ການຈັບກຸມຜູ້ລັກລອບເຂົ້າເມືອງແບບຜິດກົດໝາຍ ຈາກແມັກຊີໂກ ມາສະຫະລັດອາເມລິກາ ຫຼຸດລົງຫຼາຍທີ່ສຸດໃນຮອບ 17 ປີ ຫຼັງຈາກທ່ານ ໂດນັນ ທັມ ເປັນປະທານາທິບໍດີ ປະກາດໃຊ້ນະໂຍບາຍເຂັ້ມງວດ ກວດຄົນຢ່າງຈິງຈັງຕໍ່ຄົນກຸ່ມນີ້ ໂດຍໃນເດືອນມີນາຜ່ານມາ ມີຜູ້ຖືກຈັບກຸມພຽງແຕ່ 1,700 ຄົນເທົ່ານັ້ນ ເຊິ່ງຖືວ່າເປັນຕົວເລກທີ່ໜ້ອຍທີ່ສຸດນັບຕັ້ງແຕ່ປີ 2000 ເປັນຕົ້ນມາ ການຫຼຸດລົງດັ່ງກ່າວນີ້ ຍັງລວມເຖິງຕົວເລກຂອງເດັກນ້ອຍທີ່ບໍ່ທັນບັນລຸພາວະ ທີ່ເດີນທາງມາຄົນດຽວ
ທ່ານ ຈອນ ເຄລລີ ລັດຖະມົນຕີກະຊວງຄວາມໝັ້ນຄົງແຫ່ງມາຕຸພູມຂອງສະຫະລັດ ໄດ້ກ່າວກັບລັດຖະສະພາສະຫະລັດວ່າ ການຫຼຸດລົງຂອງຜູ້ອົບພະຍົບຈາກອາເມລິກາງ ມາສະຫະລັດ ເປັນຈຳນວນຫຼາຍ ທີ່ເກີດຂຶ້ນເປັນເລື່ອງເຫຼືອເຊື່ອ ແຕ່ບໍ່ແມ່ນເລື່ອງອຸປະຕິເຫດ ເພາະເປັນສິ່ງທີ່ເກີດຂຶ້ນຈາກການດຳເນີນນະໂຍບາຍຂອງປະທານາທິບໍດີທັມ ແລະເປັນການຫຼຸດຢ່າງຕໍ່ເນື່ອງຕິດຕໍ່ກັນເປັນເດືອນທີ 5 ຫຼືຫຼຸດລົງປະມານ 71% ເມື່ອທຽບກັບຕົວເລກໃນເດືອນທັນວາ 2016 ຜ່ານມາ ທີ່ມີຍອດການຈັບກຸມສູງເຖິງ 58,478 ຄົນ
ເຖິງແມ່ນວ່າ ຕົວເລກທີ່ຫຼຸດລົງຂອງຜູ້ທີ່ພະຍາຍາມ ຈະເຂົ້າມາຍັງສະຫະລັດ ໂດຍຜິດກົດໝາຍຈະເປັນຂ່າວດີ ແຕ່ຕ້ອງເຮັດໃຫ້ແນ່ໃຈວ່າ ການຮັກສາຄວາມປອດໄພ ຕາມຊາຍແດນທາງພາກໃຕ້ຂອງປະເທດ ຈະຍັງຄົງໄດ້ຮັບຄວາມສຳຄັນ ເພາະເປັນການປ້ອງກັນປະເທດຈາກກຸ່ມກໍ່ການຮ້າຍ ແລະກຸມອາຊະຍາກຳອື່ນໆ