ຜູ້ໂດຍສານສາຍໃຕ້ (ຫຼັກຊາວ-ວຽງຈັນ) ນໍ້າຕາຕົກໃນ ເຈົ້າຂອງລົດຮັບຜູ້ໂດຍສານເກີນຈຳນວນຕັ່ງນັ່ງ ພ້ອມທັງເກັບເງິນຄ່າລົດແພງກວ່າປົກກະຕິ.
ວັນທີ 16 ເມສາ 2017 ທີ່ຜ່ານມາຜູ້ໂດຍສານທ່ານໜຶ່ງ ທີ່ບໍ່ປະສົງອອກນາມໄດ້ແຈ້ງຕໍ່ນັກຂ່າວພວກເຮົາວ່າ ຕົນເອງໄດ້ເດິນທາງຈາກຫຼັກຊາວ ຂຶ້ນໄປຍັງເມືອງປາກຊັນ ແຂວງບໍລິຄຳໄຊ ດ້ວຍສະພາບລົດທີ່ແອອັດຫຍັດແຫຍ້ ພ້ອມກັນນັ້ນພໍເຖິງເວລາເກັບເງິນກໍເກັບແພງກວ່າປົກກະຕິ ຄືຈາກຫຼັກຊາວ-ປາກຊັນ ໂດຍປົກກະຕິແລ້ວແມ່ນບໍ່ເກີນ 50,000 ກີບ ແຕ່ສຳລັບມື້ນີ້ ພໍຮອດເວລາເກັບເງິນ (ລະຫວ່າງການເດິນທາງ) ເຈົ້າຂອງລົດໄດ້ແຈ້ງວ່າ ຈະຂຶ້ນຢູ່ໃສລົງໃສ ກໍເກັບໃນລາຄາດຽວລວດ ຄື 85,000 ກີບ.
ນອກຈາກນັ້ນ, ສະພາບການຮັບຜູ້ໂດຍສານກໍເກີນຄວາມຈຸຂອງລົດ ໂດຍບອກຜູ້ໂດຍສານທີ່ລັດຂຶ້ນກາງທາງວ່າ ຂຶ້ນມາໂລດຈັກໜ້ອຍຈະມີຄົນລົງແລ້ວກໍຈະໄດ້ເຂົ້ານັ່ງເບາະ ແລ້ວກໍເອົາຕັ່ງຢາງຫົວກຸດຢາຍໃສ່ທາງຍ່າງເທິງລົດໃຫ້ຄົນນັ່ງຕິດໆກັນເລີຍ ຈົນບໍ່ສາມາດຍ່າງເຂົ້າຫຼືອອກໄດ້.
ຜູ້ໂດຍສານຄົນດຽວກັນໄດ້ກ່າວຕື່ມວ່າ: ການຮັບຜູ້ໂດຍສານຫຼາຍຄືຈັ່ງຊີ້ນອກຈາກຈະຜິດຕໍ່ກົດໝາຍວ່າດ້ວຍການຄຸ້ມຄອງຜູ້ບໍລິໂພກແລ້ວ ຍັງສ່ຽງຕໍ່ອຸບັດເຫດເປັນຢ່າງສູງ ເນື່ອງຈາກເສັ້ນທາງຫຼັກຊາວຜ່ານພູສູງຊັນ ຄົດລ້ຽວ ອັນຕະລາຍ ຫຼືຖ້າຫາກເກີດອຸບັດເຫດຂຶ້ນມາ ມີໄຟໄໝ້ລົດ ຜູ້ໂດຍສານກໍບໍ່ສາມາດແລ່ນອອກໄດ້.
ເມື່ອນັກຂ່າວເຮົາຖາມວ່າ ຕະຫຼອດການເດິນທາງໄດ້ມີເຈົ້າໜ້າທີ່ຕຳຫຼວດຈະລາຈອນລັດແລະກວດກາເບິ່ງການບໍລິການຂອງລົດເມຄັນດັ່ງກ່າວຫຼືບໍ່?. ກໍໄດ້ຄຳຕອບວ່າ: ຕະຫຼອດການເດິນທາງແມ່ນຜ່ານຈຸດກວດຂອງເຈົ້າໜ້າທີ່ຈະລາຈອນບ່ອນໜຶ່ງ ເຊິ່ງລົດເມຄັນດັ່ງກ່າວກໍໄດ້ຈອດ ແຕ່ບໍ່ເຫັນມີເຈົ້າໜ້າທີ່ເພິ່ນຂຶ້ນມາກວດເບິ່ງເທິງລົດເລີຍ.
ສຸດທ້າຍຜູ້ໂດຍສານໄດ້ກ່າວວ່າ ຢາກໃຫ້ມີບ່ອນແຈ້ງຕໍ່ພາກສ່ວນທີ່ກ່ຽວຂ້ອງ ຕິດໄວ້ເທິງລົດເມທຸກຄັນ ເຊັ່ນ ເບີໂທຂອງຕຳຫຼວດຈະລາຈອນ ຫຼືໜ່ວຍງານທີ່ຮັບຜິດຊອບຄຸ້ມຄອງການແລ່ນລົດໂດຍສານ ເມື່ອຜູ້ໂດຍສານບໍ່ໄດ້ຮັບຄວາມເປັນທຳຈະໄດ້ໂທແຈ້ງ. ເພາະແນ່ນອນວ່າຜູ້ໂດຍສານບໍ່ກ້າທີ່ຈະຖົກຖຽງກັບເຈົ້າຂອງລົດເທິງລົດເມໂດຍເດັດຂາດ ເພາະເວລາເກັບເງິນແມ່ນເພິ່ນມັກຈະເກັບຫຼັງຈາກລົດແລ່ນອອກໄປໄກແລ້ວ ຫຼືກຳລັງແລ່ນຢູ່ໃນເຂດຫ່າງໄກຊຸມຊົນ, ຖ້າມີການໂວຍວາຍຂຶ້ນກໍອາດຈະຖືກໄລ່ລົງລົດກໍໄດ້.
