spot_img
Homeຂ່າວທ້ອງຖິ່ນການກໍ່ສ້າງເຂື່ອນໄຟຟ້ານ້ຳອູ 7 ມີຄວາມຄືບໜ້າ 10%

ການກໍ່ສ້າງເຂື່ອນໄຟຟ້ານ້ຳອູ 7 ມີຄວາມຄືບໜ້າ 10%

Published on

ເມື່ອວັນທີ 19 ເມສາ 2017 ນີ້ ເຟສບຸກ ສຳໜັກຂ່າວສານປະເທດລາວ ລາຍງານວ່າ ການກໍ່ສ້າງເຂື່ອນໄຟຟ້ານ້ຳອູ 7 ມີຄວາມຄືບໜ້າ 10%, ຄາດວ່າໃນທ້າຍປີ 2017 ຈະໄດ້ມີການອວຍນ້ຳ ເພື່ອດຳເນີນການກໍ່ສ້າງໂຕເຂື່ອນ ແລະ ຈະສຳເລັດພາຍໃນປີ 2020. ຫລ້າສຸດ ອາທິດຜ່ານມາ, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ພ້ອມດ້ວຍຄະນະ ໄດ້ໄປຢ້ຽມຢາມ ແລະ ຊຸກຍູ້ການຈັດຕັ້ງປະຕິບັດ ໂຄງການເຂື່ອນໄຟຟ້ານ້ຳຕົກ ນ້ຳອູ-6 ແລະ ນ້ຳອູ-7 ທີ່ເມືອງ ແລະ ແຂວງຜົ້ງສາລີ ໂດຍມີ ທ່ານ ຄຳເຈນ ວົງໂພສີ ເຈົ້າແຂວງຜົ້ງສາລີ ພ້ອມດ້ວຍບັນດາ ຄະນະນຳແຂວງ ແລະ ຄະນະຮັບຜິດຊອບໂຄງການ ໃຫ້ການຕ້ອນຮັບ.

ການຢ້ຽມຢາມຄັ້ງນີ້ ໄດ້ຮັບຟັງການລາຍງານ ກ່ຽວກັບການຈັດຕັ້ງປະຕິບັດ ແລະ ວຽກງານຈຸດສຸມ ຂອງໂຄງການເຂື່ອນໄຟຟ້ານ້ຳຕົກ ນ້ຳອູ-6 ແລະ ນ້ຳອູ-7 ເຊິ່ງເປັນ 2 ເຂື່ອນ ທີ່ນອນຢູ່ໃນໂຄງການກໍ່ສ້າງ ເຂື່ອນໄຟຟ້າຕາມສາຍນ້ຳອູ ແລະ ເປັນເຂື່ອນລະບົບຂັ້ນໄດ ໂດຍເປັນການລົງທຶນຮ່ວມ ລະຫວ່າງ ບໍລິສັດ ຊິໂນໄຮໂດຣ ແຫ່ງ ສປ ຈີນ ຖືຫຸ້ນ 85% ກັບລັດວິສາຫະກິດ ໄຟຟ້າລາວ ຖືຫຸ້ນ 15% ໃນຮູບແບບກໍ່ສ້າງ, ດຳເນີນງານ ແລະ ມອບໂອນຄືນໃຫ້ລັດຖະບານ (BOT) ໃນໄລຍະສຳປະທານ 29 ປີ ນັບຈາກມື້ຂາຍໄຟຟ້າເປັນທາງການ. ໃນນັ້ນ, ເຂື່ອນໄຟຟ້ານ້ຳອູ 6 ແມ່ນມີກຳລັງຕິດຕັ້ງ 180 ເມັກກາວັດ, ສາມາດຜະລິດ ພະລັງງານໄຟຟ້າໄດ້ 739 ກິກະວັດໂມງຕໍ່ປີ ຊຶ່ງສຳເລັດການກໍ່ສ້າງ ແລະ ຂາຍໄຟຟ້າ ມາແຕ່ທ້າຍປີ 2016 ມູນຄ່າການກໍ່ສ້າງ 380 ກວ່າລ້ານໂດລາສະຫະລັດ. ສ່ວນເຂື່ອນໄຟຟ້ານ້ຳອູ 7 ມີກຳລັງຕິດຕັ້ງ 210 ເມັກກາວັດ. ປັດຈຸບັນ ພວມດຳເນີນການກໍ່ສ້າງ ໄດ້ປະມານ 10%, ໃນທ້າຍປີ 2017 ຈະໄດ້ມີການອວຍນ້ຳ ເພື່ອດຳເນີນການກໍ່ສ້າງໂຕເຂື່ອນ ແລະ ຄາດວ່າຈະສຳເລັດ ແລະ ຂາຍໄຟຟ້າໄດ້ ໃນປີ 2020 ຊຶ່ງບັນດາເຂື່ອນນ້ຳອູເຫລົ່ານີ້ ລັດຖະບານລາວ ໄດ້ໃຫ້ຄວາມສຳຄັນ ເພື່ອຕອບສະໜອງໄຟ ຟ້າໃຫ້ແກ່ບັນດາແຂວງ ພາກເໜືອຂອງລາວ ອັນເປັນການປະກອບສ່ວນ ແລະ ຍົກລະດັບຊີວິດການເປັນຢູ່ ຂອງພໍ່ແມ່ປະຊາຊົນໃຫ້ດີຂຶ້ນ ເທື່ອລະກ້າວ. ນອກຈາກນີ້, ທ່ານຮອງນາຍົກ ລັດຖະມົນຕີ ແລະ ຄະນະ ຍັງໄດ້ຮັບຟັງວຽກງານ ການຍົກຍ້າຍຈັດສັນ ແລະ ຄຸ້ມຄອງສິ່ງແວດລ້ອມ ໂດຍສະເພາະ ກໍ່ແມ່ນວຽກງານການຍົກຍ້າຍ ຈັດສັນທີ່ຢູ່ອາໄສ ແລະ ອາຊີບໝັ້ນທ່ຽງ ຂອງປະຊາຊົນ ທີ່ໄດ້ຮັບຜົນກະທົບ ຈາກໂຄງການ, ການຊົດເຊີຍ, ການສຸມໃສ່ແກ້ບັນຫາ ສິ່ງເສດເຫລືອ ແລະ ການບຳບັດນ້ຳເປື້ອນ ໃນໄລຍະການກໍ່ສ້າງຂອງໂຄງການ, ການອະນາໄມໜ້າເຂື່ອນ ແລະ ສືບຕໍ່ສຸມໃສ່ ຊອກຫາອາຊີບທີ່ຍືນຍົງ ໃຫ້ແກ່ຄອບຄົວ ແລະ ຜູ້ທີ່ຖືກຜົນກະທົບ.

