ປີໃໝ່ລາວໃນປີນີ້ ເຫັນວ່າໄດ້ພັກຍາວຫຼາຍວັນ ເລີ່ມແຕ່ວັນທີ 13-17ເມສາ 2017 ເຊິ່ງເຮັດໃຫ້ຫຼາຍຄົນຖືໂອກາດເດີນທາງໄປຢ້ຽມຢາມພໍ່ແມ່ພີ່ນ້ອງ ເພື່ອໄປສະເຫຼີມສະຫຼອງປີໃໝ່ຢູ່ບ້ານເກີດເມືອງນອນຂອງຕົນເອງ, ໃນການເດີນທາງໄປ ສ່ວນຫຼາຍກໍຈະຂີ່ລົດໂດຍສານ, ແຕ່ສັງຄົມກໍຍັງເປັນຫ່ວງຢ້ານສະພາບເຕັກນິກຂອງລົດບໍ່ຮັບປະກັນ, ສຸຂະພາບຂອງຄົນຂັບບໍ່ພ້ອມ ແລະອີກບັນຫາໜຶ່ງທີ່ສຳຄັນແມ່ນ ຢ້ານສວຍໂອກາດຂຶ້ນຄ່າໂດຍສານ.

ທ່ານນາງ ຈິດປະສົງ ຫຼວງເດດມີໄຊ ປະທານສະຖານີຂົນສົ່ງໂດຍສານສາຍເໜືອ ໄດ້ສຳພາດໃນວັນທີ 4 ເມສາ 2017 ຜ່ານມາວ່າ ໃນໂອກາດປີໃໝ່ລາວທີ່ໃກ້ຈະມາເຖິງນີ້ ທາງສະຖານີໄດ້ມີກນກະກຽມລົດໂດຍສານ ທີ່ຮັບປະກັນໄວ້ຢ່າງຫຼວງຫຼາຍ ເພື່ອຕອບສະໜອງຄວາມພໍພຽງ ກັບຄວາມຮຽກຮ້ອງຕ້ອງການຂອງສັງຄົມ ແລະລົດທຸກຄັນຕ້ອງກວດກາເຕັກນິກສະພາບລົດໃຫ້ດີທີ່ສຸດ ພ້ອມມີການສຶກສາອົບຮົມພະນັກງານຂັບລົດແຕ່ລະສາຍທາງ ໃຫ້ມີຄວາມພ້ອມໃນທຸກດ້ານ ເພື່ອໃຫ້ການເດີນທາງຂອງຜູ້ໂດຍສານໃຫ້ມີຄວາມປອດໄພ

ພ້ອມດຽວກັນນັ້ນ ຈະບໍ່ອະນຸຍາດໃຫ້ຂຶ້ນຄ່າໂດຍສານຢ່າງບໍ່ເປັນທາງການເດັດຂາດ, ແຕ່ເຖິງແນວໃດກໍຕາມ ກໍຂໍເຕືອນໃຫ້ທຸກຄົນມີສະຕິມາຊື້ປີ້ ແລະຂຶ້ນລົດຢູ່ສະຖານີໂດຍກົງ ພ້ອມສັງເກດເບິ່ງປີ້ຂອງຕົນ ແລະເລກທະບຽນລົດກ່ອນຂຶ້ນລົດທຸກຄັ້ງ, ເພື່ອຄວາມປອດໄພ ແລະຄວາມເປັນລະບຽບຮຽບຮ້ອຍ, ສ່ວນລາຄາປີ້ໂດຍສານແຕ່ລະສາຍນັ້ນ ພວກເຮົາໄດ້ຕິດໄວ້ຊ່ອງເທິງຂອງແຕ່ລະຊ່ອງບໍລິການຂາຍປີ້ ເພື່ອຄວາມຈະຈ່າງແຈ້ງ

ສ່ວນກໍລະນີຂຶ້ນລົດໂດຍສານຢູ່ແຄມທາງ, ນອກສະຖານີ ແມ່ນພວກເຮົາບໍ່ຮັບຜິດຊອບໃນກໍລະນີນັ່ງຕັ່ງເສີມ ເພາະສະຖານີໄດ້ມີລະບຽບວາງອອກຄື: ຕ້ອງຂຶ້ນຢູ່ສະຖານີໂດຍກົງ ເພື່ອຫຼີກລຽງບັນຫາການເອົາລັດເອົາປຽບຈາກຄົນຂັບໂດຍສານ ເຊິ່ງບັນຫານີ້ມັນເກີດຢູ່ນອກເຂດການຄຸ້ມຄອງຂອງສະຖານີ, ເຊິ່ງອາດຈະເຮັດໃຫ້ເກີດຊ່ອງວ່າງໃນການປະພຶດສິ່ງບໍ່ດີຂອງຜູ້ຂັບລົດກໍເປັນໄດ້ ແລະບາງສາຍຫຼັກ ທາງສະຖານີໄດ້ເພີ່ມຈຳນວນລົດໂດຍສານຂຶ້ນ ເປັນຈຳນວນເທົ່າຕົວ ເພື່ອຮອງຮັບຜູ້ໂດຍສານ ທີ່ຈະເພີ່ມຂຶ້ນເຊັ່ນ: ວຽງຈັນ-ວັງວຽງ, ວຽງຈັນ-ທ່າລາດ, ວຽງຈັນ-ຫຼວງພະບາງ ແລະອື່ນໆ

ແຫຼ່ງຂ່າວ: ໜັງສືພິມ ລາວພັດທະນາ