ສຳນັກຂ່າວຕ່າງປະເທດລາຍງານ ເມື່ອວັນທີ 5 ເມສາ 2017 ຜ່ານມາວ່າ ນະຄອນຫຼວງລອນດອນຂອງອັງກິດ ໄດ້ທົດລອງລົດຮັບສົ່ງສາທາລະໄຮ້ຄົນຂັບທີ່ບໍ່ໄດ້ແລ່ນເທິງລາງ ລ່າສຸດທາງການລອນດອນ ແລະບໍລິສັດຜູ້ພັດທະນາ “ອ໊ອກບໍຕິກາ” ປະກາດຈະຂະຫຍາຍເວລາທົດສອບ ເດີນລົດໄຮ້ຄົນຂັບນີ້ໄປອີກ 3 ອາທິດ ພ້ອມເປີດໃຫ້ຜູ້ສົນໃຈເຂົ້າເປັນອາສາສະໝັກຮ່ວມທົດສອບເພີ່ມອີກ 100 ຄົນ
ການທົດລອງແລ່ນນີ້ ໃຊ້ລົດທັງໝົດ 7 ຄັນ ແລ່ນໃນເສັ້ນທາງ 3.2 ກິໂລແມັດ ລຽບແມ່ນໍ້າໃກ້ສະໜາມກິລາ ໂອທູ ອາຣີນ່າ ເຊິ່ງເປັນບໍລິເວນທີ່ມີຄົນຫຼາຍ ມີຖະໜົນຄົນຍ່າງ ແລະຜູ້ໃຊ້ລົດຖີບຫຼາຍ, ນອກຈາກນີ້ ຍັງມີການທົດລອງຢູ່ເມືອງອື່ນໆອີກເຊັ່ນ ເມືອງບຣິສຕອນ, ໂຄເວນທຣີ ແລະມິສຕັນ ເຄນ ເຊິ່ງຄາດວ່າຈະມີການເປີດໃຫ້ບໍລິການ ຮັບສົ່ງສາທາລະນະໄຮ້ຄົນຂັບທີ່ບໍ່ໄດ້ແລ່ນເທິງລາງ ຢ່າງເປັນທາງການ ຢູ່ນະຄອນຫຼວງລອນດອນ ໃນປີ 2019 ນີ້
ລົດຮັບສົ່ງສາທາລະນະໄຮ້ຄົນຂັບນີ້ ພັດທະນາມາຈາກລົດໄຟໄຮ້ຄົນຂັບ ຕົ້ນແບບຈາກ “ອັລຕຣາ ພ໊ອກ” ທີ່ແລ່ນຮັບຜູ້ໂດຍສານໃນສະໜາມບິນຮີທໂທມາດົນນານຫຼາຍປີ, ເຊິ່ງລົດຮັບສົ່ງສາທາລະນະໄຮ້ຄົນຂັບນີ້ ສາມາດແລ່ນໄດ້ຄວາມໄວສູງສຸດ 16 ກິໂລແມັດ/ຊົ່ວໂມງ ຄວບຄຸມການເຄື່ອນທີ່ດ້ວຍຊອບແວຄອມພິວເຕີ ແລະມີອຸປະກອນກວດຈັບທິດທາງ ດ້ວຍກ້ອງ 5 ໜ່ວຍ ແລະມີລະບົບເລເຊີ ສາມາດເບິ່ງເຫັນໄດ້ໃນໄລຍະ 100 ແມັດ ບັນທຸກຜູ້ໂດຍສານໄດ້ 4-6 ຄົນ ໂດຍທີ່ບໍ່ມີພວງມາໄລ ແລະເບກໃນລົດ ເພາະມັນສາມາດຢຸດລົດໄດ້ເອງ ເມື່ອພົບສິ່ງກີດຂວາງ ແນວໃດກໍຕາມຍັງຕ້ອງມີພະນັກງານປະຈຳລົດຄອຍດູແລ ຫາກເກີດເຫດການສຸກເສີນ ກໍຈະມີປຸ່ມສຸກເສີນກົດ