ໂອກາດນີ້, ທ່ານ ສອນໄຊ ສີພັນດອນ ຍັງໄດ້ເນັ້ນໃຫ້ ຜູ້ຮັບຜິດຊອບໂຄງການ ຕ້ອງໄດ້ເອົາໃຈໃສ່ ໂຄສະນາເຜີຍແຜ່ ໃຫ້ປະຊາຊົນເຫັນໄດ້ຄວາມສຳຄັນ ຂອງການພັດທະນາໂຄງການ ແລະ ເຂົ້າຮ່ວມສະໜັບສະໜູນ ໂຄງການຢ່າງເປັນຂະບວນ, ການຊົດເຊີຍ ກໍ່ຕ້ອງປະຕິບັດ ຕາມຫລັກການລວມສູນ ເປັນເອກະພາບກັນ, ການຈັດສັນອາຊີບ ຕ້ອງໄດ້ສອດຄ່ອງກັບ ການຜະລິດເປັນສິນຄ້າ, ໂຄງການຄ້ຳປະກັນ ສະບຽງອາຫານ ແລະ ຜະລິດສິນຄ້າສົ່ງອອກໄປ ສປ ຈີນ, ສົມທົບກັບໂຄງການ ສຸມໃສ່ການປູກ-ການລ້ຽງ ທີ່ແທດເໝາະກັບສະພາບຕົວຈິງຂອງທ້ອງຖິ່ນ ໂດຍສະເພາະ ອີງໃສ່ສິນຄ້າທີ່ເປັນ ຄວາມຕ້ອງການຂອງຕະຫລາດ, ເອົາໃຈໃສ່ເກັບກູ້ໄມ້ອອກຈາກ ເຂດນ້ຳຖ້ວມຂອງອ່າງ ເພື່ອບໍ່ໃຫ້ມີການສູນເສຍ ຊັບພະຍາກອນໄມ້ ແລະ ຜົນກະທົບຕໍ່ສັດນ້ຳ, ເອົາໃຈໃສ່ຕື່ມ ໃນການສ້າງແຜນງານ ພັດທະນາບໍລິເວນອ່າງນ້ຳ ທັງທາງດ້ານການປະມົງ, ການລ້ຽງປາ, ແຜນງານນຳໃຊ້ນ້ຳ ເພື່ອເຮັດກະສິກຳ ແລະ ແຜນງານທ່ອງທ່ຽວ ພາຍໃນອ່າງ, ສົມທົບກັນປັບປຸງ ແລະ ກໍ່ສ້າງເສັ້ນທາງ ຄົມມະນາຄົມຄືນໃໝ່ ເພື່ອພັດທະນາບ້ານ ທີ່ໄດ້ຮັບຜົນກະທົບ ແລະ ອຳນວຍຄວາມສະດວກ ໃຫ້ແກ່ການໄປ ມາຫາສູ່ຂອງປະຊາຊົນ, ເອົາໃຈໃສ່ສ້າງລະບົບການ ພະຍາກອນອາກາດ ແລະ ການບໍລິຫານຈັດການນ້ຳ ເພື່ອຮັບມືກັບການເກີດໄພພິບັດ ໃນແຕ່ລະປີ.

