ອີງຕາມຂ່າວຈາກຕ່າງປະເທດ ທັງຊີເອັນເອັນ ແລະບີບີຊີ ຕ່າງກໍໄດ້ນຳສະເໜີຂ່າວວ່າ ເຊົ້າໆມື້ນີ້ (ວັນທີ 16 ເມສາ 2017) ເກົາຫຼີເໜືອໄດ້ທົດລອງຂີປະນາວຸດຕາມທີ່ຫຼາຍຝ່າຍຄາດການເອົາໄວ້ ພາຍຫຼັງສະເຫຼີມສະຫຼອງວັນຄ້າຍວັນເກີດ ປະທານ ກິມ ອິນຊຸງ ຜູ້ກໍ່ຕັ້ງເກົາຫຼີເໜືອ ບໍ່ທໍ່ໃດຊົ່ວໂມງ.
ຄວາມຕຶງຄຽດໃນແຫຼມເກົາຫຼີທີ່ມີມາຫຼາຍວັນ ໄດ້ເພິ່ມຄວາມຕຶງຄຽດຂຶ້ນຕື່ມເມື່ອການຂ່າວຈາກ ເກົາຫຼີໃຕ້ລາຍງານວ່າ ເກົາຫຼີເໜືອໄດ້ພະຍາຍາມທົດລອງຂີປະນາວຸດຄັ້ງໃໝ່ອີກ ເພາະນັ້ນເປັນການທ້າທາຍຕໍ່ຄຳຂູ່ຂອງສະຫະລັດວ່າ ຖ້າຫາກມີການທົດລອງຂີປະນາວຸດອີກ ເກົາຫຼີເໜືອຈະຖືກໂຈມຕີຈາກສະຫະລັດທັນທີ. ໃນຂະນະດຽວກັນກໍເປັນການຢືນຢັນວ່າ ເກົາຫຼີເໜືອບໍ່ໄດ້ງໍ້ງ່ຽງ ຫຼືຢ້ານກົວຕໍ່ຄຳຂູ່ຂອງສະຫະລັດເລີຍ ເກົາຫຼີເໜືອບອກວ່າ ຕົນພ້ອມຈະເຮັດສົງຄາມກັບສະຫະລັດທຸກຮູບແບບ ເພື່ອປົກປ້ອງຕົນເອງແລະຕອບໂຕ້ຄືນຢ່າງໄຮ້ປານີ ເຊິ່ງເປົ້າໝາຍການໂຈມຕີຫຼັກຂອງເກົາຫຼີເໜືອນັ້ນ ເຊື່ອວ່າ ເປັນຖານທັບສະຫະລັດໃນເກົາຫຼີໃຕ້ແລະໃນຍີ່ປຸ່ນ, ທັບເຮືອບັນທຸກເຄື່ອງບິນຂອງສະຫະລັດໃນທະເລ ແລະລວມທັງປະເທດສະຫະລັດອາເມລິກາພ້ອມ.
ແນວໃດກໍຕາມ, ຕາມຂ່າວແລ້ວ ຍັງບໍ່ສາມາດຢືນຢັນໄດ້ວ່າ ຂີປະນາວຸດ ທີ່ເກົາຫຼີເໜືອທຳການທົດລອງຄັ້ງນີ້ ຈະເປັນຂີປະນາວຸດລະດັບໃດ ພິໄສໃກ້, ພິໄສກາງ ຫຼືພິໄສໄກ ກັນແທ້ ແຕ່ເຊື່ອວ່າການທົດລອງຄັ້ງນີ້ບໍ່ປະສົບຜົນສຳເລັດ.
ເປັນຂ່າວທີ່ເຮົາຄົງຕ້ອງໄດ້ຕິດຕາມຢ່າງໃກ້ຊິດ ເບິ່ງວ່າທ່າທີຂອງສະຫະລັດຈະອອກມາແນວໃດຕໍ່ໄປ ສົງຄາມຈະເກີດແທ້ຫຼືບໍ່ ຕ້ອງຕິດຕາມນຳກັນຕໍ່ໄປ.