ສຳນັກຂ່າວຢອນຮັນ ລາຍງານເມື່ອວັນທີ 10 ເມສາ 2017 ຜ່ານມາວ່າ ກະຊວງການຕ່າງປະເທດເກົາຫຼີໃຕ້ ກຽມອອກໜັງສືເດີນທາງອັກສອນເບລ ໃນເດືອນນີ້ ເພື່ອອຳນວຍຄວາມສະດວກແກ່ຄົນທີ່ພິການທາງສາຍຕາໃນການເດີນທາງໄປຕ່າງປະເທດ

ກະຊວງການຕ່າງປະເທດບອກວ່າ ຈະເລີ່ມບໍລິການໜັງສືເດີນທາງອັກສອນເບລ ຕັ້ງແຕ່ວັນທີ 20 ເມສາ 2017 ເປັນຕົ້ນໄປ ທີ່ສຳນັກງານບໍລິການໜັງສື ເດີນທາງໃນປະເທດ 240 ແຫ່ງ ແລະຕ່າງປະເທດ 70 ແຫ່ງ ເຊິ່ງຂໍ້ມູນຕ່າງໆຂອງຜູ້ຖືບັດເຊັ່ນ: ນາມສະກຸນ, ເລກໜັງສືເດີນທາງລວມທັງວັນທີອອກ ແລະໝົດອາຍຸຂອງໜັງສືເດີນທາງ ຈະຢູ່ໃນຮູບແບບສະຕິກເກີ ອັກສອນເບລ ເຊິ່ງຈະແນບຢູ່ດ້ານຫຼັງຂອງໜ້າທຳອິດ

ກະຊວງການຕ່າງປະເທດຍັງບອກອີກວ່າ ການອອກໜັງສືເດີນທາງອັກສອນເບລໃນຄັ້ງນີ້ ຖືເປັນຄັ້ງທຳອິດຂອງໂລກ ເຊິ່ງຄາດຫວັງວ່າ “ໜັງສືເດີນທາງອັກສອນເບລ ຈະຊ່ວຍອຳນວຍຄວາມສະດວກທີ່ສຳຄັນ ໃຫ້ກັບຜູ້ທີ່ມີບັນຫາທາງສາຍຕາໄດ້ ຫຼັງຈາກທີ່ພວກເຂົາເຫຼົ່ານີ້ ຕ້ອງພົບກັບບັນຫາໃນການຈອງປີ້ຍົນ ແລະໂຮງແຮມ ເນື່ອງຈາກຄວາມຍາກລຳບາກໃນການຢືນຢັນຂໍ້ມູນຂອງຕົນເອງຈາກໜັງສືເດີນທາງ”