ທ້າວ ໄຊຊະນະ ແກ້ວພິມພາ ຖືກຕຳຫຼວດຊຸດປາບປາມຢາເສບຕິດຂອງໄທຈັບກຸມ ໃນວັນທີ 19 ມັງກອນ 2017 ທີ່ສະໜາມບິນສາກົນສຸວັນນະພູມ ປະເທດໄທ ໃນຂໍ້ຫາຮ່ວມກັນຄ້າຢາເສບຕິດ ປະເພດຢາບ້າຈຳນວນ 1,200,000 ເມັດ ເຊິ່ງມາຮອດປັດຈຸບັນນີ້ເປັນເວລາ 3 ເດືອນເຕັມ ທີ່ຜູ້ກ່ຽວຖືກຈັບຄຸມໂຕ.
ຕາມຄຳຟ້ອງຂອງໄອຍະການ ເມື່ອວັນທີ 30 ກັນຍາ 2016 ຈຳເລີຍພ້ອມພວກ ໄດ້ຮ່ວມກັນເອົາຢາບ້າຈາກ ສປປ ລາວ ຊຸກເຊື່ອງໄວ້ໃນລົດຜ່ານດ່ານວຽງຈັນ-ໜອງຄາຍ ເຂົ້າໄປໃນໄທ. ວັນທີ 1 ຕຸລາ 2016 ຕຳຫຼວດສາມາດຈັບເຄືອຂ່າຍຈຳເລີຍ ພ້ອມທັງຢຶດຢາບ້າຂອງກາງ ແລະຂະຫຍາຍຜົນການຈັບກຸມ ກ່ອນຈະສາມາດຈັບກຸມຈຳເລີຍໄດ້ ໃນວັນທີ 19 ມັງກອນ 2017 ທີ່ສະໜາມບິນສາກົນ ສຸວັນນະພູມ ປະເທດໄທ ເຊິ່ງໃນຊັ້ນສອບສວນນັ້ນ ຈຳເລີຍໄດ້ຮັບສາລະພາບ.
ຫຼ້າສຸດມື້ວານນີ້ ວັນທີ 18 ເມສາ 2017 ສານອາຍາຂອງໄທ ໄດ້ເບີກໂຕທ້າວໄຊຊະນະ ແລະອ່ານຂໍ້ກ່າວຫາໃຫ້ຟັງເຂົ້າໃຈທຸກປະການ ຈາກນັ້ນ ທ້າວໄຊຊະນະ ໄດ້ຖະແຫຼງໃຫ້ການປະຕິເສດທຸກຂໍ້ກ່າວຫາ ໂດຍຈັດຄຳຖະແຫຼງເປັນລາຍລັກອັກສອນສະເໜີຕໍ່ສານພິຈາລະນາ.
ທ່ານ ວໍລະກອນ ພົງທະນາກອນ ທະນາຍຄວາມຂອງ ທ້າວ ໄຊຊະນະ ກ່າວວ່າ: ຕົນເອງຮູ້ສຶກໜັກໃຈພໍສົມຄວນ ເນື່ອງຈາກຄະດີມີໂທດສູງສຸດເຖິງຂັ້ນປະຫານຊີວິດ ແຕ່ກໍຈະຂໍສູ້ຄະດີໃຫ້ເຖິງທີ່ສຸດ. ພ້ອມທັງກ່າວວ່າ ທ້າວ ໄຊຊະນະ ມີຄວາມກັງວົນຢ່າງແຮງ ເນື່ອງຈາກບໍ່ເຄີຍຖືກໂທດມາກ່ອນ. ສ່ວນການຍື່ນຫຼັກຊັບປະກັນໂຕນັ້ນ ແມ່ນຈະຕ້ອງໃຫ້ຍາດພີ່ນ້ອງຂອງຜູ້ກ່ຽວເປັນຜູ້ດຳເນີນການ ເຊິ່ງຜູ້ກ່ຽວແລະຍາດພີ່ນ້ອງແມ່ນມີພູມລຳເນົາຢູ່ປະເທດລາວ.
ວິດີໂອຂ່າວຈາກ: ໄທພີບີເອັສ