ການປູງຕົ້ນໄມ້ໃນບໍລິເວນເຮືອນ ມີປະໂຫຍດຫຼາຍຢ່າງເຊັ່ນ: ປະດັບເພື່ອຄວາງາມ, ໃຫ້ຮົ່ມເຢັນດີ, ເອົາດອກ ໝາກມາກິນ ແລະທີ່ສຳຄັນມີຕົ້ນໄມ້ບາງຊະນິດ ກໍມີຄວາມເຊື່ອມາແຕ່ບູຮານ ໃນເລື່ອງຂອງການຊ່ວຍເສີມສິລິມຸງຄຸນໃຫ້ກັບເຮືອນ ແລະຄົນທີ່ອາໄສຢູ່ເຮືອນຫຼັງນັ້ນ
- ຕົ້ນໝາກຍົມ: ຕາມຄວາມເຊື່ອວ່າ ການປູກຕົ້ນໝາກຍົມ ຈະເຮັດໃຫ້ຄົນນິຍມຊົມຊອບ, ມີຄົນຮັກ ແລະມີຊື່ສຽງ ບໍ່ມີຄົນຄິດປອງຮ້າຍ ຫຼືບໍ່ມີສັດຕູ ແລະຫາກປູກໄວ້ທິດຕາເວັນຕົກ ຈະຊ່ວຍປ້ອງກັນວິນຍານຮ້າຍໄດ້
- ຕົ້ນດອກຄູນ: ເຊື່ອວ່າຈະຊ່ວຍໃຫ້ຜູ້ທີ່ຢູ່ອາໄສໃນເຮືອນນັ້ນ ມີຄວາມຈະເລີນຮຸ່ງເຮືອງ, ມີກຽດສັກສີ ແລະໃບຂອງຕົ້ນຄູນ ຍັງຖືກນຳເອົາໄປໃຊ້ໃນພິທີສະເດາະເຄາະອີກດ້ວຍ ຄວນປູກໄວ້ທິດຕາເວັນຕົກສ່ຽງໃຕ້ຂອງເຮືອນ
- ຕົ້ນກ້ວຍ: ມີຄວາມເຊື່ອຈະເຮັດໃຫ້ການເຮັດວຽກມີຄວາມກ້າວໜ້າດີຂຶ້ນ ຄິດຊິເຮັດສິ່ໃດກໍງ່າຍ ຄືກັນກັບປອກກ້ວຍເຂົ້າປາກ ຄວນປູກໄວ້ທິດຕາເວັນອອກຂອງເຮືອນ
- ຕົ້ນວາດສະໜາ: ເຊື່ອວ່າຫາກເຮືອນໃດປູກ ຈະເຮັດໃຫ້ຄົນມີຄວາມສຸກ, ມີຄວາມສົມຫວັງໃນຊີວິດ ແລະເປັນຕົ້ນໄມ້ແຫ່ງໂຊກ ຖືເປັນຕົ້ນໄມ້ສ່ຽງທາຍ ຖ້າຕົ້ນວາດສະໜາເຮືອນໃດອອກດອກງາມ ຈະເຮັດໃຫ້ມີໂຊກ ປາຖະໜາສິ່ງໃດກໍຈະສົມຫວັງດັ່ງໃຈ ຄວນປູກໄວ້ທິດຕາເວັນອອກສ່ຽງເໜືອ ຄວນປູກໃນວັນອັງຄານ ແລະຄວນໃຫ້ຜູ້ຍິງປູກຈະດີທີ່ສຸດ
- ຕົ້ນດອກເສດຖີ: ເຊື່ອວ່າຈະນຳໂຊກມາໃຫ້ ຈະເຮັດໃຫ້ຄອບຄົວມີຄວາມສະຫງົບສຸກ ແລະຖ້າປູກອອກດອກໄດ້ 8 ດອກຈະມີໂຊກ, ມີເງິນຄຳ ແລະໄດ້ເລື່ອນຕຳແໜ່ງ ຄວນປູກໃນທິດຕາເວັນອອກສ່ຽງໃຕ້ ແລະປູກວັນພຸດ ຈະເປັນມຸງຄຸນຫຼາຍ
- ຕົ້ນດອກເຂັມ: ເປັນສັນຍາລັກແທນຄວາມສະຫຼາດຫຼັກແຫຼມ ປຽບທຽບກັບເຂັມທີ່ແຫຼມຄົມ ແລະການປູກໄວ້ໃນເຮືອນເຊື່ອວ່າ ຈະເຮັດໃຫ້ຄົນໃນເຮືອນມີຄວາມສະຫຼາດຫຼັກແຫຼມຄືກັບດອກເຂັມ ແລະຍັງເຮັດໃຫ້ມີໄຫວພິບເອົາຕົວລອດ
- ຕົ້ນດອກເງິນດອກຄຳ: ເຊື່ອວ່າຈະເຮັດໃຫ້ຄົນພາຍໃນເຮືອນມີຄວາມສະຫງົບສຸກ, ຫາເງິນຫາຄຳໄດ້ດີ
- ຕົ້ນໝາກມີ້: ຈະເຮັດໃຫ້ຄົນພາຍໃນເຮືອນໄດ້ຮັບການສະໜັບສະໜູນ ມີຄົນຄອຍອຸປະຖຳຄໍ້າຊູ ແລະໃຫ້ຄວາມຊ່ວຍເຫຼືອ ສາມາດປ້ອງກັນອັນຕະລາຍໄດ້
- ຕົ້ນໝາກຂາມ: ເຊື່ອວ່າຈະເຮັດໃຫ້ຄົນມັກ, ເຮັດໃຫ້ຄົນອື່ນນັບຖື ແລະປ້ອງກັນຄະດີ, ການຜິດຖຽງກັນ ແລະວນຍານໄດ້
- ຕົ້ນໄຜ່: ມີຄວາມເຊື່ອວ່າ ການປູກຕົ້ນໄຜ່ ຈະເຮັດໃຫ້ຄົນໃນຄອບຄົວມີຄວາມປອງດອງ ສາມັກຄີ ບໍ່ແຕກແຍກ ຮັກກັນ ແລະຕົ້ນໄຜ່ຍັງເປັນຕົ້ນໄມ້ທີ່ອ່ອນຕາມລົມ ເຮັດໃຫ້ຄົນອ່ອນນ້ອມຖ່ອມຕົນ
- ຕົ້ນໝາກມ່ວງ: ເຊື່ອວ່າຈະເຮັດໃຫ້ຄົນທີ່ຢູ່ອາໄສລໍ່າລວຍຫຼາຍຂຶ້ນ ແລະປ້ອງກັນບໍ່ໃຫ້ຄົນອື່ນມາໃສ່ຄວາມໃຫ້ຄົນໃນຄອບຄົວເດືອນຮ້ອນໄດ້
ແນວໃດກໍຕາມ ຕົ້ນໄມ້ທີ່ກ່າວມານັ້ນ ກໍເປັນຄວາມເຊື່ອສ່ວນບຸກຄົນທີ່ມີມາແຕ່ດົນນານ, 11 ຕົ້ນໄມ້ທີ່ກ່າວມານີ້ ກໍເປັນພຽງຈຳນວນໜຶ່ງທີ່ຍົກຂຶ້ນມາໃຫ້ຜູ້ອ່ານໄດ້ຮູ້ ແລະຍັງມີຫຼາຍໆຊະນິດ ທີ່ຄົນລາວເຮົາເຊື່ອວ່າປູກແລ້ວເປັນສິລິມຸງຄຸນ ແລະເສີມບາລະມີໃຫ້ກັບຕົນເອງ