ບັນຫາກິ່ນຕົວແຮງ ໃຜບໍ່ເຄີຍເປັນອາດບໍ່ຮູ້ ແຕ່ຮູ້ວ່າຖ້າເມື່ອໃດຫາກພົບຄົນກິ່ນຕົວແຮງ ຕ້ອງກັ້ນຫາຍໃຈ ຫຼືຍ່າງໜີ ແຕ່ສຳລັບເຈົ້າຂອງກິ່ນເອງຄົງຄິດອີກແບບ ເຊິ່ງຜູ້ຂຽນເອງເຊື່ອວ່າ ຄົນທີ່ມີກິ່ນກາຍສ່ວນຫຼາຍຮູ້ຕົວເອງດີ ແລະອາດກຳລັງຫາວິທີແກ້ບັນຫາ ເຊິ່ງອາດລອງມາແລ້ວຫຼາຍວິທີ ແຕ່ຍັງບໍດີຈັກເທື່ອ ມື້ນີ້ລາວາໂພສມີວິທີ ການປັບການກິນມານຳສະເໜີ ເພື່ອແກ້ບັນຫາກິ່ນຕົວນີ້ໃຫ້ໝົດໄປ
- ຫຼີກລຽງອາຫານເຜັດ ທີ່ເຮັດໃຫ້ເຫື່ອອອກຫຼາຍເຊັ່ນ: ພິກໄທ, ໝາກເຜັດ
- ຫຼີກລຽງທາດແອວກໍຮໍ ແລະຄາເຟອິນ ເຮັດໃຫ້ເຫື່ອອອກຫຼາຍຈຶ້ນ
- ຫຼີກລຽງອາຫານທີ່ເຮັດໃຫ້ເຫື່ອມີກິ່ນເພີ່ມຂຶ້ນເຊັ່ນ: ສະໝຸນໄພທີ່ມີກິ່ນແຮ, ກະທຽມ, ຫົວຫອມບົ່ວ, ຫົວສີໄຄ, ຂ່າ, ຜັກໝາກໄມ້ທີ່ມີກິ່່ນແຮງເຊັ່ນ: ຖົ່ວລຽນ, ກະຫຼໍ່າ, ໝາກປີ
- ຫຼຸດອາການທີ່ກະຕຸ້ນໃຫ້ຕ່ອມໄຂມັນຜະລິດໄຂມັນອອກມາຫຼາຍ: ໂດຍສະເພາະໄຂມັນທີ່ມາຈາກຕ່ອມ Apocrine sweat gland ທີ່ກະຈາຍຢູ່ຕາມຂີ້ແຮ້, ໝີບຂາ ໂດຍຫຼີກລຽງອາຫານມັນ, ອາຫານທອດ, ຊ໊ອກໂກແລັດ
- ຫຼຸດການກິນຊີ້ນສັດ: ມີການວິໄຈທີ່ພິມອອກວາລະສານ Chemical Senses ຂອງມະຫາວິທະຍາໄລ Oxford ພົບວ່າ ຖ້າຫາກກິ່ນຊີ້ນແດງ ຈະເຮັດໃຫ້ກິ່ນຕົວແຮງຂຶ້ນ
- ເພີ່ມການກິນຜັກ ແລະໝາກໄມ້ໃຫ້ຫຼາຍ: ເພື່ອໃຫ້ໄດ້ໃຍອາຫານ ທີ່ພຽງພໍຕໍ່ການຍ່ອຍ ແລະດີທ໊ອກລຳໄສ້ແບບທຳມະຊາດ
- ຫຼຸດນໍ້າໜັກ: ຫາກນໍ້າໜັກຕົວເອງຫຼາຍເກີນໄປ ຄວນລົດທັນທີ ເພາະການຫຼຸດນໍ້າໜັກ ຊ່ວຍຫຼຸດການຂັບເຫື່ອ ແລະສານໄຂມັນຈາກຕ່ອມ Apocrine sweat gland ໄດ້ ແລະຊ່ວຍຫຼຸດຄວາມສ່ຽງຂອງການເປັນພະຍາດ ທີ່ອາດເຮັດໃຫ້ເຮົາມີກິ່ນຕົວ
- ຫາກເປັນພະຍາດເບົາຫວານ ພະຍາດຕັບ ຫຼືພະຍາດກ່ຽວກັບໝາກໄຂ່ຫຼັງ ຄວນປິ່ນປົວສຸຂະພາບຕາມແພດສັ່ງ ແລະກຳນົດອາຫານແນະນຳຕາມແພດສັ່ງ ເພາະຖ້າຫາກຮ່າງກາຍເຮົາຊຸດໂຊມລົງ ອາດເຮັດໃຫ້ຮ່າງກາຍມີກິ່ນທີ່ບໍ່ປະສົງໄດ້
ນອກຈາກອາຫານທີ່ກ່າວມານັ້ນແລ້ວ ຄວນເນັ້ນເລື່ອງການທຳຄວາມສະອາດຮ່າງກາຍ, ເຄື່ອງນຸ່ງຫົ່ມ ແລະການພັກຜ່ອນໃຫ້ພຽງພໍ, ຮູ້ຈັກວິທີການຮັບມືກັບຄວາມຄຽດ ສຳລັບການກິນປ້ອງກັນກິ່ນຕົວແຮງແມ່ນ ຄວນກິນອາຫານໃຫ້ຄົບ 5 ໝູ່, ອອກກຳລັງກາຍຢ່າງສະໝໍ່າສະເໝີ ເພື່ອຮັກສານໍ້າໜັກໃຫ້ຢູ່ໃນເກນປົກກະຕິ ເຊິ່ງເປັນປັດໄຈປ້ອງກັນເຊື້ອພະຍາດຕ່າງໆໄດ້