ໃນວັນທີ 30 ມີນາ 2017 ຜ່ານມາ ຢູ່ນະຄອນຫຼວງວຽງຈັນ ໄດ້ມີພິທີເຊັນສັນຍາສຳປະທານ ໂຄງການເຂື່ອນໄຟຟ້ານ້ຳໂມ້ 2 ຢູ່ເມືອງໝອກ ແຂວງຊຽງຂວາງ ລະຫວ່າງທ່ານ ຄຳລຽນ ພົນເສນາ ຮອງລັດຖະມົນຕີ ກະຊວງແຜນການ ແລະ ການລົງທຶນ ກັບ ທ່ານ ເຈິນຊວນແທັກ ຜູ້ອຳນວຍການໃຫຍ່ ບໍລິສັດໄຟຟ້ານ້ຳໂມ້ 2 ຈຳກັດ ແລະຮ່ວມເຊັນເປັນພິຍານ ໂດຍມີທ່ານ ສີຈາດ ບຸດຊາ ກິດຕິລາດ ຫົວໜ້າກົມທຸລະກິດພະລັງງານ ກະຊວງພະລັງງານ ແລະບໍ່ແຮ່, ທ່ານ ໄມດີ ຄຳພຸກດວງແກ້ວ ຫົວໜ້າພະແນກແຜນການ ແລະການລົງທຶນ ແຂວງຊຽງຂວາງ ແລະ ທ່ານ ພົງສະຫວັດ ເສນາພວນ ປະທານບໍລິສັດໄຟຟ້ານ້ຳໂມ້ 2 ຈຳກັດ, ພ້ອມດ້ວຍ ພາກສ່ວນກ່ຽວຂ້ອງສອງຝ່າຍ ເຂົ້າຮ່ວມເປັນສັກຂີພິຍານ.
ໂຄງການດັ່ງກ່າວ, ແມ່ນບໍລິສັດໄຟຟ້ານ້ຳໂມ້ 2 ຈຳກັດ ເປັນຜູ້ຮັບເໝົາກໍ່ສ້າງ ໂດຍມີ 5 ຂາຫຸ້ນຄື: ບໍລິສັດພົງຊັບທະວີກໍ່ສ້າງຂົວທາງ, ເຄຫາສະຖານ ແລະ ຊົນລະປະທານ ຈຳກັດຜູ້ດຽວ (ເອກະຊົນລາວ) ຖືຫຸ້ນ 37%, ບໍລິສັດນ້ຳໂມ້ຫວຽດນາມ ຈຳກັດ (ສສ ຫວຽດນາມ) ຖືຫຸ້ນ 23%, ບໍລິສັດ ກຸ່ມດວງຈະເລີນ ຈຳກັດຜູ້ດຽວ (ເອກະຊົນລາວ) ຖືຫຸ້ນ 21%, ບໍລິສັດການຄ້າດົ້ງເຕີ່ມ ຈຳກັດ (ສສ ຫວຽດນາມ) ຖືຫຸ້ນ 14% ແລະ ບໍລິສັດແສງຈັນກໍ່ສ້າງຈຳກັດຜູ້ດຽວ (ເອກະຊົນລາວ) ຖືຫຸ້ນ 5%
ເຂື່ອນໄຟຟ້ານ້ຳໂມ້ 2 ເປັນເຂື່ອນນ້ຳຕົກ ຕັ້ງຢູ່ສາຍນ້ຳໂມ້ ເມືອງໝອກ ແຂວງ ຊຽງຂວາງ, ມີກຳລັງການຕິດຕັ້ງ 120 ເມກາວັດ, ຈະສາມາດຜະລິດກະແສໄຟຟ້າໄດ້ 498,31 ກິກກະວັດໂມງ ຕໍ່ປີ, ອາຍຸສຳປະທານ 27 ປີ ນັບແຕ່ມື້ເປີດ ດຳເນີນການຜະລິດກະແສໄຟຟ້າ, ໄລຍະເວລາ ໃນການກໍ່ສ້າງ 3 ປີ 6 ເດືອນ, ລວມມູນຄ່າການກໍ່ສ້າງທັງໝົດ 217 ລ້ານ ກວ່າໂດລາສະຫະລັດ.
ແຫຼ່ງຂ່າວ: ສຳນັກຂ່າວສານປະເທດລາວ