂະນະທີ່ສານ Bufotenin ມີພິດເຮັດໃຫ້ຕາຍໄດ້