ສະໜາມກີລາເປີດ-ປິດ ເພື່ອຮັບໃຊ້ງານມະຫາກຳກີລາແຫ່ງຊາດຄັ້ງທີ 11 ທີ່ຊຽງຂວາງຈະເປັນເຈົ້າພາບ ໃນທ້າຍປີ 2018 ທີ່ໄດ້ເລີ່ມລົງມືກໍ່ສ້າງຕັ້ງແຕ່ຕົ້ນເດືອນ ຕຸລາາ 2015 ດ້ວຍເນື້ອທີ່ທັງໝົດ 35 ເຮັກຕາ ຜູ້ຮັບເໝົາຄາດວ່າຈະໃຊ້ເວລາອີກໜຶ່ງປີຈິ່ງສຳເລັດ
ທ່ານ ຄຳມະນີ ອິນທະວົງ ວິຊາການ ບໍລິສັດທີ່ປຶກສາ ການກໍ່ສ້າງໄດ້ກ່າວລາຍງານ ຄວາມຄືບໜ້າ ຂອງການກໍ່ສ້າງສະໜາມກີລາເມື່ອບໍ່ດົນມານີ້ວ່າ ມາຮອດປະຈຸບັັນ ການກໍ່ສ້າງໄດ້ສຳເລັດແລ້ວ 51% ເປັນຕົ້ນແມ່ນໄດ້ສຳເລັດໜ້າວຽກບຸກເບີກອະນາໄມ ສະຖານທີ່ກໍ່ສ້າງ, ທາງເວັ້ນອ້ອມສະໜາມ, ດຶງຕາຂ່າຍໄຟຟ້າ, ພ້ອມຕິດຕັ້ງໝໍ້ແປງໄຟ, ຕີຜັງຈັບລະດັບ, ຂຸດຂຸມຮາກຖານ, ຕີແບບເທເປຕົງເສີມເຫຼັກຕີນຮາກຖານ, ກໍ່ຝາ 20 ຊັງຕີແມັດກ້ອງຄານດິນ, ກໍ່ໂບກຝາຂັ້ນຫ້ອງຕ່າງໆ, ສ່ວນໜ້າວຽກທີ່ຈະໄດ້ສືບຕໍ່ດຳເນີນຕໍ່ໄປແມ່ນ: ກໍ່ໂບກຕິດກາໂລ, ຕິດຕັ້ງໄຟຟ້ານໍ້າປະປາ, ຕິດຕັ້ງໂຄງຫຼັງຄາ, ກຳແພງອ້ອມ, ເດີ່ນຈອດລົດ, ວຽກພື້ນສະໜາມ ກິລາເຕະບານ ແລະລານແລ່ນ
ການກໍ່ສ້າງສະພາບບາງຄັ້ງ ກໍພົບຄວາມຫຍຸ້ງຍາກ ເນື່ອງຈາກວ່າຝົນຕົກ, ໄຟຟ້າບໍ່ມາປົກກກະຕິ, ບ່ອນຕັ້ງຫ່າງຈາກນໍ້າປະປາ, ແຕ່ທາງບໍລິສັດ ກໍພະຍາຍາມເອົາໃຈໃສ່ສູ້ຊົນ ເຮັດໃຫ້ສະໜາມກີລາແຫ່ງນີ້ ສຳເລັດກ່ອນມື້ເປີດງ່ານຕົວຈິງ 4 ເດືອນຢ່າງຕໍ່າ
ສະໜາມກິລາແຫ່ງນີ້ ລັດຖະບານລາວໄດ້ທຸ້ມງົບປະມານໃນວົງເງິນ 215 ຕື້ກວ່າກີບ ເຂົ້າໃນການກໍ່ສ້າງ, ໂດຍແມ່ນບໍລິສັດ ດາວພວນ ສຳຫຼວດອອກແບບ-ກໍ່ສ້າງເຄຫະສະຖານ ຈຳກັດ ເປັນຜູ້ຮັບເໝົາກໍ່ສ້າງ ຄາດວ່າສາມາດຮອງຮັບມວນຊົນໄດ້ຢ່າງໜ້ອຍ 11 ພັນຄົນ ແລະມີລານຈອດລົດທີ່ກວ້າງຂວາ ສາມາດບັນຈຸໄດ້ເຖິງ 6 ພັນກວ່າຄັນ
ແຫຼ່ງຂ່າວ: ໜັງສືພິມ ເສດຖະກິດ-ສັງຄົມ