ໃນວັນທີ 12 ເມສາ 2017 ຜ່ານມາ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ພ້ອມດ້ວຍຄະນະ ໄດ້ສືບຕໍ່ເຄື່ອນໄຫວຢ້ຽມຢາມ ແລະພົບປະພະນັກງານການນຳ ຢູ່ແຂວງຜົ້ງສາລີ ເຊິ່ງມີ ທ່ານ ຄຳເຈນ ວົງໂພສີ ເຈົ້າແຂວງໆຜົ້ງສາລີ ພ້ອມດ້ວຍບັນດາຄະນະນຳແຂວງ ແລະ ພະນັກງານຫຼັກແຫຼ່ງ ໃຫ້ການຕ້ອນຮັບ
ໃນການພົບປະຄັ້ງນີ້ ທ່ານຄຳເຈນ ວົງໂພສີ ໄດ້ລາຍງານສະພາບການຈັດຕັ້ງປະຕິບັດວຽກງານຮອບດ້ານຂອງແຂວງ ໃນໄລຍະ 1 ປີທີ່ຜ່ານມາ, ເຊິ່ງໃນປີ 2017 ລັດຖະບານ ໄດ້ອະນຸມັດໂຄງການລົງທຶນຂອງລັດ ທັງໝົດ 144 ໂຄງການ ມູນຄ່າກວ່າ 61 ຕື້ກີບ, ສາມາດດຶງດູດການລົງທຶນພາຍໃນ ແລະ ຕ່າງປະເທດ ໄດ້ 97 ໂຄງການ ມູນຄ່າ 277 ກວ່າລ້ານໂດລາສະຫະລັດ, ເອົາໃຈໃສ່ເຂົ້າໃນການປັບປຸງຍົກລະດັບເສັ້ນທາງຄົມມະນາຄົມ, ການສື່ສານ ແລະ ລະບົບຕາໜ່າງໄຟຟ້າ; ດ້ານງົບປະມານ ສາມາດເກັບລາຍຮັບໄດ້ກວ່າ 16 ຕື້ກີບ; ເປັນເຈົ້າການໃນການຈັດຕັ້ງປະຕິບັດຄໍາສັ່ງເລກທີ 15/ນຍ, ດ້ານການຜະລິດເປັນສິນຄ້າ ກໍ່ໄດ້ສືບຕໍ່ຈັດຕັ້ງປະຕິບັດນະໂຍບາຍ 6 ທາງອອກ ໂດຍການເຂົ້າຮ່ວມຂອງທຸກພາກສ່ວນ ເສດຖະກິດ ຄື: ທາງອອກໃນການຜະລິດກະສິກຳເນີນສູງ, ທາງອອກໃນການປະມົງ ຕາມອ່າງຮັບນ້ຳຂອງເຂື່ອນໄຟຟ້າ ແລະ ສາຍນ້ຳຕ່າງໆ; ທາງອອກໃນການດຳເນີນອຸດສາຫະກຳປຸງແຕ່ງ ຜະລິດຕະພັນກະສິກຳ-ປ່າໄມ້, ແຮ່ທາດ ແລະ ຫັດຖະກຳທີ່ເປັນມູນເຊື້ອ; ທາງອອກດ້ານການບໍລິການທົ່ວໄປ; ທາງອອກດ້ານການທ່ອງທ່ຽວທາງທຳມະຊາດ, ປະຫວັດສາດ ແລະ ວັດທະນະທຳ; ແລະ ທາງອອກດ້ານການຄ້າຊາຍແດນ. ດ້ານການພັດທະນາຊົນນະບົດ ແລະ ແກ້ໄຂຄວາມທຸກຍາກ ແມ່ນ ເຮັດໃຫ້ບ້ານທຸກຍາກຫຼຸດລົງເຫຼືອ 363 ບ້ານ ກວມ 69,27% ຂອງບັນດາບ້ານໃນທົ່ວແຂວງ ແລະ ຄອບຄົວທຸກຍາກຍັງເຫຼືອ 10.800 ກວ່າຄອບຄົວ ກວມ 25,33% ຂອງຄອບຄົວທັງໝົດ. ຄາດວ່າປີ 2017 ການຂະຫຍາຍຕົວທາງດ້ານເສດຖະກິດ ຈະບໍ່ຫຼຸດ 7%.
