ສປປ ລາວ ເປັນປະເທດໜຶ່ງ ທີ່ໄດ້ຮັບຜົນກະທົບ ຈາກລູກລະເບີດບໍ່ທັນແຕກໃນປາງສົງຄາມ ຢ່າງໜັກໜ່ວງກວ່າໝູ່ໃນໂລກ, ອີງຕາມການສຳຫລວດ ຜົນກະທົບຂອງ ລູກລະເບີດບໍ່ທັນແຕກ ຢູ່ສປປ ລາວ ໃນປີ 1996 ຂອງອົງການ ແຮນດີແຄບສາກົນ ໃຫ້ຮູ້ວ່າ ມີລູກລະເບີດບໍ່ທັນແຕກຕົກຄ້າງຢູ່ 1/3 ຂອງເນື້ອທີ່ປະເທດລາວ.
ໃນປີ 2016 ຈຳນວນຜູ້ເຄາະຮ້າຍຈາກລະເບີດບໍ່ທັນແຕກມີຈຳນວນທັງໝົດ 50 ຄົນ ເຊິ່ງເຫັນວ່າໄດ້ຫຼຸດລົງ ຈາກປີ 2008 ທີ່ຜູ້ເຄາະຮ້າຍຈາກລະເບີດບໍ່ທັນແຕກ ຈຳນວນ 300 ຄົນ ເຊິ່ງຖືກວ່າໄດ້ປະກອບສ່ວນສຳຄັນ ເຂົ້າໃນ ການພັດທະນາ ເສດຖະກິດ-ສັງຄົມ ຂອງລັດຖະບານ ແລະປະກອບສ່ວນເຂົ້າໃນການສູ້ຊົນ ເພື່ອບັນລຸເປົ້າໝາຍສະຫັດສະວັດ ດ້ານການພັດທະນາ.
ທ່ານ ຄຳແພງ ໄຊສົມແພງ ລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ ໄດ້ກ່າວ ໃນພິທີລະນຶກ ວັນສາກົນໂຄສະນາ ເພື່ອຕ້ານລະເບີດບໍ່ທັນແຕກ ປີ 2017 ໃນວັນທີ 4 ເມສາ ນີ້ ຢູ່ນະຄອນຫລວງວຽງຈັນ ວ່າ: ບັນດາຜົນສຳເລັດ ທີ່ກ່າວມາຂ້າງເທິງນັ້ນ ຍ້ອນວ່າຫລັງຈາກ ໄດ້ຈັດຕັ້ງປະຕິບັດວຽກງານ ແກ້ໄຂບັນຫາລູກລະເບີດບໍ່ທັນແຕກ ໃນ 2 ທົດສະວັດທີ່ຜ່ານມາ ສາມາດກວດກູ້ເນື້ອທີ່ໄດ້ 60 ພັນກວ່າເຮັກຕາ (ສະເພາະ ປີ 2016 ກວດກູ້ໄດ້ 3.400 ກວ່າເຮັກຕາ), ທຳລາຍລູກລະເບີດບໍ່ທັນແຕກ ໄດ້ເກືອບ 2 ລ້ານໜ່ວຍ (ສະເພາະ ປີ 2016 ທຳລາຍໄດ້ຫລາຍກວ່າ 95.000 ໜ່ວຍ) ແລະ ສາມາດຊ່ວຍເຫລືອ ປິ່ນປົວການແພດ, ຟື້ນຟູສຸຂະພາບ ແລະ ປະກອບອາຊີບ ໃຫ້ຜູ້ລອດຊີວິດ ຈາກລູກລະເບີດບໍ່ທັນແຕກ ໄດ້ຫລາຍກວ່າ 3 ພັນຄົນ.
ແຫຼ່ງຂ່າວ: ສຳນັກຂ່າວສານປະເທດລາວ