ສຳນັກຂ່າວຊິນຫົວຂອງຈີນລາຍງານເມື່ອວັນທີ 20 ເມສາ 2017 ຜ່ານມາວ່າ ທາງຈີນໄດ້ປ່ອຍຍານອະວະກາດຂົນສົ່ງສິນຄ້າ ຫຼືຄາໂກ້ ຂຶ້ນສູ່ຍານອະວະກາດ ເຊິ່ງຕັ້ງເປົ້າໝາຍ ທີ່ຈະສ້າງສະຖານີອະວະກາດນອກໂລກ ໃຫ້ໄດ້ໃນຊ່ວງປີ 2022
ຍານອະວະກາດທຽນໂຈ-1 ຖືກປ່ອຍຂຶ້ນສູ່ອະວະກາດ ທີ່ຖານປ່ອຍຈະລວດເຫວິິນຊາງ ໃນມົນທົນໄຫ່ໜານ ຍານອະວະກາດດັ່ງກ່າວ ຈະເຂົ້າໄປຈອດທີ່ສະຖານີວິໄຈອະວະກາດທຽນກົງ-2 ຂອງຈີນ ເພື່ອສົ່ງເຊື້ອເພີງ ແລະເຄື່ອງ ພ້ອມກັບທໍາການວິໄຈ ອະວະກາດ ກ່ອນທີ່ຈະກັບລົງສູ່ໂລກ
ຈີນຕັ້ງເປົ້າທີ່ຈະສ້າງ ສະຖານີອະວະກາດ ໃຫ້ໄດ້ໃນປີ 2022 ເຊິ່ງຄາດວ່າ ຈະໃຊ້ເວລາຕໍ່ຈາກນັ້ນຢ່າງໜ້ອຍ 10 ປີ ໃນການດຳເນີນການ ໂດຍການປ່ອຍຍານຂົນສົ່ງສິ່ງຂອງຄັ້ງທຳອິດນີ້ ຈະເປັນຄັ້ງສຳຄັນ ທີ່ຈະຊ່ວຍການຮັກສາ ແລະສ້ອມແຊມສະຖານີອະວະກາດໃນພາຍໜ້າ ເຊິ່ງຖ້າບໍ່ມີຍານອະວະກາດສົ່ງເຄື່ອງແລ້ວ ສະຖານີອະວະກາດຈະສູນເສຍພະລັງງານ ແລະເຄື່ອງໃຊ້ຈຳເປັນ ເຊິ່ງຈະເຮັດໃຫ້ຕົກລົງສູ່ໂລກກ່ອນເວລາທີ່ກຳນົດ
ສຳລັບ ທຽນໂຈ-1 ເປັນຍານອະວະກາດຂົນສົ່ງສິນຄ້າຂະໜາດຄວາມຍາວ 9 ແມັດ ກວ້າງ 3 ແມັດ ສາມາດບັນຈຸສິນຄ້າໄດ້ຫຼາຍເຖິງ 6,500 ກິໂລກຣາມ ຖືກອອກແບບໃຫ້ສາມາດເຕີມເຊື້ອເພີງ ແລະສະບຽງແກ່ຫ້ອງປະຕິບັດການທາງອາກາດ