ບົດຄວາມຫຼ້າສຸດ

ການຈັດການຂີ້ເຫຍື້ອທີ່ດີ ຄືຄວາມປອດໄພຕໍ່ສະພາບແວດລ້ອມ ແລະ ສັງຄົມ

ການຈັດການຂີ້ເຫຍື້ອ ຍັງເປັນສິ່ງທີ່ທ້າທ້າຍໃນແຕ່ລະຂົງເຂດ ຕັ້ງແຕ່ເຮືອນຊານ, ຫ້າງຮ້ານ, ບໍລິສັດ ຈົນໄປເຖິງບັນດາໂຮງງານຜະລິດຕ່າງໆ. ເນື່ອງຈາກເປັນໄປບໍ່ໄດ້ທີ່ຈະຫຼີກລ່ຽງບໍ່ໃຫ້ມີການສ້າງຂີ້ເຫຍື້ອເລີຍ. ເຊິ່ງບາງຄັ້ງຍັງພົບເຫັນການທຳລາຍ ແລະ ຈັດການຂີ້ເຫຍື້ອຢ່າງບໍ່ຖືກວິທີ ທີ່ສົ່ງຜົນເສຍຕໍ່ສິ່ງແວດລ້ອມ ແລະ ສ້າງຄວາມເປີເປື້ອນໃຫ້ສັງຄົມ ເຊັ່ນ:...

ຮູ້ຫຼືບໍ່? ທີ່ໄປທີ່ມາຂອງຊື່ພາຍຸແຕ່ລະລູກ ໃຜເປັນຄົນຕັ້ງ ແລະ ໃຜເປັນຄົນຄິດຊື່

ພາຍຸແຕ່ລະລູກ ໃຜເປັນຄົນຕັ້ງ ແລະ ໃຜເປັນຄົນຄິດຊື່ ມາຮູ້ຄຳຕອບມື້ນີ້ ພາຍຸວິພາ, ພາຍຸຄາຈິກິ ໄດ້ມາຈາກໃສ ໃນໄລຍະນີ້ເຫັນວ່າມີພາຍຸກໍ່ໂຕຂຶ້ນມາຕະຫຼອດ ແລະມີຫຼາຍຄົນອາດຈະສົງໃສວ່າ ໃນການຕັ້ງຊື່ພາຍຸແຕ່ລະລູກ ແມ່ນໃຜເປັນຄົນຕັ້ງ ແລະຄໍາຕອບກໍຄື ຊື່ຂອງພາຍຸແມ່ນໄດ້ຖືກຕັ້ງຂຶ້ນຈາກປະເທດຕ່າງໆໃນທົ່ວໂລກ. ສຳລັບພາຍຸທີ່ສາມາດຕັ້ງຊື່ໄດ້ນັ້ນ ຕ້ອງແມ່ນພາຍຸລະດັບໂຊນຮ້ອນຂຶ້ນໄປ...

ແຈ້ງເຕືອນພາຍຸລູກໃໝ່ ທີ່ອາດຈະສົ່ງຜົນກະທົບຕໍ່ປະເທດລາວ ໃນວັນທີ 30/08/2025 – 02/09/2025

ກຽມຮັບມືພາຍຸລູກໃໝ່ ຫວຽດນາມອອກແຈ້ງເຕືອນພາຍຸລູກໃໝ່ ອາດສົ່ງຜົນກະທົບຕໍ່ປະເທດລາວ, ປະເທດໄທ ແລະ ປະເທດຫວຽດນາມ ຫວຽດນາມອອກແຈ້ງເຕືອນພາຍຸລູກໃໝ່ ທີ່ຄາດວ່າຈະໃຊ້ຊື່ວ່າພາຍຸໜອງຟ້າ ຫຼື ຟ້າໃສ ທີ່ຕັ້ງຊື່ໂດຍປະເທດລາວ ຄາດອິດທິພົນຂອງພາຍຸລູກນີ້ຈະສົ່ງຜົນກະທົບຕໍ່ປະເທດລາວ, ປະເທດໄທ ແລະ ປະເທດຫວຽດນາມ...

ຜົນສໍາເລັດ ກອງປະຊຸມໃຫຍ່ ຜູ້ແທນສະມາຊິກພັກ ຄັ້ງທີ III ຂອງ ອົງຄະນະພັກ ກະຊວງເຕັກໂນໂລຊີ ແລະ ການສື່ສານ

ເອກະສັນຮັບເລືອກ ສະຫາຍ ປອ. ສັນຕິສຸກ ສິມມາລາວົງ ເປັນເລຂາຄະນະພັກ ກະຊວງເຕັກໂນໂລຊີ ແລະ ການສື່ສານ (ຊຸດໃໝ່) ກະຊວງເຕັກໂນໂລຊີ ແລະ ການສື່ສານລາຍງານຜົນ ກອງປະຊຸມໃຫຍ່ ຜູ້ແທນສະມາຊິກພັກ...