ສຳນັກຂ່າວປະເທດຈີນລາຍງານ ເມື່ອວັນທີ 21 ເມສາ 2017 ຜ່ານມາວ່າ ກຳມະກອນເລີ່ມຕິດຕັ້ງສ່ວນຫົວຂອງຮູບປັ້ນ “ຢາງອາຊາ” ເທບທິດາໃນຕຳນານ ຂອງຊົນເຜົ່າກຸ່ມນ້ອຍເຜົ່າມົ້ງ ຕັ້ງຢູ່ທີ່ເມືອງຈ້ຽນເຫີ ມົນທົນກູ້ຍໂຈ ທາງພາກຕາເວັນຕົກສ່ຽງໃຕ້ຂອງຈີນ ເຊິ່ງສຳເລັດແລ້ວກວ່າ 90% ແລະຄາດວ່າ ຈະສຳເລັດສົມບູນໃນຊ່ວງທ້າຍເດືອນເມສານີ້
ຮູບປັ້ນ ເທບທິດາດັ່ງກ່າວ ເລີ່ມກໍ່ສ້າງເມື່ອເດືອນພະຈິກ ປີ 2016 ມີຄວາມສູງເຖິງ 88 ແມັດ ຖືເປັນຮູບປັ້ນເທບທິດາ ຂອງຊາວມົ້ງທີ່ສູງທີ່ສຸດໃນປະເທດຈີນ ສ້າງຂຶ້ນເພື່ອລະລຶກເຖິງເທບທິດາດັ່ງກ່າວ ແລະເພື່ອດຶງດູດນັກທ່ອງທ່ຽວ