ທ່ານຮອງນາຍົກລັດຖະມົນຕີ ກໍ່ໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນງານການພັດທະນາ, ການຊີ້ນຳ-ນຳພາ ຂອງການນໍາແຂວງ-ເມືອງ ແລະທ່ານຍັງໄດ້ເນັ້ນບາງບັນຫາ ທີ່ແຂວງຈະຕ້ອງໄດ້ສືບຕໍ່ເອົາໃຈໃສ່ ເປັນຕົ້ນ ນຳໃຊ້ບັນດາວິສາຫະກິດພາຍໃນແຂວງ ທີ່ເປັນຖານເສດຖະກິດ ເພື່ອເປັນຂົວຕໍ່ຊອກຫາຕະຫຼາດ ອັນຈະນຳໄປສູ່ການຊຸກຍູ້ສົ່ງເສີມ ແລະ ເປີດກວ້າງການຜະລິດ ສ້າງເງື່ອນໄຂໃຫ້ມີການຈັດຕັ້ງກຸ່ມການຜະລິດ, ຊຸກຍູ້ການຜະລິດເປັນສິນຄ້າ ແລະ ສະບຽງອາຫານ ຕອບສະໜອງໃຫ້ແກ່ບັນດາໂຄງການໃຫຍ່ໆພາຍໃນແຂວງ, ເອົາໃຈໃສ່ປົກປັກຮັກສາເຄື່ອງປ່າຂອງດົງ ເພື່ອການຜະລິດທີ່ຍືນຍົງ; ສຸມໃສ່ບັນຫາດ້ານແຮງງານຕ່າງປະເທດ ໃຫ້ເຂົ້າສູ່ລະບຽບກົດໝາຍຂອງ ສປປ ລາວ ແລະ ສ້າງແຮງງານລາວ ໃຫ້ໄດ້ຄຸນນະພາບ, ມີວິໄນ ແລະ ປະຕິບັດລະບອບລະບຽບການເຮັດວຽກ ຢ່າງເຂັ້ມງວດ; ເອົາໃຈໃສ່ຈັດຕັ້ງປະຕິບັດຄຳສັ່ງເລກທີ 27/ນຍ ສືບຕໍ່ແກ້ໄຂປະກົດການຫຍໍ້ທໍ້ໃນສັງຄົມ, ສື່ສັງຄົມອອນລາຍ; ສົມທົບກັບທຸກພາກສ່ວນເສດຖະກິດ ຊຸກຍູ້ສົ່ງເສີມໃຫ້ພໍ່ແມ່ປະຊາຊົນບັນດາເຜົ່າ ຫັນມາທຳການຜະລິດ ແລະ ສ້າງອາຊີບທີ່ຍືນຍົງ ຕິດພັນກັບການພັດທະນາພື້ນຖານໂຄງລ່າງ ແລະ ວຽກງານ 3 ສ້າງ; ດ້ານການປົກຄອງ ກໍ່ໃຫ້ກວດກາກ່ຽວກັບພາລະບົດບາດ ແລະ ໜ້າທີ່ຂອງແຕ່ລະພະແນກການ ທີ່ໄດ້ມີການຊັບຊ້ອນວຽກງານຄືນໃໝ່; ເອົາໃຈໃສ່ສືບຕໍ່ປະຕິບັດບັນດານິຕິກຳ ຕາມແນວທາງນະໂຍບາຍຂອງພັກ ແລະ ລັດຖະບານ ວາງອອກແຕ່ລະໄລຍະ; ເພີ່ມທະວີ ວຽກງານຫ້ອງວ່າການ ໃນການເປັນເສນາທິການ ຕິດຕາມກວດກາ ແລະ ປະສານງານ ບັນດາວຽກງານຊ່ວຍການນຳຂອງແຂວງ, ຫັນການຄຸ້ມຄອງລັດ-ຄຸ້ມຄອງສັງຄົມ ດ້ວຍລະບຽບກົດໝາຍ; ສືບຕໍ່ການພົວພັນຮ່ວມມື ແລະ ປຸກລະດົມການຊ່ວຍເຫຼືອ ຈາກບັນດາປະເທດເພື່ອນມິດ ແລະ ຄູ່ຮ່ວມຍຸດທະສາດ; ດ້ານວຽກງານພັກ ແລະ ພະນັກງານ ແມ່ນຕ້ອງໄດ້ສຸມໃສ່ຈັດຕັ້ງຮ່ຳຮຽນ ຜັນຂະຫຍາຍມະຕິກອງປະຊຸມຄົບຄະນະບໍລິຫານງານສູນກາງພັກ ໃຫ້ເຂົ້າສູ່ຊີວິດຕົວຈິງ.
ແຫຼ່ງຂ່າວ: ຫ້ອງວ່າການສຳນັກງານນາຍົກລັດຖະມົນຕີ